-
84 شارع الميرغني
-
مصري
-
-
10 صباحاً - 2 صباحاً -
Waleed Abuarab
حاولنا تكون تجربتنا في «أبو شقرة» من غير أي انطباعات مسبقة، الاسم الرنان
والسمعة الممتازة ممكن تأثر على أي حد داخل المطعم بالسلب أو الإيجاب، يعني ممكن
حالة الانبهار تعميك عن أنك تلاحظ أي عيوب بالمكان، أو ممكن يكون سقف توقعاتك عالي
جدًا وتحبط بمجرد ما تلاقي أي عيب صغير في التجربة كلها. كنا حيادين ودخلنا فرع
مصر الجديدة نجرب المطعم صاحب التاريخ العريق في عالم المشويات، الفرع موجود في شارع
الميرغني بالقرب من كلية البنات، مكون من طابقين وسهل جدًا أنك تشوفه من مسافة
بعيدة لأن المحل كبير وواخد زاوية مميزة من الشارع.
المطعم فخم جدًا من الداخل، الموظفين كلهم بالملابس الرسمية الكاملة، وممكن
جدًا ما تلاقيش مكان لو رحت وما كانش فيه حجز قبلها. الديكور كلاسيكي لكن باين عليه
الحداثة والعناية الشديدة، كل الجدران والمقاعد باللون الأزرق الفاتح والمساحات
واسعة والمكان منمق جدًا وهـ تحس أن المقصود هو إعطاء الزوار إحساس بالكمال من
خلال الاهتمام بكل التفاصيل من أول الديكور لحد أسلوب الخدمة.
المنيو مش زي أي مطعم مشويات أو كباب وكفتة عادي، لأن مافيش طلبات بالكيلو،
إنما كل الطلبات عبارة عن أطباق رئيسية من اللحوم والطيور ووجبات خاصة. واستغربنا
لما لاقينا المقبلات فيها ساندويتشات شاورمة (22 جنيه) بجانب السمبوسك والكبيبة.
كل أنواع الشوربات موجودة بأسعار من 10 لـ 17 جنيه، شوربة السي فوود بس بـ 23
جنيه. أي نوع سلاطة بـ 7 جنيه، ماعدا السيزر والجرجير بالمشروم بـ 14 جنيه. وفيه
أطباق جانبية ومكرونات وطواجن لحوم وخضروات وملوخية وبامية ورقاق باللحم . وقائمة
خاصة بالمأكولات البحرية فيها أطباق سمك قشر بياض وجمبري بالصوصات المختلفة وطاجن
الكاليماري بأسعار من 55 لـ 67 جنيه.
حبينا نشوف إزاي الشاورمة بـ تبقى مقبلات وطلبنا طبق شاورمة الدجاج (22
جنيه) وجاء لنا زي ساندويتش في عيش سوري مقطع حلقات مع البطاطس المحمرة والخيار
المخلل وكان فكرة ظريفة لفتح الشهية رغم كميته القليلة، وبعدها جاء لنا أطباق سلاطة
خضراء وطحينة. تقريبًا دي أحلى سلاطة بلدي أكلناها في حياتنا، مززة وخضرواتها طازجة، والطحينة كمان خطيرة وقوامها مثالي. طبعًا خلصنا كل المشهيات قبل ما الأطباق
الرئيسية تنزل وطلبنا غيرها. الفكرة أن الطلب أخذ وقت كثير وكنا بدأنا نزهق
ونجوع قوي. فين وفين لما ظهر طبق برسيون المشويات المشكلة الـ (أكسترا) زي ما مكتوب
في المنيو لأن فيه قطع شيش طاووق زيادة على الكباب والكفتة، ومعاه خضار سوتيه
وبطاطس محمرة (65 جنيه) وطبق النصف دجاجة المشوية على الشيش (29 جنيه). مافيش
كلام؛ أحلى طعم مشويات ممكن تجربه في حياتك، كباب أو كفتة أو طاووق أو دجاج مشوي! «أبو
شقرة» ما اكتسبش سمعته من فراغ، الصنعة هنا مالهاش حل، والطعم هو الأجمل رغم
الكميات القليلة في الأطباق.
وعلشان كده طلبنا طبق فتة سادة بالطماطم والخل والثوم (11 جنيه) جنب أطباق
اللحوم، مع شوية مزات زي ورق العنب (12 جنيه) والأرز البسمتي بالكبدة والمكسرات
(16 جنيه). أقل ما يقال عن الأكل أنه كان رائع، الأسعار غالية شوية بس بـ تحس أنك
استمتعت بالأكل ومش ندمان على أي جنيه دفعته. فيه حلويات شرقية وفواكة الموسم وآيس
كريم ووجبات للأطفال وفيه بلاي ستيشن ومكان للعب الأطفال في الدور الثاني، الخدمة جيدة لكن
مش سريعة، والمكان آية في النظافة طبعًا.
دي كانت تجربتنا في فرع مصر
الجديدة من «أبو شقرة» وعرفنا بعدها لما نحب نأكل أحلى كفتة وكباب ودجاج شيش نروح
فين. حتى لو هـ ندفع أكثر شوية.
