The Definitive Guide to Living in the Capital , Cairo , Egypt

حسام حبيب بدأ حياته الفنية كملحن. قدم أغاني كثير متميزة، وكان أولها عايشالك لإليسا وآخرها معاك قلبي لعمرو دياب. ألبوم فرَق كتير صدر بعد فترة غياب 8 سنين.

عمل أغاني مخصوص للأفراح حاجة كويسة من ناحية التسويق والدعاية. لكن هنا أغلب الأغاني معمولة علشان تشتغل في الأفراح. وبكده صناع الألبوم بيحكموا عليه بالموت السريع. لأن الأغاني هتعيش فترة قصيرة وهتختفي لحد لما تطلع أغاني جديدة. وده منطق استهلاكي مش فني.

نقطة القوة في الألبوم الإنتاج الجيد اللي واضح في كل التفاصيل، بداية من الدعاية القوية ولحد العازفين الأجانب وهندسة الصوت والـ Mastering والاهتمام بالتوزيع بشكل عام واضح في الألبوم كله. على حساب الألحان والكلمات.

واضح إن حسام حبيب عارف نقطة قوته، واختار أغنية فرق كتير عشان تبقى في الأول. لحن حسام حبيب وتوزيع النابلسي كانوا أجمل بكتير من كلمات أيمن بهجت قمر على عكس المتوقع. وغالبًا الكلام اتكتب على اللحن. وجمال المزيكا شجع حسام أنه يعمل نسخة تانية من الأغنية بالجيتار بس في نهاية الالبوم.

أي ملحن هو أحسن واحد يغني اللحن بتاعه. لكن في أغنية كل ما اغني شيرين كانت أفضل بكتير من حسام حبيب ملحن الأغنية. عملت إضافاتها البسيطة فرقت كتير مع احساس اللي بيسمع. وكان ذكاء منها أنها ماتفوتش فرصة غناء جملة لحنية ممتازة زي دي.

ذكاء من شيرين عبد الوهاب أنها ماتضيعش فرصة غناء جملة حلوة في أغنية كل ما أغني مع حسام حبيب حتى لو الدويتو. واضح الفرق في الصوت والإحساس بين حسام وشيرين والفرق لصالحها. اللحن لايق على صوت شيرين أكثر.

الشاعر أمير طعيمة كان في أفضل حالاته خلال الموسم في أغنية تعيشي معايا. ويحسب له تعبير (دواير عايشة طول عمرك تلفّيها) لحن إيهاب عبد الواحد قوي ومعبّر عن الحالة. وبيوصل للقمة عند (وترجعي تاني بعد البعد ما يهدّك) أداء حسام حبيب المفروض كان يبقى أقوى من كده. وبالذات عند (ويضعف قلبي م الدمعة اللي على خدك) النزول هنا تعبير عن لحظة الضعف. كان المفروض حسام حبيب ينزل لآخر النغمة عشان يشبع إحساس الانكسار، ويستقر عن نغمة القرار. لكن أداءه كان عادي. مظبوط تقنيا لكن احساسه باهت.

الموزع النابلسي أجاد في خطوط الوتريات في الخلفية. وعند (ويضعف قلبي) جملة الوتريات بتعمل جملة صاعدة على عكس الجملة اللحنية. كأن الوتريات بتعبر عن زيادة الحب والشوق في اللحظة دي. وجملة الأكورديون في الفاصل أضافت جمال للأغنية.

أغنية في كلام محاولة لاستعادة أمجاد التسعينات. الموزع توما أصرّ على استخدام المقسوم بقوة. وتقريبا الأغنية من البداية معمولة كأغنية تسعيناتي بداية من الكلام.

ايهاب عبد الواحد وتوما عملوا نفس أغنية هو حبيبي قبل كده لمحمد حماقي في الألبوم اللي قبل اللي فات. وكانت من كلمات أيمن بهجت قمر. وعشان كده الشاعر محمد سرحان قرب كتير من منطقة أيمن في طريقة تركيبه للكلمات واستخدام نفس القاموس.

مقدمة جيدة لحسام حبيب وللوتريات لأغنية رُحتله. كلمة (في انصاص الليالي) تقيلة جدا على السمع ومبتذلة إلى حد كبير. واللحن نفسه قريب جدا من أغنية يا ليالي روحيله لشيرين. أجمل ما في الأغنية جملة الفاصل بالكمنجات والقانون.

أغنية خليني معاك مثال ممتاز على أغاني الأفراح. عنوان مستهلك جدًا. كلمات مكررة. ايقاع هادي ثابت مش بيتغير. ولحن أقل من العادي. الحاجة الكويسة هي جملة الساكسفون في الفاصل.

إيهاب عبد الواحد له نصيب الأسد في الألبوم. ومقدم لحن رائع كمان في أغنية هانساه. لحن جميل رغم بساطته، والأهم إنه مناسب تماما لصوت حسام حبيب على عكس أغاني كتير. الموزع حسن الشافعي عمل جملة فاصل جيدة، وكان موفق في اختيار الايقاع. استخدام الآلات النحاسية في جملة الفاصل جديد تماما. كلمات عبد الحميد الحباك جيدة. الدراما اللي فيها جاية من الحوار والشد والجذب بين الطرفين. لحد ما بتوصل لنقطة النهاية، لما يقرر ينسى تماما.

عودة مرة تانية لأغاني الأفراح في أغنية شايف نفسي فيك. وكالعادة منطق الاستسهال واضح. مفيش أي ابداع في عناصر الأغنية. مجرد أغنية Slow هتتنسى بسرعة.

الشاعر محمد سرحان بيأكد على موهبته في أغنية إوعي. جسّد حالة اللهفة وعدم الرغبة في الفراق. لحن إيهاب عبد الواحد جيد جدًا. لكن أداء حسام حبيب ضيع كثير من جمال اللحن بأداءه العادي. جملة الفاصل جيدة وتحسب لتوما. لكن مش مفهوم وجود موزع وتريات بس (سعيد كمال) مع توما كموزع رئيسي للعمل.

ملحوظة: الأغنية دي تنفع تبقى أغنية Slow تشتغل في الأفراح برضه.