The Definitive Guide to Living in the Capital , Cairo , Egypt

الفن معبر صادق جدًا عن ثقافة الشعوب، لكن للأسف في وسط الانفتاح المعلوماتي الرهيب بتضيع ملامح الثقافة الأصلية وسط حاجات تانية كتير بقى وجودها أكبر وانتشارها أوسع، لكن بتفضل عندنا كلنا روح صاحية بتحن لكل ما هو يمثلنا ويمثل أصولنا بجد، ويحكي هموم وانفعالات وعادات آباءنا وأجدادنا، والحنين ده بيظهر علينا أوي أول ما نعرف عن حد بيقدم لنا أي لمحة من لمحات الأصالة.

هنسرد هنا معاكم سريعًا أسماء بعض الفرق الفنية اللي بتقدم أصناف مختلفة من الفنون الشعبية، اللي كل صنف منها بيعبر عن جزء أصيل من ثقافتنا، ونوريكم كمان شوية فيديوهات مصورة من عروض سابقة ليهم، وإزاي تتابعوهم أو تقدروا تحضروا فعالياتهم..

والبداية هتكون من فن الجنوب مع فرقة "بيبة" اللي بتقدم الفن الغنائي الصعيدي الغني جدًا بموضوعاته واللي ليه طابع نغم موسيقي ما تغلطش فيه الودن!
ودي أغنية "بيبة" ليهم من حفل سابق في ساقية الصاوي..
شوف الفيديو من هنا

ونبعد شوية كمان لأقصى الجنوب مع فرقة "نوبة نور" اللي بيقدموا الفن النوبي الصافي، اللي تحس أن روح ناسه الحلوة بقت جزء لا يتجزأ منه وهي اللي مدياه الطابع الجميل ده.. ممكن تتفرج على العرض ده من دار الأوبرا المصرية وأنت تفهم قصدنا..
شوف الفيديو من هنا

ونرجع مرة واحدة من أقصى الجنوب لأقصى الشمال ونروح لفرقة "الطنبورة" البورسعيدية اللي بتقدم الفن السواحلي اللي بيتميز بحركيته الشديدة في ألحانه وكلماته وحتى طريقة الأداء فيه، اتفرجلهم على أغنية "يا لالي" من حفلة سابقة ليهم على مسرح الضمة..
شوف الفيديو من هنا
 

وأكيد موضوع زي ده ما ينفعش يخلص من غير ماتيجي سيرة عروض التنورة اللي بتتقدم بشكل دوري ثابت على مسرح وكالة الغوري في منطقة الأزهر والحسين..
اتفرج على الفيديو ده وسيب روحك ترقص على رقصهم..
شوف الفيديو من هنا

وبعد نقلات مكانية كتيرة بين الشمال والجنوب خلونا المرة دي ننتقل نقلة زمانية ونرجع بالعداد الزمني لورا شوية وإحنا بنتفرج على فرقة "مزاهر" اللي بتقدم فن الزار، واللي بيتميز بتصدر المرأة واستحواذها على كل الأدوار الأساسية فيه، شوفوا مثلًا العرض ده وهتحسوا أن الزمن فعلًا رجع بيكم لورا شويتين..
شوف الفيديو من هنا

تقدروا تعرفوا عن فعاليات جميع الفرق دي وغيرها عن طريق المتابعة المستمرة لجدول الفعاليات على موقعنا..
تدوموا بعافية!