إذاعة كايرو 360 تقدم.. 10 أغاني مستحيل نتخيل رمضان من غيرهم
أجمل أغاني رمضان أغاني رمضان أغاني مصرية قديمة تواشيح رمضان رمضام 2024
Mustafa Abd Rabu
فرحة شهر رمضان مش بتكمل إلا بلمّة العيلة، والزينة، والفوانيس، وطبعًا بالأغاني اللي اتعملت مخصوص علشان الشهر الفضيل، وبقت جزء من ذكرياتنا. هنا هنتكلم عن 10 أغاني مستحيل نتخيل رمضان من غيرهم.
رمضان جانا
أجمل أغاني رمضان بلا منازع، ومش بنحس أن رمضان جه غير لما نسمعها بعد رؤية الهلال على طول، المطرب الكبير محمد عبد المطلب بصوته القوي، بيبشرنا بأجمل أيام السنة.
المسحراتي
(السعي للصوم خيرٌ من النوم.. دي ليالي سمحة نجومها سبحة) دويتو فؤاد حداد وسيد مكاوي في المسحراتي من أجمل الأعمال اللي اتقدمت في رمضان، (المشي طاب لي والدق على طبلي) دقات الطبلة وإيقاع المسحراتي المميز في شوارع رمضان بالليل، الخالية من الناس، المليانة سكينة وهدوء وملايكة.
وحوي يا وحوي
جملة (وحوي يا وحوي) فرعونية، يعني بنعبّر بكلمات فرعونية عن مناسبة إسلامية، والميكس ده مايحصلش غير عندنا في مصر.
ولو تخطينا موضوع وحوي وإيّاحة، هنسمع (هاتي فانوسك يا أختي يا إحسان..آه يا ننوسك في ليالي رمضان) ولحد دلوقتي فعلًا ماحدش عارف إيه المقصود بـ آه يا ننوسك في ليالي رمضان؟!.
عامة كل ده مش هيمنعنا من الاستمتاع بأغنية وحوي يا وحوي اللي غناها أحمد عبد القادر في الثلاثينيات، وهي أقدم أغنية اتغنت لرمضان.
الراجل ده هيجنني
أغنية الراجل ده هيجنني كل عناصرها دمها خفيف، بداية من كلمات حسين السيد ولحن محمد الموجي وغناء صباح، وطبعا وفؤاد المهندس، وهو أكتر ممثل ارتبط اسمه برمضان. ورغم أن الهدف من الأغنية إنها تفكرنا بالغاية من الصيام، إلا إنها فاتح قوي جدا للشهية! والأغنية من أوائل الأغاني اللي اتصورت فيديو كليب.
يا بركة رمضان
أغلب مطربين مصر شاركوا الناس باحتفالهم بشهر رمضان، وكلها أغاني مبهجة أغنية يا بركة رمضان للمطرب الراحل محمد رشدي من أجمل الأغاني وأكترها بهجة، بداية من الكمنجات والزغاريد والإيقاع السريع، ونهاية بلحن الراحل حسين فوزي.
أهو جه يا ولاد
أشهر أغنية لفرقة الثلاثي المرح، اللي ظهرت في الخمسينيات، وتميزت بأعمالها الاجتماعية الخفيفة، وقدمت وقتها لون جديد من الغناء، وفي أغنية أهو جه يا ولاد هنسمع المطربات التلاتة بيغنوا اللحن بإحساس عالي، وأدائهم مضبوط بالمسطرة، كأنهم نفس الشخص.
مرحب شهر الصوم
أغنية مرحب شهر الصوم لحنها وغناها عبد العزيز محمود في الخمسينيات، وكان الأذكى كملحن في التعامل مع أغنية تحتفل بمناسبة دينية، اعتماده قليل على الآلات الموسيقية، مع مساحة أكبر للدفوف بإيقاع متوازن ثابت.
سبحة رمضان
“الله الله الله، سبحة رمضان لولي ومرجان، بتلاتة وتلاتين حباية، ثلاتة وتلاتين منهم تلاتين، أيام رمضان نور وهداية، وتلاتة العيد ونقول ونعيد، ذكر الرحمن آية بآية، أيام رمضان رحمة وغفران، ورضا الرحمن وحده كفاية”.. مقدمة واحدة من أجمل أغنيات رمضان بصوت فرقة “الثلاثي المرح”.
الأغنية من كلمات الشاعر حسين طنطاوي، ومن ألحان الموسيقار علي إسماعيل.
تم البدر بدري
أغنية والله لسه بدري للراحلة شريفة فاضل، بنسمعها دايمًا في الأيام الأخيرة من الشهر، شريفة فاضل ارتبط صوتها برجاءها لشهر رمضان علشان يستنى شوية، ولحد دلوقتي سماع الأغنية دي بيحسسنا بالحزن على رحيل رمضان.
مولاي إني ببابك
صحيح ده ابتهال مش أغنية، لكنه ارتبط بذكرياتنا عن شهر رمضان، الرئيس السادات اقترح على الشيخ سيد أنه يغنّي حاجة من ألحان بليغ حمدي، الشيخ سيد افتكر الريس بيهزر معاه، لكن بعد شهور اتكرر الكلام تاني، وعرف أن الريس ماكنش بيهزر، النقشبندي كان رافض الفكرة تمامًا، لكنه وقت ما سمع اللحن من بليغ قعد على الأرض في حالة ذهول!
لحن رائع رغم بساطته، من مقام البياتي، بليغ عارف قدرات الشيخ سيد الصوتية الرهيبة، وعلشان كده عمل بيها كل اللي هو عايزه، وسمعنا ابتهال من أروع ما يكون.
