The Definitive Guide to Living in the Capital , Cairo , Egypt

إحنا بـ نعشق “أبو رامز السوري”.. لحم كتافنا من خيره، ولنا ذكريات كثيرة مرتبطة معاه وخاصة مع ساندويتش الشاورمة بالبطاطس اللى أنفرد باختراعه فى البداية والناس قلدته، وساعات بـ تنزل علينا طفاسة وبـ نجيب الحجم الكبير منه كمان، من الآخر “أبو رامز السوري” تاريخ وتميز فى المشويات والأطباق الشامية والشاورما.

“إحنا إزاى ما كتبناش عنه مقال نقدي لغاية دلوقت؟”.. ده كان اكتشاف كالصاعقة نزل علينا ومن لحظتها أخذنا قرار أننا نكتب عنه النهارده، خاصة أنه عدل وأضاف أصناف فى المنيو وبقى عنده “وجبات” كمان.

المنيو باختصار مش طويلة.. قسم ساندويتشات، والفتة، والمناقيش، والشوربة، وأطباق أبو رامز (ودي حاجة جديدة) والسلاطات والمقبلات والمشروبات اللى بـ تقتصر على المشروبات الغازية. مافيش مكان تقعد هناك، كله معتمد على الديلفري أو تأكل أمام المحل وأنت واقف.

ساندويتش الشاورما باللحم أو الفراخ بالبطاطس (15 جنيه الحجم الصغير، والكبير بـ 17 جنيه) وهمي، بالثومية الكريمي الغنية بتاعتهم والتسوية التحفة مع أصابع البطاطس المحمرة، وعنده شاورما عربي مقطعة بـ 20 جنيه، وكمان ساندويتشات فلافل سوري (4 جنيه) وساندويتش كبيبة (7 جنيه) وبالبطاطس (8 جنيه).

الجديد بقى الوجبات فيه منها “أبو رامز ميكس” (33 جنيه) ودي فيها أرز وشاروما لحمة وفراخ ووحدة كبيبة كبيرة وطرشي وثومية مع البطاطس والعيش الشامي الصاج المخصوص بتاعهم، وجبة كبيرة تكفى شخصين، وفيه كمان وجبات شاورما فراخ أو لحم (23 جنيه)، وشاورما ميكس (24 جنيه)، وطبق كبدة (17 جنيه) وفلافل سوري (8 جنيه).

طلبنا أكبر وجبة “أبو رامز ميكس”.. وهمية، الأرز مستوي كويس والشاورمة Juicy وطعمها تحفة والثومية لا يعلى عليها، والكبيبة تحفة برضه والبطاطس كويسة، الحاجة الوحيدة اللى ضايقتنا أن الطرشي تقريبًا مش فريش، طلبنا كمان من المقبلات ورق عنب (7 جنيه) كان حلو أوى وفيه مزازة الليمون والأرز كان مستوي كويس جواه.

نيجي بقى للفتات، طلبنا فتة لحمة، الحجم بتاعها معقول وكان طعمها حلو بس كمية العيش المحمص اللى فيه بالنسبة للأرز كانت مش متوافقة خالص، العيش يكاد يكون طبقة واحدة فى آخر الطبق والطعم الأغلب كان للأرز، وبـ ينزل لك معاها علبة ثومية صغيرة علشان تضيف براحتك.

المشروبات هناك بـ 5 جنيه لأى كانز، لو هـ تشتري بنفسك مافيش خدمة ولا ضريبة، لو هـ توصل لبيتك بـ تدفع خدمة التوصيل بس.

“أبو رامز” بـ يجيب من الآخر، شاورما جامدة وأسعار لطيفة وسرعة فى استلام طلبك، حتى وأنت منتظر أنت مستمتع برائحة الشواية والشاورما.. تحيا “أبو رامز” ملك الشاورما.