The Definitive Guide to Living in the Capital , Cairo , Egypt

في شوارع المعادي الهادية بالظبط في شارع 19 وسط الشجر والفيلل، بيظهر مطعم أوفيو – Ovio واللي كبتنا عنه قبل كده وبقى ليه فروع في التجمع و6 أكتوبر بس هيفضل الفرع الأم في المعادي هو الأقرب لقلبنا.

المكان مقسوم نصين نص أوت دور وسط الشجر في الهواء الطلق، ونص إن دور في التكييف، قعدنا جوه وبدأنا وجبتنا بشوربة طماطم بـ 45 جنيه، واللي نزلت بعد ما طلبناها بنص ساعة تقريبًا وكانت سخنة ودسمة وجواها توست مخبوز أطرافه مقرمشة وقلبه الطري شارب الشوربة، طعم الشوربة كان مظبوط ما بين لذوعة الطماطم ودسم الكريمة اللذيذة، ماكنش ناقصها حاجة أبدًا.

بعد كده طلبنا سلطة بالفراخ والتفاح بـ 98 جنيه، وبيتزا مارجريتا ومكرونة فونجي بالفراخ والصوص الأبيض بنفس السعر.

سلطة الفراخ كانت عبارة عن جبنة براميزان وخس وقطع فراخ وعين جمل وقطع تفاح مع تتبيلة بالليمون والخل، والمكونات كانت طازة جدًا، وإن كان مع قطع الدجاج قطع بصل وكنا نتمنى يتم تنبهينا لده لأنه مش مكتوب في المنيو، لكن بصفة عامة الطعم كان مميز بس لو كان الدريسينج صوص هاني مسترد كانت هتبقى أحلى.

أما بقى البيتزا فكانت هايلة ورفيعة على الطريقة الإيطالية وطعم صلصلة الطماطم فيها مميز، لكن ممكن محتاجة جبنة أكتر، وبعض أطرافها كانت مقرمشة زيادة عن اللزوم وأقرب للملسوعة.

المكرونة كانت عبارة عن مكرونة بالصلصة البيضة مع قطع المشروم والدجاج، وقوام الصوص كان مظبوط جدًا وتقيل هيشبعك تمام زي ما الكتاب بيقول.

طلبنا كمان عصير ليمون نعاع سموزي بالجنزبيل وكان طعمه حكاية صحيح كان ناقصه سكر شوية في الأول بس أول ما زودناه كان طعمه مظبوط جدًا ومنعش.