The Definitive Guide to Living in the Capital , Cairo , Egypt

الأكيل اللي بجد يقدر يلاقي أكل في أي مكان يروحه، بس فكرة أنك تلاقي أكلة حلوة هي دي الشطارة اللي محتاجة بحث وتنقيب وسط مطاعم القاهرة، بعد رحلة تسوق طويلة ومرهقة في القاهرة الجديدة، طلعنا على مطعم أيكيا الموجود في الدور الثاني من متجر أيكيا الشهير في كايرو فيستيفال سيتي.

تصميم أيكيا ريستوران على شكل كافيتريا وفكرته أنك تشيل صينية وتقف في طابور وأمامك تشكيلة من الأكلات البسيطة والسناكس والمشروبات تناسب الناس اللي عاوزة أكلة سريعة على الماشي.

ولأننا عاوزين نجرب أكبر عدد من الاختيارات، طلبنا تشكيلة من المقبلات تشمل سبرينج رولز خضروات وتشيكن تندر وكبة (2: 3 جنيه للقطعة)، وبالنسبة للأطباق الرئيسية طلبنا طبقين سويدي كلاسيكيين هما كرات اللحم السويدي Swedish meatballs بـ (34 جنيه) وسلامون لازانيا (48 جنيه).

بعد ما استمتعنا بعمل كوكتيلات في ماكينة المشروبات الغازية (15 جنيه لكوب قابل للتعبئة) وأحرجنا نفسنا قصاد كل الناس، استعدينا نبدأ الأكل.

البداية كانت مع المقبلات، عجينة السبرينج رولز كانت رقيقة وطرية من الداخل، بس طعمها متواضع جدًا، وحشو الخضروات كان عادي جدًا ومافيش أي نكهة مميزة، أما التشيكن تندرز فصحيح كانت مقرمشة بس ناشفة جدًا ومش طازة، والكبة كانت محشية لحم مفروم عصاري وبطبقة خارجية مقرمشة، المقبلات بشكل عام كانت مستوية كويس بس المشكلة أنها مجمدة وبالتالي مافيش أي نكهة مميزة.

كرات اللحم بالمرقة اللذيذة وقوامها الطري برضه طعمها كان متوسط ومافيش نكهة اللحم المعروفة، أما البطاطس المهروسة فكانت هايلة مافيش كلام، طبق اليوم بدون منافس كان السلامون لازانيا اللي كان معمول صح وغني بالبشاميل، وكمان السبانخ أضافت طعم ولون روعة، بالنسبة للسلامون نفسه فكميته كانت كبيرة وطازج ورائحته جميلة وكمان طري جدًا.

للحلو طلبنا ألموند تشوكليت تارت (20 جنيه) –تارت شوكولاتة باللوز– وكان اختيار هايل فعلًا، تارت أيكيا أكيد هـ يبهرك بطبقاته المتعددة اللي في وسطها عجينة اللوز والكسترد والكريمة المخفوقة، الكسترد وعجينة اللوز كانوا عاملين ثنائي متجانس، والكريمة المخفوقة ضبطت الطعم المسكّر، أما آخر طبقة المكونة من شوكولاتة Daim المليانة قطع لوز بالكراميل فكانت تحفة؛ هو ده فعلًا أحسن اختيار عملناه في اليوم كله بما فيه رحلة التسوق.

عدّينا كمان على محطة أيكيا فاست فوود بـ تبيع شاورما وهوت دوج، وأيوه يا سيدي كنا شبعانين على الآخر، بس مش معقول كنا نمشي من غير واحد شاورما فراخ (11 جنيه) على السريع ومعاه بولة آيس كريم (5 جنيه).

الشاورما المعمولة في عيش لبناني بدل عيش الصاج السوري المعروف كانت لذيذة، وصوص الثومية كان خفيف وعمل طعم مميز مع الخيار المخلل، والجميل كمان كان الخس الطازج اللي أضاف طعم منعش للساندويتش، بولة الآيس كريم كانت لذيذة وقوام الآيس كريم ممتاز.

يمكن أحبطنا شوية أن مافيش أطباق سويدي أصلية –خصوصًا في قسم المقبلات– بس عمومًا الأكل داخل أيكيا مش غريب زي ما ممكن بعض الناس فاكرة، معاك أن الأكل في متجر شامل غريب شوية، بس الأسعار معقولة جدًا والجو رائع زي المحل بالضبط.