The Definitive Guide to Living in the Capital , Cairo , Egypt

مطبخنا المصري غنى بالأكلات المدهشة، أبو السيد يعتبر واحد من أشهر المطاعم فى مجال تقديم أطباق مصرية لذيذة بلمسة مميزة.

بمكانه فى مول سيتى ستارز المزدحم دائمًا، “أبو السيد” يشبه فجوة زمنية، أول ما تدخله هـ ترجع لمصر في فترة الستينيات بديكوراته الفخمة والأثاث المبهر. الإضاءة الخافتة والمزيكا القديمة كلها أضافت لأجواء المكان العريقة، رحب بنا الجرسون بأدب شديد ووصلنا لترابيزتنا، وبعدها قدم لنا المنيوهات.

ممكن توصف المنيو بأي حاجة إلا أنها تكون محدودة؛ فكر فى أي طبق مصرى ممكن تتخيله أو سمعت عنه، هـ تلاقيه عندهم، بالنسبة للمقبلات، أبو السيد بـ يقدم سلاطات تقليدية، مع مزات لذيذة تشمل ورق عنب محشي (28 جنيه)، باذنجان مقلي (16 جنيه) وكبيبة (36 جنيه) مع حاجات ثانية. الحركات كلها كانت فى الأطباق الرئيسية! من ملوخية باللحم (58 جنيه)، حمام محشي (40 جنيه للحمامة)، لطاجن سى فوود (82 جنيه)، فعلًا كل اللي نفسك فيه هـ تلاقيه. منيو الحلو كانت على نفس المستوى، فيها أم على (25 جنيه)، فطير عليه اختيارك من الإضافات (32 جنيه) وأرز باللبن (25 جنيه) بجانب حاجات ثانية.

طلبنا احتاج شوية وقت لتجهيزه، لكن نظرًا لأننا طلبنا أطباق معقدة شوية، ما عندناش مشكلة. طبق شركسية الفراخ، المكون من أرز أبيض عليه فراخ وغرقان فى صوص وردي من عين الجمل كان لذيذ على الآخر. طبق الملوخية كان لذيذ (58 جنيه)، بقوامها الممتاز؛ لا هى خفيفة بزيادة ولا ثقيلة. طعم الكشرى (28 جنيه) كان متوسط، رغم أن سعره فى الحقيقة يساوى 3 أضعاف الطبيعي.

بشكل عام، أبو السيد بـ يقدم أكثر من مجرد أكل شرقي، وقدر يوفر لكل زبائنه تجربة متكاملة. الجرسونات ممتازين، الجو العام كان هائل، والأكل رغم أنه غالي شوية لكن جودته هائلة.