The Definitive Guide to Living in the Capital , Cairo , Egypt

رغم مشواره الغنائي القصير، وعدد ألبوماته القليلة، وإشاعات تقليده لعمرو دياب كل مرة، قدر رامي صبري يحقق لنفسه شعبية ونجاح واسم قوي وسط المطربين الشباب الصاعدين في الوطن العربي، من أول بداياته في التلحين لمطربين كبار زي شيرين وفضل شاكر، وبعدها دخوله المجال الغنائي زي ما عمل قبله ملحنين كتير زي عمرو مصطفى ورامي جمال، و دايمًا الملحن اللي عنده ملكة الغنا بيكون فاهم جدًا شغله.

بيرجع رامي بعد سنتين ويقدم ألبومه (الراجل) مع شركة مزيكا، والجديد المميز هنا ان اسم الألبوم يظهر بعيد عن الرومانسية، على عكس اسماء ألبوماته الأربعة اللي فاتوا ما بين (حبيبي الأولاني) و(أجمل ليالي عمري) وما شابه، لكن الأميز هو تلحين رامي لـ 8 أغاني كاملين من الألبوم زي ما بيعمل القيصر كاظم الساهر في ألبوماته.

دلوقت نبدأ جولتنا مع الألبوم في 12 أغنية ونشوف ايه الجديد والمميز تاني، ونعرف كمان ايه العلاقة بين ألبوم رامي وألبوم أصالة (مهتمة بالتفاصيل)

1- الراجل.. كلمات وائل توفيق وألحان رامي صبري

غنوة الألبوم اللي قربت على 4.5 مليون مشاهدة، واللي كلماتها هتفكرك شوية بأغنية (قوم أقف) لبهاء سلطان، نفس المعنى تقريبًا في التعامل بين الراجل وحبيبته، الراجل اللي عاوز التفاهم والمعاملة اللي تليق بيه مع الاعتراف بعشقه للأنثى اللي قوتها في ضعفها، اللحن هنا شبابي حديث الإيقاع والرتم.

نقدر نعتبرها رسالة من كل راجل لكل البنات، زي ما رامي بيقول ( لما الراجل يتكلم الست متعندش معاه) وده مفيهوش أي ديكتاتورية منه لأنه بيأكد (لو بتعامله بطيبة وحنية وحب واخلاص تاخد عينه وتدّلع ويصونها وتتشال عالراس)، وبعد كل النصايح والفهم بيختم بـ (خلص الكلام أما نشوف آخرتها معاكي ايه)

2- أنا بنسى نفسي.. كلمات أحمد علي موسى وألحان رامي صبري

إحساس رامي العالي اللي عودنا عليه في أغانيه الهادية الحزينة زي (غمضت عيني) و(لا يا قلبي) وغيرها، هنا الكلمات رومانسية جدًا مش حزينة لكن اللحن مليان شجن راقي، (أنا بنسى نفسي..أنا بنسى اسمي..حبيبي أنا بنسى لما أكون وياك).

الميكس ده هتحبه أكيد مع روعة الأحساس بالغنا، وكأنها تنفع أغنية سلو مع حبيبتك، لكن من باب الامانة اللحن تحفة صحيح بس شبيه جدًا بلحن أغنية (قلت إيه) لهيفاء وهبي اللي كانت ضمن ألبومها (حبيبي أنا) في 2008، حتى المطلع شبه متطابق ودي الحاجة الوحيدة اللي ممكن تقلل من الأغنية في نظرك.

3- بطلي بقى.. كلمات أمير طعيمة وألحان رامي صبري

رسالة تانية من كل راجل لست، مع لحن مبهج جدًا بيفكرنا ببشرة خير الحقيقة، لكن بصمات رامي واضحة وكلمات أمير طعيمة كالعادة في الجون، لازم البنت تبطل شك وحوارات مع حبيبها، (بطلي بقى وحياة عينيكي..إيه اللي جرى يا حبيبتي ليكي)، ويكمل بـ (على كل حاجة صغيرة بنخش في سين وجيم مع أنك عارفة أن انا دوغري وماشي سليم)!.

 أما قصف الجبهة الدماغ هنا فسؤاله للبنت (هو انتي ليه متخيلة أنك مبتغلطيش)!، نقدر نقول أن أي بنت لو سمعت أغنية (بطلي بقى) لرامي صبري وأغنية (متبطليش) لهشام عباس هتبقى الدنيا في العلاقة روعة، لأنها هتعرف هتبطل ايه ومتبطلش ايه!

