The Definitive Guide to Living in the Capital , Cairo , Egypt

كلنا عارفين إننا عايشين في عصر شبكات التواصل الاجتماعي. وعلشان كده لما مطعم جديد بيفتح في القاهرة، أحسن طريقة يعمل بها دعاية لنفسه، إنه يعزم مشاهير مواقع التواصل الاجتماعي ووسائل الإعلام لحفل افتتاح محصلش. وهو ده بالضبط اللي عمله “أيون-AEON”. طبعًا كان لازم نروح ونشوف إيه أخبار المطعم الجديد في الكوربة.

أيون متصمم زي شقة من خمس غرف؛ أول مكان فيه كراسي وترابيزات مطعم تقليدية لطيفة، وبعدين لاونج ظريف فيه كنب وترابيزات لقعدة حلوة مع أصحابك، ومكان أكل فيه خصوصية أكتر شوية. وبار شيك بإضاءه خافتة. وأخيرًا غرفة لكبار الزوار جنب البار، بترابيزات عالية كبيرة للتجمعات الخاصة. الشكل العام للمكان كلاسيكي شوية وفيه لمسات مودرن زي الإضاءة واختيارهم للألوان.

وإحنا بنتفرج على المنيو وصل الجرسون ومعاه سلة عيش وزبدة لزوم فتح الشهية. المنيو نفسها فيها تشكيلة هايلة سواء كنت عايز تشرب حاجة أو سناك خفيف أو أكلة محترمة.

ابتدينا بطبق مير مونتي Mare Monte ثمنه (220 جنيه) من المقبلات. وده ريزوتو كريمي تتبيلته هايلة وقوامه مضبوط. الريزوتو كمان كان فيه شوية جمبري حلوين ومستويين كويس مع مشروم طازة، شرب نكهة مكونات الأكل فعمل طعم مميز للطبق. الطعم القوي المملح للجبنة البارميزان عجبنا جدًا.

أول طبق رئيسي معانا هو سالمون ستيك ديجون (290 جنيه). قطعة السالمون كانت هشة وطرية جدًا ومستوية للون وردي فاتح، وتحتها بطاطس مهروسة تحفة مع رشة صوص ديجون وخضار سوتيه. الصوص كان ناقصه الطعم القوي المميز للديجون، بس عمومًا نقدر نقول وبكل ثقة إن دي كانت أحسن قطعة سالمون جربناها في مصر، والميزة كمان إن السالمون مش هيبوظ الدايت فكده إحنا في السليم.

جربنا كمان طبق البيف روسيني (350 جنيه) اللي شكله يفتح النفس. قطعة البيف تندرولين كانت مستوية medium كويس جدًا، ومعمولة بصوص برنيز اللذيذ، كبديل لاستخدام النبيذ الأحمر التقليدي في الطبق ده. جايز الطبق بسيط فعلًا بس معمول باحترافية وطبعًا جودة اللحمة ملهاش مثيل. على فكرة الطبق بينزل معاه بطاطس مهروسة وخضار سوتيه.

أخر حاجة معانا هي آبل سترودل Apple Strudel ثمنه (90 جنيه). الجميل في الآبل سترودل إن سكرها مناسب وقوامها مضبوط ونكهة القرفة القوية مع حشو التفاح والعجينة المقرمشة عاملين لحن موسيقي. الكريمة اللي بتنزل مع الطبق كانت هايلة بس قامت بدور بولة الآيس كريم اللي بتنزل مع الطبق.

وبكده نكون وصلنا لنهاية رحلتنا مع أيون اللي يمكن كنا مش مرتاحين لدرجة كبيرة في الافتتاح بس أكيد يعتبر إضافة ممتازة لمنطقة الكوربة. لو كنت بتدور على مكان شيك والخدمة فيه ممتازة وفي نفس الوقت بيعمل أكل كويس، يبقى عليك وعلى أيون. مفيش شك الموضوع مكلف شويتين بس الموضوع يستاهل من ناحية جودة مكونات الأكل.