The Definitive Guide to Living in the Capital , Cairo , Egypt

اقرأ المقال بالإنجليزية من هنا

الخروج للإفطار في رمضان ممكن يكون تجربة مرهقة، زحمة في كل حتة، انتظار طويل، والأسوأ إنك تخرج لسه جعان! وهنا بييجي دور “بابوز إييتس” واحد من الأماكن اللي الناس مابتبطلش تتكلم عنها من السنة اللي فاتت. ووسط الضجة اللي عاملها على السوشيال ميديا، قررنا نروّح ونجرب بنفسنا.. يا ترى بابوز يستاهل كل الكلام ده؟

بابوز بياخدك في تجربة شرقية من اللحظة اللي بتدخل فيها. المكان مليان تفاصيل عربية تخليك تحس إنك في حكاية شرقية، من الديكورات التقليدية للركن المخصص للمجالس العربية، لدرجة إن كل زاوية فيه تنفع تبقى صورة حلوة لإنستجرام. الجدران مزينة بورق منيو مكتوب بالعربي، جنب لوحات فنية وزهور بتكمل الأجواء. وحتى الموسيقى كانت هادية وبتكمّل التجربة من غير ما تزعجك.

بسعر 2000 جنيه للفرد، بابّوز بيقدم منيو إفطار متكامل بكمية أكل مابتخلصش. البداية كانت مع مجموعة من المقبلات، السلطات، والشوربة.

المقبلات شملت حمص، لبنة، فاصوليا حمراء، فاصوليا صفراء، طحينة، ومخللات. أما السلطات فكانت من أول السلطة البلدي التقليدية لحد سلطة العدس. والمفاجأة الحقيقية كانت الشوربة.. جرجير ولوز! تركيبة غريبة لكن الطعم كان مختلف ومميز جدًا.

اللي بيميز بابوز هو إنه بيحافظ على روح الأكلات التقليدية، لكن بلمسات مبتكرة. زي مثلًا سلطة العدس اللي كانت خليط متوازن بين العدس المطبوخ مع اللوز والجبنة القريش والخضرة، وده خلاها غنية بالطعم والقوام. أما شوربة الجرجير واللوز فكانت كريمي بطعم فريد.. اللوز كان بيضيف قرمشة حلوة والجرجير مدّيها نكهة مميزة.

الأطباق الرئيسية: أكل بيحضّنك!

طبق اليوم كان صدر البط مع الفريك، متغطي بصوص كريمي حامض شوية. البط كان طري ومستوي بالمظبوط، والفريك كان متبل بشكل متوازن، حاجة مش بنشوفها كتير في المطاعم. من الحاجات اللي شدت انتباهنا كمان فتة الباذنجان، اللي كانت مغطاة بالزبادي ومزينة بلمسة جليز البلسميك، مع إضافة خفيفة للبنة اللي خلتها أغنى وأطعم من الفتة التقليدية.

ومش بس كده، بابوز قدم مجموعة من الأطباق الرمضانية اللي كلنا بنحبها، زي المحشي، الملوخية، الأرز، الشيش طاووق، وكباب الحلة، وكل حاجة كانت معمولة بإتقان يخلّيها تحسسك إنك بتاكل في البيت.

من أكبر المشاكل اللي بنواجهها مع الحلويات إن معظمها بيكون مسكر بزيادة.. بس بابّوز قدر يظبط المعادلة. الحلويات اللي جربناها كانت كنافة بالتمر، حلاوة الجبن، والمهلبية، وكل حاجة كان السكر فيها مضبوط. حلاوة الجبن بالذات كانت مفاجأة جميلة—عجينة سيمولينا مع جبنة ومحشية بالقشطة، طعمها كريمي وتحسها بتسيح في بُقّك، وبصراحة كانت أحلى ختام للتجربة.

الخلاصة: يستاهل الضجة ولا لأ؟

الإجابة ببساطة: أيوة وبجدارة!، الأكل كان رائع، الكميات سخية، والخدمة على أعلى مستوى. الجرسونات كانوا متعاونين جدًا وكل طبق كان بيوصل في التوقيت المناسب. سواء كنت رايح علشان تعيش الأجواء أو تدلع نفسك بأكلة دسمة، بابوز إييتس مكان مايتفوتش في رمضان!