The Definitive Guide to Living in the Capital , Cairo , Egypt

الأكلات العربية بشكل عام والخليجية بشكل خاص لها مكانة في قلوب أهالي القاهرة، وفيه مطاعم كتير موجودة متخصصة في أكلات الخليج والشام، ومن ضمن المطاعم دي مطعم “أرض الحضارة”، واللي بيقدم أكل يمني وسوري وخليجي ومصري في مكان واحد، وتقدروا تختاروا أكلتكم المفضلة من منيو قوي ومتنوع جدًا.

تعالوا نتعرف أكتر على المطعم ونحكي لكم عن تجربتنا هناك.

خلونا في البداية نعرفكم إن المطعم على نيل المنيل، وفيه ركنات كتير قدامه بسبب طبيعة المنطقة، والقعدة بتكون في الدور اللي فوق ومتاح أسانسير، ولما توصل فوق هتلاقى قاعات كتير يمين وشمال وفيه منها أوبن بوفيه، منها قاعات مغلقة مخصصة للمنتقبات واللي بيحبوا الخصوصية في الأكل، وآخر الطرقة القاعة الكبرى اللي فيها فيو النيل واللي للأسف الديكور والتصميم مش مستغله صح، وده مخلي جزء صغير واضح فيه النيل وباقي المكان لأ.

كنا عاوزين نقعد على النيل وانتظرنا 20 دقيقة ولكن معرفناش نقعد واضطرينا نقعد في ترابيزة بعيدة عن فيو النيل، لحد ما ترابيزة فضيت على النيل، والمفروض إننا كنا الاسم الأول في قائمة الانتظار، ولكن فريق العمل منقلناش للترابيزة، وقعدوا ناس تانية عليها! وفي المجمل كان أسوأ حاجة في المكان فريق العمل اللي صعب تلاقيه بسهولة لما تحتاجه، ومافيش تنظيم، وعدد الترابيزات والأفراد أكبر من إمكانياتهم.

لكن بعيدًا عن فترة الإنتظار الطويلة الأكل نزل بسرعة وبشكل جميل.

كمان حصل معانا موقف مش لطيف بعد ما طلبنا مشروبات ومنتظرين نطلب الحلو، مدير المكان طلب مننا أنه ينقلنا علشان فيه ناس عاوزة تقعد، على الرغم من أن إحنا نفسنا انتظرنا كتير وماعرفناش نقعد غير بعد 20 دقيقة وكمان في فيو ماكناش حابينه!

نيجي للأكل..

بدأنا طلبنا بسلاطة خضراء وسعرها 20 جنيه، وبنقترح عليهم يكون فيه سلاطة خضراء على الطريقة المصرية علشان بعض الناس اللي مابتحبش الطريقة اليمنية.

كمان طلبنا سلاطة طحينة بـ20 جنيه، وكانت حلوة وتستاهل تتاكل حاف، وطلبنا ملوح دبل بـ18 جنيه، وهو عبارة عن عيش بالطريقة اليمنية وشبيه للفطير المشلتت بتاعنا ولكن على خفيف، وده لوحده لو مش أكيل ماتطلبوش.

قررنا نطلب أكل يمني رغم خوفنا أنه مايعجبناش، وطلبنا “فسحة أرض الحضارة غنمي” بـ140 جنيه، وهي مقبلات وهي عبارة عن لحم جدي متسوي على درجة حرارة عالية  بالطريقة اليمنية داخل طاجن مخصوص اسمه “حرضة”، وفيه بهارات ومرقة مميزة، وممكن تطلبوه بحلبة أو من غيرها زينا، وطعمه كان حلو وكان أول حاجة تعجبنا من طلبنا رغم أنه يعتبر مجرد سناكس، وعيبها أنها جت سبايسي رغم إننا ماطلبنهوش سبايسي ولكن كان شغال.

وكمان طلبنا عقدة لحم غنمي ناشف وسعرها 140 جنيه وهي عبارة عن لحم صغار الجدي ومتبلة بطريقة يمنية ومعمولة كأنها “كوز” لحمة، وفيها فلفل وبهارات مش هتقدروا تقاوموها وهتشدكم تاكلوها لحد آخر قطعة، وكمان طلبنا لحم مندي بسعر 130 جنيه، وهو حقيقي مهين لقواعد الاتيكيت لأنكم لازم تنسوا أي حاجة قدامه وتاكلوه وتفصصوه بايديكم علشان تحسوا بمتعته وهو بيدوب بين ايديكم والعضم بيتزحلق من مكانه وكان طعم ولذيذ ومميز.

ده غير كمان مشكل الفرن اللي كان سعره 40 جنيه وهو عبارة عن طاجن خضار مشكل بالصوص اليمني وتحسوه أكل صحي كده في نفسه ولكن تسويته في الطاجن المميز خلى طعمه مميز وجميل.

في النهاية طلبنا قهوة وكان سعرها 20 جنيه وللأسف ماكنتش أحسن حاجة بالنسبة لينا لأن سقف توقعاتنا كان أعلى، وكمان شربنا شاي عادي مافيهوش أي افتكاسة، وماعرفناش ندوق الحلو لأنهم طلبوا مننا نسيب الترابيزة زي ما قلنا في أول الموضوع، وفي مجمل التجربة كانت جميلة ومميزة بعيدًا عن الخدمة اللي بنتمنى لما نروح نجرب المكان تاني، التجربة تكون أحسن بكتير من دلوقتي.

علشان تعرفوا أكتر عنهم زوروا صفحتهم على الفيسبوك من هنا.