4- غالي.. كلمات تامر حسين وألحان شادي حسن

أغنية تانية تنفع للأفراح لكن في اللمة والحركة مش السلو، التوزيع مظبوط أوي مع لحن نقدر نقول انه عالمي بجد، خصوصًا في الفواصل بين الكوبليهات، هتفتكر أغاني الشاب خالد وفيفث هارموني، ده مستوى تفرح لما تسمعه فعلاً.

الكلمات برضه موجهة من الراجل اللي بيحب بجد،) لما..قلبي شاف عيونه وسط لمّة.. قاللي هو ده حبيبي أيوة.. صوره من اللي كان في بالي ياه)،ولغاية النهاية بأصوات الكورال اللي كانت موفقة جدًا.

5 – محبتش.. كلمات تامر حسين وألحان شادي حسن

نفس جروب الأغنية اللي فاتت، لكن المرة دي حزن وفراق، وكالعادة الحزن بيعمل شعبية مضمونة عند الجمهور العربي والأغنية قربت على 4 مليون مشاهدة، مع الحفاظ على الجودة نفسها بلحن جمع بين الكلاسيك والحديث، أما الكلمات فقصف جبهة تاني للبنت، يظهر رامي صبري بياخد بتار الرجالة بعد اللي أصالة عملته فيهم في آخر ألبوماتها (مهتمة بالتفاصيل)

الكرامة اللي هتخلي الراجل يسيب حبيبته رغم كل شيء، لأن فعلاً البنت بتغلط زي الراجل والله!، وممكن توصله للدرجة دي ويقول (محبتش اني اضيع وقتي ع الفاضي هسيبك قبل ما تسيبني وانا راضي)، ورغم حزنه بيعترف بحقيقة الفراق (ويلا سلام آدي الأيام ياعيني وهيا بتبين عيوب الناس، ومين حبك، ومين عرفك يومين وخلاص، ومين طلعت وعوده كلها أوهام).

6- حلوة.. كلمات أحمد علي موسى وألحان رامي صبري

نرجع للبهجة والجو الصيفي الشبابي، والمدح والغزل اللطيف اللي كل مطرب جربه من حماقي لعمرو لتامر، رامي هنا بيعمل توليفة هتحركك أكيد وتبسطك، مع مغامرة في ترديد المذاهب نهاية الكلام زي انه يقول (قولولي طب اعمل ايه) وينهي بـ (ايه ايه ايه) اكتر من مرة، كانت مغامرة موفقة عند الأغلب.

 ويكمل الغزل بإيقاع أهدى عشان يشدك (ومين مجنون يرفض هدية..دي فرصة عمري وبين ايديا، ومنها مفيش أكيد اتنين عمري ما هرضى بغيرها واحدة، ولا هرتاح انا يوم ولا اهدى، ومش منقول ولا خطوة واحدة، دي حلم لقيته بعد سنين).

7- إتقابلنا.. كلمات تامر حسين وألحان رامي صبري

المستوى ثابت في الألبوم الحقيقة، رغم ان موضوع الغنوة متكرر في أغاني كتير جدًا، لما اتنين حبيبين يتقابلوا بعد عمر طويل، اللحن والكلمات وصوت رامي، برضه كانوا في أتم وفاق، والفكرة أنك توفق بين الحلو مع بعضه، مش تجيب كل العناصر حلوة بس مش لايقة مع بعضها، وإن كانت برضه للأمانة شبيهة بأغنية زين مالك it’s you.

دخلة الأغنية لوحدها تحسسك برهبة الموقف، ويجي الوصف (اتقابلنا بعد عمر وكان بقالنا سنين كتير من يوم فراقنا مشوفتهاش اتقابلنا وقلبي دقّ وقال ياريتني أيام زمان مابعدت عنها، مسبتهاش)، والأصعب للراجل ان حبيبته (لسة زي ما هي حلوة..شكلها عمّال بيصغر رجعتني لذكريات)، مؤثرة فعلاً وكأنها النسخة الحزينة من أغنية (كيفك أنت) لفيروز مع الفرق طبعًا.

8- عامل تقيل.. كلمات تامر حسين وألحان رامي صبري

يستمر قصف الجبهات من الراجل.. للبنات اللي عاملة تقيلة بزيادة، ويستمر الشبه مع أغنيات قريبة، لكن المرة دي لرامي صبري نفسه في أغنيته (تعالى)، عمومًا الرتم شبابي برضه وصيفي أوي، وده الجو المسيطر على الألبوم لغاية دلوقت، لكن مظنش اي راجل هيقاوم يبعتها لحبيبته فعلاً!

لأنه بيقول لحبيبته تقصر وتجيب من الآخر!، ) بقولك ايه قصر وقول ع اللي مداريه كلمة يادوب اربع حروف، بلاش كسوف قولها كده وجرب وشوف، كفاية خوف انت اللي نفسي اعيش معاه مابين ألوف فبلاش نسيبها للظروف).

