“شاف الأيام” وعمل حاجة “أحلى وأحلى”..فيستاهل يبقى “معدي الناس”!
Cairo 360
كتب: محمود حافظ
زي ما عادل إمام بيلقبوه بـ(الزعيم) من ساعة ما عمل مسرحية الزعيم، وزي ما الراحل محمود عبد العزيز لقبه (الـساحر) من بعد الفيلم، مش غريب أننا نتفق أن عمرو دياب (معدي الناس) تمام زي ما اتسمى ألبومه الأخير!
حقيقي، مهما اختلفنا على جودة فنه، ومهما اتهمناه بالتقليد أو التكرار، هيفضل في مجاله ميجا ستار وهضبة ومعدي الناس! الأرقام هي اللي بتقول مش إحنا! لو اتكلمنا على الألبوم الحالي فهو بالفعل متصدر الآي تيونز في دول عربية كتير بعد أول كام ساعة من عرضه، والأسطوانة الأصلية نزلت السوق يوم 15/8 بسعر 50 جنيه بزيادة 5 جنيه عن (أحلى وأحلى) اللي قبلها، وبرضه بقت رقم 1 في (فيرجن ميجاستور) بعد أول يوم بس!
ولو اتكلمنا في العموم، الأرقام برضه بتقول أن دياب هو تاني أغنى مطرب عربي – بعد هيفاء وهبي – بثروة وصلت 42 مليون دولار حسب تقرير ذا أربيان بيزنس، وحتى بخلاف الثروة عمرو هو أول مطرب عربي يدخل موسوعة جينيس، لأنه عربيًا حصل على أكتر عدد من جوايز الموسيقى العالمية واللي تدل مباشرة على المبيعات العالية جدًا لألبوماته.
يعني مافيش شك أنه بقى أيقونة بصريًا وفنيًا، بصريًا لأنه محافظ على شكله ومظهره وتجديده في ستايل لبسه، غير مدخن ورياضي بامتياز، وفنيًا بكل النجاح اللي أثبتناه بالأرقام، ودلوقت نشوف إيه الجديد في (معدي الناس) اللي بيتضمن 10 أغاني، وأتعمل له حملة دعائية قوية مع بيبسي وفودافون، كمان هو تاني ألبوم من إنتاج شركة عمرو دياب (ناي فور ميديا)، هنعلق على الأغاني اللي فيها ملاحظات بس.
1- يا أجمل عيون..كلمات تركي آل شيخ وألحان عمرو مصطفى
نبدأ بأكتر أغنية أثارت جدل الفترة اللي فاتت، مش علشان عمرو مصطفى ملحنها بعد غياب كبير عن عمرو دياب، لكن عشان كلامها اللي خلى الفيس بوك كله يتكلم على الأبراج، لمجرد أن عمرو غنى (والله لحبك موت وأحب برج الحوت).. طب أشمعنى الحوت؟! السؤال ده فكر الناس بإشاعة جواز عمرو ودينا الشربيني، وده لأن دينا فعلًا مواليد 17 مارس برج الحوت! اللي شعلل الموضوع أكتر أن دينا نزلت بوست بتسأل فيه الجمهور عن ألبوم عمرو مع قلب!
دينا قالت إن الحساب اللي نشر البوست مزيف! لكن عمرو مصطفى نفسه حسم الموضوع لما قال أنه بيهدي الأغنية لمراته اللي مواليد البرج المذكور! وعمومًا الأغنية مميزة بكلامها عن الأبراج، يمكن لأول مرة في تاريخه يغازل عمرو حبيبته ببرجها!
2- نغمة الحرمان.. كلمات أيمن بهجت قمر وألحان محمد يحيي
أغنية تانية منتظرة بشدة، لأنها أول أغنية بيرجع بيها أيمن قمر بعد غياب 5 سنين عن عمرو وكأنها (نغمة حرمان) فعلًا للشغل بينهم، اللي ياما كانت نتايجه عظيمة في 24 أغنية منها (لو كان يرضيك) و(يهمك في إيه) وغيرهم، والأغنية الجديدة مبهجة رغم كلامها اللي كله عتاب وهجر.
3- أول كل حاجة…كلمات أحمد المالكي وألحان عمرو دياب وسامح كريم.
أغنية كلها شجن، عن الحب الأول وصعوبة نسيانه، مميزة فعلًا وشكلها هتكون من علامات دياب.
4- جنب حبيبي… كلمات أسامة مصطفى وألحان سامر أبو طالب.
أغنية معتادة لكنها نالت شوية تريقة في السوشيال ميديا بسبب تكرار كلمة (حبيبي) 3 مرات ورا بعض في كل كوبليه!
5- قلبي اتمناه…كلمات تامر حسين وألحان عمرو مصطفى.
برضه مافيهاش جديد، غير أنها بألحان عمرو مصطفى تاني بعد الغياب.
6- حبايب إيه… كلمات تامر حسين وألحان مدين
الأغنية الحزينة التانية، وموضوع حساس برضه هو فتور العاطفة بين الأحبة.
اللي فات هو اللي لفت نظرنا في الألبوم، باقي الأغاني نقدر نقول عليها عادية، وهي:
7- آه حبيبي…كلمات هاني رجب وألحان مديح محسن
8 – قمر إيه…كلمات أسامة مصطفى وألحان سامر أبو طالب
9- أحلى حاجة..كلمات تركي آل شيخ وألحان عمرو دياب
10- معدي الناس..كلمات أسامة مصطفى وألحان سامر أبو طالب
هل الألبوم في نظركم هيفرق مع عمرو في مشواره ويعلم؟! ده بقى اللي هنكتشفه في الأيام الجاية.
مقترح
معالم وسياحة
أشهر المساجد التاريخية في القاهرة.. معالم مذهلة بتحكي تاريخ عريق
أشهر مساجد القاهرة أقدم مساجد مصر +5
مطاعم
