-
بهاء سلطان
-
شرقيمنوعات
-
من الآن
-
فري ميوزيك
-
الأسواق
Mostafa Maher
الصيف بدأ وبدأ معاه سباق الكاسيت، بهاء سلطان رجع يغني تاني، بعد ما كان
واخد أجازة خمس سنين قضىَ معظمها في مشاكل ومحاكم بسبب خلافاته مع منتجه نصر محروس،
ونقدر نعتبر الألبوم الجديد «ومالنا» بمثابة عربون تصالح من نصر لمطربه المفضل.
واضح أن بهاء ما اجتهدش كتير في الألبوم لكن ده مش معناه انه البوم ضعيف
لأن معظم أغنياته مقبولة وفيها فن يسمح لبهاء بمنافسة باقي المطربين.
أغنية «ومالنا» اللي شايلة اسم الألبوم كتبها نصر محروس ولحنها وليد سعد
وصنع موسيقتها الموزع أمير محروس، نقدر نعتبرها أغنية اجتماعية أداها بهاء باحساس
وبـ يسألنا في الأغنية (ليه اتغيرنا وما بقيناش نثق في بعض زي الأول؟) أغنية جميلة
وقوية فعلاً.
ثاني أغنية هى «تعالى» وكلماتها اللي كتبها نصر محروس مش قد كدة، لكن اللحن
هو نجم الأغنية واللي صنعه عمرو مصطفى، وزاد من جودة الأغنية التوزيع اللطيف لأمير
محروس ويحيى الموجي، الأغنية الثالثة ماحدش هـ يختلف عليها خصوصاً وأن لحنها من إبداع
رامي جمال والكلمات لأمير طعيمة والتوزيع لأحمد ابراهيم، الأغنية أسمها «أنا مُصمم»،
رومانسية من الدرجة الأولى وهادية رغم كلامها اللى مليان عتاب، ونصيحة لما تسمع
الألبوم ابدأ بالأغنية دي عشان تفتح نفسك.
أغنية رومانسية ثانية لكن أسرع من اللي قبلها وأسمها «الوردة» كتب كلماتها
العادية نصر محروس ولحّنها الرائع محمد رحيم، أما التوزيع اللي ما ساهمش في جودة
الأغنية كان لوسام عبد المنعم. «قلبي أناني» أغنية عادية كتب كلماتها حسن مهران
وتعب في لحنها تامر علي ولخبط في توزيعها أمير محروس وأكرم عادل، والأحسن انك ما
تركزش عليها وانت بـ تسمع الألبوم.
الأغنية التالية هى «خليتني أخاف» إجتهد في كلماتها نصر محروس وأبدع لحنها
عزيز الشافعي، وعشان الأغنية حزينة قصد الموزع أكرم عادل الإعتماد على الناي
والكمان عشان يوصل لنا الإحساس المناسب مع آداء بهاء المتميز.
«بوسة» لحن ثاني للمتألق عزيز الشافعي،
أغنية جميلة نقدر نسمعها في المناسبات السعيدة. أغنية «أنا» تعتبر من أفضل أغاني
الألبوم، أما أغنية «100-100» فهى كان ناقصها 3 حاجات وتبقى أغنية مقبولة؛ أولها
آداء بهاء ثم الكلمات ثم اللحن والتوزيع! يعني من الآخر ممكن ما نسمعهاش أصلاً لحد
ما نخلص باقي الألبوم. أغنية «زي ما إحنا» النجم فيها هو التوزيع الرائع اللى عمله
أمير محروس ويحيى الموجى وإحساس الموجى واضح جداً خاصة في بداية Intro الأغنية الكلاسيكية الهادية، الكلمات مش قد كدة
وكتبها نصر محروس واللحن مش أعلى من التوزيع ولا أقل من الكلمات ومن غيره كانت هـ تبقى
أغنية أقل من عادية لكنها خرجت بشكل جيد خاصة وأن بهاء قدر ينوع في آداؤه.