9- حب عمري.. كلمات أمير طعيمة وألحان رامي صبري

وكأن رامي بيرد على أصالة تاني، ألبومه معظمه فرح فعلاً، وآدي أغنية تانية خفيفة وصيفية، حب وغزل تاني، مستواها يمكن أقل من (غالي) لكن كلمات طعيمة معوضة كتير، ومننكرش برضه بتشابه التوزيع أوي مع أغنية (خليني معاك) لحسام حبيب.

تاني هنقول للحبيب (لما جيتلي، لما بعيونك ناديتلي كل حاجة فيك نادتني للي بتمناه عمري، عمري، عمري ما انسى انا حب عمري دانت حلم انا عشت عمري كله بستناه لما جيتلي، لما بعيونك ناديتلي كل حاجة فيك نادتني للي بتمناه)

10 – مفيش واحد بيتعلم.. كلمات أمل طائر وألحان رامي صبري

حزن شوية بقى لكنه برضه رومانسي، وزي ما قال في الأغنية اللي فاتت (حب عمري) رجع تاني وقال (عمري ما هندم عليك)، الحقيقة واحنا بنسمع بترتيب الأغاني الرسمي لغاية دلوقت، الحب والفراق مسيطرين جدًا، مفيش أي مواضيع تانية تشدك كمستمع، لازم نراعي العزاب برضه!، أو اللي نقصده فعلاً انك تنوع برة العاطفة عشان تغطي قضايا تانية مهمة.

 ولسة قصف الجبهة مستمر للبنات بعد الراجل ما اتعلم ( ولو صدفة اتقابلنا متجيش ترمي السلام مبقاش ولا حاجة بينّا، خلصت مات الكلام، وحسابي معاك هسيبه للدنيا والأيام).

11- مش جاي افتكرها.. كلمات أحمد علي موسى وألحان ياسر نور

بعد الماضي بيتقابلوا تاني، وبيفتكروا تاني، معقول هي نفس فكرة أغنية (إتقابلنا) في نفس الألبوم؟..شكلها هي!، مع أن الجودة مش قليلة الحقيقة، لكن الأغنية اللي هتسمعها الأول هتحبها أكتر أو مش هتفرق معاك لو كنت مش بتركز مع الموضوع والتنويع !

و يقول من تاني (ولقينا اللي ينسينا، وزي ما جيت انا همشي، انا مش قصدي ازعلها بكل بساطة وحشتني، وقلت اعرف ايه احوالها، واشوفها من بعيد لبعيد)

12- خسارة عمري.. كلمات أحمد علي موسى وألحان رامي صبري

يختم رامي الألبوم بأعظم قصف وهجوم على الحبيبة الهاجرة، اللحن حزين بيصرخ وهو نفسه متأثر وعايش الحالة مفيش بعد كدة، نقدر نقول بكل اقتناع ان حق الرجالة رجعلهم تالت ومتلت بعد ألبوم أصالة!

من أول (خسارة عمري ضاع على واحدة طلعت محبتنيش، وباعت قلبي كده بسهولة) ويكمل بـ (ولا اشتاقت ولا حنّت، ولا فارق معاها كمان بكل بساطة نسيتني، ولا عملت حساب لزمان)، كأنه بيقول اللي جوه قلب كل راجل مجروح!، مش كفاية دي البنت كمان (ضحكت عليّا سنين يادوب انا كنت واحد عدّى ف حياتها خد له يومين) ، أما المتمة فكانت (وقالت عادي حب وراح.)

وختامًا ألبوم رامي صبري الخامس (الراجل) جميل ويستاهل يتسمع، خصوصًا في أوله، هتلاقي نفسك مبسوط بمستوى محترم من الشغل، لكن مع تكملة الألبوم تكتشف للأسف انه وقع في فخ التكرار، مش بس لأن كل أغانيه عن الحب والعاطفة، لكن موضوعات الأغاني نفسها متكررة جوه الألبوم نفسه!

ومع أننا نشهد أن الألبوم دافع عن الراجل جدًا بعكس ألبوم أصالة (مهتمة بالتفاصيل) ويمكن دي مفارقة جميلة في نفس الموسم أن ألبوم يرد على التاني بشكل ما، لكن أصالة ألبومها ضم أغاني وجودية وقضايا إنسانية بشكل يبهر أي مستمع زي (مين فينا) و(صندوق صغير)، وده اللي للأسف وقع من رامي صبري رغم انه غنى 12 أغنية وده رقم كبير.

انتم ايه رأيكم في النقطة دي؟، حبيتم الألبوم ولا فرق معاكم التكرار؟