The Definitive Guide to Living in the Capital , Cairo , Egypt

مطعم أوفيو المتخصص في الأكل الأوروبي عمل قرار تاريخي في رمضان وقرر يأخذ أجازة شوية من الكوردون بلو والبرجر ويقدم لنا منيو للأكل التركي. سعر الفرد 250 جنيه لو طلبت الميكس جريل، أو 290 جنيه لو طلبت السالمون.

خلونا نقول لكم قبل ما نتكلم عن الأكل إن الخدمة في جاليريا 40 محصلتش من ناحية السرعة والتمكن. رغم إننا وصلنا قبل الفطار بعشر دقائق ومن غير حجز، بس الأكل نزل في المعاد. كسرنا صيامنا بشوية كركديه كان لاذع ومر جدًا، وبعدها على طول دخلنا على الشوربة ودول كانوا نوعين؛ شوربة عدس Mercimek Corbasi فيها بطاطس وجزر. ودي كانت ممتازة ومعاها عيش مقرمش. الطبق التاني كان شعرية Sehriye Corbasi مميزة بطعم الطماطم القوي وفيها لحمة مفرومة.

وإحنا بنقضي وقت لطيف مع الشوربة لاقينا الجرسون بيوزع أطباق مقبلات، ثلاثة باردين واثنين سخنين وطبق سلاطة. الأطباق الباردة كانت Kozlenmis Patlican وده باذنجان مهروس خفيف جدًا، مع Antep Ezme وده قطع طماطم سبايسي عليها هريسة حارة وثوم ودبس رمان، وأخر طبق كان Haydral وهي لبنة عليها حبة بركة ونعناع مجفف. أحلى حاجة بجد كان العيش الطري الطازة اللي محصلش.

نروح على المقبلات السخنة اللي حققوا المعادلة الصعبة ونبتدي مع Lahmacun وهو عيش طازة عليه لحمة مفرومة وفلفل أخضر وبصل وبقدونس، وواضح معاهم نكهة الطماطم والثوم، وأخيرًا إضافة فلفل مطحون اللي عملت الشطشطة المطلوبة.

بعدها الدور كان على Vezir Boregl وهو حاجة تشبه السبرينج رولز مقرمشة ومحشية كمية محترمة من الجبنة والبسطرمة والزعتر والروزماري. الطبق من الوصف شكله بسيط، بس الحقيقة إن طعمه تحفة.

لحد هنا والموضوع ماشي كويس، لغاية ما ظهر Sultan Salat. طبق السلطة كان عبارة عن طماطم وخيار وخس روماني وفلفل ألوان وعيش مقرمش مع طحينة. صحيح الخضار كان طازة وكل حاجة، بس ملهوش طعم والطحينة كانت ثقيلة ومش نافعة تكون دريسينج سلطة.

نروح للأطباق الرئيسية ونشوف إيه أخبار السالمون المشوي اللي معاه خضار سوتيه وبطاطس مشوية. الخضار للأسف مكانش له أي طعم وكمان مش مستوي كويس، أما البطاطس المشوية فتتبيلتها حلوة لكن القطعتين مكانوش مستويين كويس. بالنسبة للسالمون فكان طري ومتبل كويس ورشة الليمون عملت الصح. ممكن نقول إن مفيش أي حاجة تميز الطبق.

أما طبق Karisik Kebab (ميكس جريل) له مميزاته وعيوبه. طعم الفراخ المشوية وكفتة لحمة كانوا روعة بس ناشفين شوية وخصوصًا الفراخ. بالنسبة للرز اللي بينزل مع الطبق فكان معجن شوية، بس فكرة رشة القرفة عليه كانت هايلة. تتبيلة كفتة الفراخ برضه كانت تحفة، وعلى عكس الفراخ المشوية وكفتة اللحمة، كفتة الفراخ كانت عصارية على الأخر وإضافة الفستق كانت لذيذة.

مفيش نهاية لأكلة زي دي أحلى من البقلاوة بالآيس كريم. قطعة البقلاوة المثلثة كان عليها كمية شربات مناسبة، والعجينة كانت مقرمشة وخفيفة، وكمان الحلو في الموضوع كمية الفستق المحترمة اللي عملت طعم جميل مع الآيس كريم المستكة.

في أخر رحلتنا مع أوفيو نقدر نقول إننا استمتعنا بيومنا هناك. الخدمة والجرسونات في أوفيو بصراحة ملهمش حل، والأكل كان كويس بس مش لدرجة 726 جنيه.