The Definitive Guide to Living in the Capital , Cairo , Egypt

الوسط الأكيل الراقي في القاهرة ممكن يكون قاسي شوية في حالة أنك تقارن الأكل مع السعر؛ صحيح عندنا عدد كبير من المطاعم الكويسة منتشرة في العاصمة، لكن في آخر أكلتك بـ تتصدم بالشيك الكبير، الموضوع ده يعتبر مشكلة خصوصًا في آخر الشهر، لما المرتب شبه بـ يختفي، ساعتها.. المعايير كمان تقريبًا تختفي.

أصحاب فكرة كوبا كابانا قرروا يفتحوا مطعم جديد في المعادي وهو "آى ميكس – I Mix"، مع منيو معظمها أطباق عالمية تقليدية، أول حاجة هـ تلاحظها أنهم أرخص من منافسينهم بشكل واضح.

لازم نقول أن آي ميكس قائم على توصيل الطبات وبس، وهي فكرة بـ تشهد إقبال من المستثمرين في عالم الأكل في مصر، ويعتبر بديل أرخص من مطعمهم الشقيق.

بعد نظرة سريعة، طلبنا سيزار سلاد (18.99 جنيه)، مع والدورف سلاد (18.99 جنيه)، وبيف سكالوب (39.99 جنيه) وتشيكن بانيه (32.99 جنيه) وطلب جانبي من البطاطس المحمرة (8.99 جنيه). الأكل وصل بعد وقت معقول وكان ساخن لدرجة مرضية.

السلاطات كانت معبئة في علب بلاستيك والدريسنج كان في علبة لوحده. السيزار سلاد كانت تقليدية بالخس وقطع العيش المحمص، لكن مع إضافة الزيتون اللي كان طعمه طاغي على أي حاجة ثانية، بما فيهم الكمية القليلة من الخس.

المشكلة أن حتى الوالدورف سلاد ما قدرتش تنقذ الموقف، مع الخس، الجرجير، التفاح، الأناناس، الكريز، الزبيب والبندق، اختيارنا السلاطة دي كان لتجربة دريسينج الخل مع زيت الزيتون، لكن الغريب أن الدريسنج اللي وصل كان كاتشب ومايونيز، وطبعًا طعمه مختلف تماماً عن السلاطة. من غير الدريسينج، طعم السلاطة كان مسكّر جدًا.

طيب، كده اتفقنا أن السلاطة كانت محبطة نوعًا ما، لكن لحسن الحظ الأطباق الرئيسية كانت أحسن شوية.

البيف سكالوب كان مستوي كويس، لكن طعمه مش مميز، أما المكرونة بالصلصة فمشكلتها كانت في الصوص رغم أنها كان فيها ريحان.

نروح على التشيكن بانيه اللي كان تحفة فنية، معاه أرز بسمتي أبيض، خضار سوتيه  يشمل مشروم طازج متشوح بالزبدة وصوص كريمة ليمون. الفراخ نفسها كانت متسوّية صح، ومقلية كويس بحيث قدرت تحافظ على قرمشتها، وكمان غنية بنكهات متنوعة، فوق كل ده، كمية الأكل كانت كبيرة، خصوصًا لو أخذنا في الاعتبار الأسعار المعقولة جدًا.

صحيح الأكل عند آي ميكس مش واو، لكنك أكيد هـ تنبهر من ناحية الأسعار والكميات، سجل تليفوناتهم عندك علشان أوقات الأزمات المالية.