The Definitive Guide to Living in the Capital , Cairo , Egypt

في المقال ده هنقدم 10 أغاني حزينة يُفضل بلاش يتسمعوا وأنت متضايق أو زعلان. حاولنا على قد ما نقدر نخلي الأغاني تبقى مختلفة ومتنوعة من حيث وقت إنتاجها ومن حيث الشكل. ومن حسن الحظ أن الموسيقى العربية عاطفية بطبيعتها وأقرب للحزن، وده خلى الاختيارات تبقى كتيرة وجيدة. ونقدر نقول بكل ثقة أن مقام الكُرد كان سيد الموقف.

وافتكرت

محمد حماقي قدم أغنية وافتكرت في 2008 علشان تبقى الـ Hit لألبوم ناويها. حماقي راهن على الأغنية ونجحت نجاح رهيب، يمكن مستمر لحد دلوقتي من وقت صدور الألبوم. الملفت في الأغنية أنها بسيطة جدًا من ناحية الكلمات واللحن والتوزيع، اللي معتمد طول الوقت تقريبًا على الجيتارات بس. لكن الأغنية قدرت تجسد الحزن والفراق بطريقة رائعة رغم بساطتها من خلال دفقة شعورية صادقة تمامًا في كل عناصر الأغنية.

بحبك أوي

في أول ألبوم ليها قدمت شيرين أغنية بحبك أوي وكانت من كلمات أيمن بهجت قمر ونفتكر له في الأغنية دي وخاصة لما قال (أنا عايشة مرة واحدة زي أي واحدة نفسي أحس بأمان.. ما أبنيش أحلام في بالي تكسرها الليالي) وقدر يجسد مشاعر البنت ويتكلم من خلال وجهة نظرها. الملحن الكبير وليد سعد استغل كل إمكانيات مقام الكرد كمقام عاطفي بالدرجة الأولى، يقدر من خلال يوصل كل أحاسيسه ورؤيته.

خلص تارك

أغنية خلص تارك كانت بداية انطلاقة للمطرب التونسي الكبير صابر الرباعي، وكانت جواز السفر اللي عبر من خلاله للجمهور المصري والعربي. الأغنية ما هي إلا معالجة أو رؤية جديدة على نفس التيمة بتاعة (عذبني وأنا هستحمل علشان بحبك) ويمكن الأغنية ترجمة أو إعادة معالجة لأغنية قديمة جدًا لعبد الوهاب ومشهورة جدًا بتقول (مين عذبك بتخلصه مني) يمكن علشان صابر الرباعي من أكبر المعجبين بعبد الوهاب. الأغنية حققت نجاح باهر وقت عرضها في 2004 ولحد دلوقتي تعتبر من أفضل أغاني صابر الرباعي، رغم مشواره الطويل الممتد المستمر لحد دلوقتي، لكن البدايات دايمًا بيبقى لها طعم تاني وبتبقى أحلى.

كلمة أحب

الملحن المتميز الموهوب تامر عاشور قدم أغاني كتير عن الفراق والحزن. لكن في أغنية كلمة أحب قدم تجربة مختلفة من حيث المحتوى. وده ظهر في لحن مختلف، فيه تتابعات نغمية جديدة على المستمع العربي. وخاصة في جزء الكريشندو عند ( يهمني الحاضر) تامر عاشور من أهم الملحنين في مصر حاليًا. ونتمنى دايمًا أنه يقدم لنا ألحان ممتازة تليق بموهبته.

مشيت خلاص

المطرب اللبناني وائل جسار احتل الإذاعات العربية كذا سنة بأغانيه اللي بتكسر الدنيا. ومن أهم أغانيه كانت أغنية مشيت خلاص. الأغنية حققت نجاح رهيب. وكتير من المطربين أعلنوا أنهم اتمنوا يغنوا الأغنية دي زي مدحت صالح وهشام عباس وهاني شاكر. ويمكن الناس لسه فاكراها لحد دلوقتي. ومن الجدير بالذكر أن وائل جسار في بداياته كان بيقلد المطرب الكبير جورج وسوف من كتر تأثره بيه، لكنه بعد فترة عرف طريقه وخرج من إطار التقليد.

تقدر تتكلم

عمرو دياب في ألبوم أنا عايش قدم أغنية تقدر تتكلم اللي كسرت الدنيا. ومن وقتها وكل المطربين اتأثروا بيها وحاولوا يعملوا زيها سواء قاصدين أو لأ. واتجه كل المطربين ناحية التوزيع بآلات بسيطة، والكمنجات بتقول جملة في الخلفية وبترد على الغُنا. وده ماكنش موجود قبلها.

صفحة وطويتا

أغنية صفحة وطويتا كان توقيتها ممتاز. بعد تراجع أسهم وائل كفوري وانحساره بسبب انشغاله في مشاريع تانية غير فنية، أثرت على اختياراته وعلى وجوده في الساحة بشكل عام. وكتير من الجمهور والنقاد قالوا أن وائل انتهى. أغنية صفحة وطويتا فيها جملة لحنية حلوة، وقدر وائل ينقل الإحساس ويزيد عليه. كلمات الأغنية لمنير أبو عساف وألحان بلال الزين.

مش همنعك

آمال ماهر عرفت سكتها أخيرًا وبعدت عن الأغاني القديمة، وبدأت تعمل لنفسها طريق بداية من ألبوم أعرف منين. اللي قدمت فيه أغاني ممتازة. في أغنية مش همنعك قدرت تجسد الأحاسيس اللي كتبها محمد تاج ولحنها رامي جمال. من خلال مساحة صوتها الواسعة وأداءها الرائع والمختلف.

شو بيشبهك تشرين

المطرب اللبناني الكبير معين شريف اسمه مش معروف أوي في مصر. وحتى شهرته اتأخرت في لبنان لظروف كتير مر بيها. لكنه يمتلك صوت قوي وقدير ومش موجود زيه كتير. نقدر نتعرف أكتر على معين شريف من خلال أغنيته الجميلة أصعب كلمة أو شو بيشبهك تشرين. هنلاحظ هنا أن الكلمات نفسها مختلفة عن السائد (للشاعر نزار فرنسيس) والملحن اللبناني رواد رعد قدم لحن يليق بصوت معين. عامة صوت معين شريف يعتبره أي ملحن هدية يقدر يقدم من خلاله كل اللي هو عايزه.

ما بتعلمش

في أغنية ما بتعلمش أضافت أنغام كتير من إحساسها وخبرتها للحن الجميل لخالد عز. أضافت الكتير من إحساسها وخبرتها. روح أنغام المتوثبة القلقة، اللي محتاجة دايمًا تضيف وتقدم جديد بتخليها حريصة جدًا في اختياراتها. وده بنلاحظه كل مرة في أي ألبوم جديد ليها.