The Definitive Guide to Living in the Capital , Cairo , Egypt

مهمتنا في كايرو 360 أننا نلاقي لكم أفضل المطاعم اللي بتوفر لكم أحلى إفطار رمضاني، وعلشان كده بنلف كل مناطق القاهرة.. بس كل المناطق في رمضان كوم، والشيخ زايد كوم تانى خالص، الأجواء هناك لها روح مختلفة وجميلة، ومن المطاعم اللي هتستمتع فيها بجو الإفطار مطعم أفيتشي – Avitchii.

أفيتشي موجود في Sky Center Ville الموجود بين مستشفى جلوبال كير وفريش فوود ماركت، أول ما تدخل هتحس أن المكان صغير جدًا، لكن على العكس تقسيمته من جوه مختلفة وفيه قعدات كتير زي Open Air ومقفولة وفيه ترابيزات عادية وفيه High Tables، المكان مكون من دورين وفيه كمان أماكن مفتوحة على الفيو من خلال أزاز حواليك من كل ناحية ومكيفة.

ديكور المكان مبهج جدًا وفيه رسومات على الحيطة، وقماش مسند وظهر الكنب معمولين بستايل شبه الكولاج، من أول ما تدخل هتحس بحفاوة واهتمام من الناس اللي شغالة هناك، وأول حاجة بيقولوا لك على المشروبات المتاحة، يوم زيارتنا كان فيه كركاديه وسوبيا فاختارنا الأخيرة، وكانت حلوة جدًا وسكرها مضبوط، هما عاملين في رمضان بوفيه مفتوح بـ 230 جنيه للفرد (غير شامل الخدمة 12%).

أول ما المدفع ضرب انطلقنا على البوفيه، يوم زيارتنا كان لسه أول أسبوع في رمضان وبالتالى حظنا حلو أن المكان ما كانش زحمة أوي لأن الناس بتهتم وقتها بالزيارات العائلية، البوفيه مكون من قسم الشوربة: خضار أو مشروم بالكريمة، وقسم السلاطات: بابا غنوج وخضراء وطحينة وطرشي، والمقبلات: كبيبة وسبرينج رول محشي فراخ وروزبيف وكور بطاطس مقلية، والأطباق الرئيسية كانت عبارة عن خضار سوتيه، وفراخ مسحب، ولحمة بصوص المشروم، وقطع سمك فيليه، وأرز بسمتي بالفلفل الألوان، ومكرونة فرن، والحلو: أرز باللبن (رغم أنهم كاتبين على الفيسبوك أن فيه كمان حلويات شرقية وأم علي).

الصراحة شكل الأكل كان حلو جدًا والـ Food Styling كان كويس، الشيفات اللي كانوا واقفين في البوفيه متعاونين ووشهم بشوش، الجرسونات قمة في الذوق وما بيفوتوش تفصيلة، رغم أنه كان أوبن بوفيه لكنهم ساعدونا في توصيل الأطباق للترابيزة، وما كناش بنطلب حاجة غير لما كانت بتيجي على طول.

بداية تجربتنا كانت مع الشوربة اللي كانت للأسف باردة رغم أنها محطوطة في فخار وكان ناقصها شوية ملح، بس كانت كريمي وطعمها حلو وخفيفة، السلاطات كانت فريش وحلوة جدًا ماعدا البابا غنوج برضه كان ناقصها شوية ملح، المقبلات كانت حلوة جدًا، مقرمشة ومش مزيتة وخفيفة، كانت فكرة السبرينج رول بالروزبيف والفراخ حلوة وكان طعمها متوازن، كور البطاطس عبارة عن بيوريه بطاطس طري من جوه ومقلية من بره، هى كانت طرية شوية من بره مش مقرمشة بس طعمها كان حلو، الكبيبة كانت رائعة ومثالية كحشو أو كطبقة خارجية، والسمبوسة كان فيها لحسة لحمة مفرومة بس كانت هشة وخفيفة ومش مزيتة.

نخش بقى على التقيل، الأطباق الرئيسية، جايزة أحسن صنف في البوفيه كانت من نصيب اللحمة بصوص المشروم، رائعة، اللحمة طرية وسهلة التقطيع، متبلة ومستوية كويس وصوص المشروم كان متوازن وطعمها واضح، الفراخ المسحب برضه كانت كويسة ومستوية تمام، المكرونة الفرن باللحمة المفرومة كانت ألدينتي Al dente (يعنى نصف مستوية وبتبقى بتعض شوية ودى الطريقة الرسمية الصح في التسوية في المطبخ الإيطالى ده غير أن قيمتها الغذائية بتبقى أفضل)، كان نفسنا بس البشاميل يكون أكتر شوية لكن طعمها كان كويس، الأرز والسوتيه كانوا حلوين وخاصة السوتيه اللي ما كانش مهرى أوي ولا بيقرمش، وأخيرًا السمك برضه كان تسويته كويسة ومقرمش خفيف من بره. 

اللي كان بالنسبة لنا محبط شوية أنهم كانوا كاتبين المنيو فيه أرز باللبن أو أم على مع حلويات شرقية بس ما كانش فيه غير الأرز باللبن، قالوا لنا أن أم على كانت إمبارح، ومش عارفين الحلويات الشرقية بتبقى يوم إيه! الأرز باللبن كان حلو وسكره وقوامه مضبوطين بس في رأينا كان محتاج شوية مكسرات علشان يبقى الطبق متوازن من ناحية مزج القوام الطرى مع القرمشة، بس طعمها كان لطيف.

تجربتنا في أفيتشي كانت ممتعة، فريق العمل كله هناك كان مهتم بنا وبرأينا وما كناش بنطلب حاجة غير لما كانت بتيجي على طول، دايمًا في رمضان الناس تقول لك: “عمرك ما تفطر بره علشان المطاعم بتبقى غلطاتها كتير”، بس في رأينا أفيتشي من الأماكن اللي هربت من القاعدة دى، بس ربنا يقويهم لما المكان يبقى عليه ضغط.

شوفوا صفحتهم على الفيسبوك علشان تعرفوا تفاصيل أكتر.