The Definitive Guide to Living in the Capital , Cairo , Egypt

حنية الدنيا هو الألبوم الأول لنجمة برنامج Star Academy هايدي موسى، بداية ممتازة وموفقة جدًا. نقدر نقول إن جميع صناع العمل اجتهدوا عشان يطلعوا أفضل ما عندهم، لكن هايدي هي المكسب الحقيقي، بإحساسها العالي وأداءها الرائع، مضيعتش مجهود كل اللي شاركوا في صناعة الأغاني، وكمان أضافت للعمل.

كعادة كل الألبومات حاليًا، البداية لازم تكون بأغنية إيقاعية، لكن أغنية سؤال أقل كتير من إمكانيات صوت هايدي موسى، معمولة مخصوص للأفراح، الكلمات عادية وكذلك اللحن، التوزيع حاول يعمل شيء مختلف وده ظهر في جملة الفاصل.

صولو الجيتار الإليكتريك في بداية أغنية بلا مواضيع جيد جدًا ومهد لجو الأغنية المشحون بالارتباك والحزن. وعلى عكس الأغنية اللي فاتت، الملحن الموهوب مدين قدم جملة لحنية رائعة، ومناسبة لصوت هايدي، وده ظهر في أداءها بارتياح شديد، وتقديمها لكل العُرب والحليات في مكانها وبتوقيت مظبوط.

مقدمة أغنية أنت مش بالذكاء على الرغم من جودتها، إلا إنها بعيدة عن جو الأغنية، الشاعر أحمد الجندي بيدور على طريقة جديدة لكتابة معاني قديمة، نجح أحيانًا لما قال:

وأي مبرر يتقال منك مش مقبول

ده اللى يفارق فجأة مالوش فى الدنيا امان

عمرى ما أسامح حد هوائي و غير مسئول

إنسان متعود ع الكدب مع الحلفان

والسؤال بقى: إيه علاقة نسبة الذكاء بنهاية العلاقة أو بدايتها؟

في أغنية ملعوبة بتقدم هايدي اللون الخليجي بخفة دم وبتكشف عن جانب مهم في شخصياتها كمطربة، بعد ما قدمت الأغاني الرومانسية والحزينة، بكل براعة بتقدم الأغنية الخليجية الخفيفة.

كلمات سلمى رشيد مكتوبة بلهجة بيضاء، بحيث يفهمها الكل.

ملعوبة ملعوبة

جننى أسلوبه رضيت بعيوبه

 و قلبى دق و لان

والله لو ماجانى راح حبه من تانى

قلبى مو عقلانى

فى الحب ماله أمان

ما بى غيره ما بى

تعبلى أعصابى

لحن مودي جمال بسيط ومناسب لكلمات الأغنية، وتوزيع حازم السعيد أضاف للأغنية بهجة باستخدامه غير المعتاد للإيقاعات الخليجية المبهجة.

كلمة واحدة

صولو العود في المقدمة جيد جدًا وملعوب ببراعة، وإحساس هايدي وأداءها كالعادة يتفوق على الكلمات والألحان.

حنية الدنيا

مقدمة أغنية حنية الدنيا جيدة جدًا كجملة لحنية، لكن تنفيذها على الكمنجات بدل الكيبورد كان هيبقى أحسن كتير. وهنا بيظهر تأثير الكيبورد أو الأورج على تنفيذ الجمل اللحنية، وإزاي اتحولت المزيكا لجمل إلكترونية من غير أي روح.

الشاعر أسامة محرز على غير العادة مكنش موفق هنا، والارتباك والتقليدية سيطروا على كلمات الأغنية.

(عايزة إيه غير بس إحساس بالأمان) الكلمة دي اتقالت في أغاني كتير. ذروة الارتباك في الصياغة اللحنية وفي الكلمات عند جملة (ترتيبه في قلبي إيه، ده ما فيش في القلب غيره)

أولًا ماحدش سأل عن ترتيبه في قلبها، وكمان مفيش كلام عن عشاق كتير، الكلام كله عن شخص واحد بس، وثانيًا وده الأهم إن ماظهرش من خلال اللحن إن الجملة بتتقال بصيغة سؤال. ودي مشكلة الملحن محمد خلف اللي شارك الشاعر ارتباكه وضرب لخمة معاه !

كالعادة الموزع أحمد عبد السلام قدر يصيغ مقدمة موسيقية جذابة لأغنية مستهون. الكمنجات بتقول من أعلى نقطة وكأنها بتصرخ. كلمات أسامة محرز عبرت عن حالة من الهزيمة، لكن للأسف الصياغة خانته (والسكات في القلب معناه إنه مات) المعنى مفهوم لكن التعبير عنه غير موفق وتحديدًا (السكات في القلب) وفي الكوبليه اللي بعدها عبر ببراعة لما كتب:

والحب مايشوفشي عيوب الناس لكن يفهم

وأنا خايفة عليك أندم

وأسيبك ماتلاقيش بكره

أغنية خطفتني هي أول لقاء مع إيقاع المقسوم، التوزيع مفيهوش جديد، وتقريبًا كل الموزعين بيستخدموا المقسوم في الأغاني غير الموفقة فنيًا، أو لما تنتهي كل الحلول.

وجود آلة الكلارينيت في أغنية واحشني، وبالذات في المقدمة، كان غاية في الروعة والذكاء، صوتها العميق الحساس اللي فيه من الحزن الكتير، كأنه بيشارك الحبيبة لهفتها، وده طبعًا يحسب للموزع الموهوب أمجد معتز. الملحن محمد خلف جسد الشوق واللهفة ببراعة، وكالعادة الشاعر أسامة محرز بيحاول يلاقي تركيبات ومعاني جديدة.

ورافض عيوبى

وعيبى اللي فيا

إني لسه بحب اللي باعني

 وبكده اتحول عيب الحبيبة لميزة، المفروض يشوفها حبيبها ويقدرها.

كعادة كل أغنية يكتب كلماتها الشاعر الموهوب أسامة محرز، هنلاقي الكلمات عنصر مهم ومؤثر وبطل رئيسي، بداية أغنية قلوب موفقة جدًا بتأملات في الحياة وفي العلاقات بين الناس وبأسئلة ملهاش إجابات.

الموزع أحمد الموجي رغم الدخول التقليدي بالبيانو إلا انه استخدم البيتزكاتو (النقر بالاصابع على اوتار الكمان) كتعبير عن الحيرة وعن حال الدنيا.

عودة مرة تانية مع المقسوم في أغنية ب100 راجل، من ألحان سامر أبو طالب. الشاعر عمرو المصري فهم إن الإفيه هو نقطة القوة في الأغاني دي، فعمل كل حاجة عشان يوصل للإفيه في نهاية السطر، لكن في المجمل مفيش جديد.

أجمل ما في أغنية مش حب عادي إنها من كلمات سلمى رشيد، عشان هنشوف الحب من وجهة نظر البنت. سلمى بتقدم تعبيرات جيدة، وبتعبر عن الحب بطابع طفولي في (تبقى قبل النوم حكايتي) التوزيع بسيط، وإن كان الموزع أمجد معتز كان عايز يبين إمكانياته وحرفيته، فرفع اللحن نص تون في منتصف الأغنية بالظبط.