The Definitive Guide to Living in the Capital , Cairo , Egypt

“قيراط حظ ولا فدان شطارة”!
المثل ده غالبًا بنسمعه لما الحظ بيلعب لعبته مع أشخاص حظهم من الموهبة قليل، وده اللي حصل مع "إيساف" في برنامج ستار ميكر، ورغم وجود ملحنين كبار في اللجنة (حسن أبو السعود وحلمي بكر) إلا إنهم حولوا إيساف لنجم البرنامج المتواضع فنيًا وانتاجيًا، والغريب فعلًا أنه لسه لحد دلوقتي وبعد أكثر من 10 سنين مستمر ومن غير أي تجديد إلا في شكله وتسريحة شعره!

أغنية "جامد بس" غير عنوانها السيء إلا أنها مثال ممتاز للأغنية الاستهلاكية، اللي بتتعمل عشان تعمل جو في الأفراح وبعدين تتنسي.

استخدام المؤثرات كان زيادة عن اللزوم في أغنية "ما تصبح" وعامة الموزع أحمد عبد السلام –اللي له نصيب الأسد في الألبوم- أثبت إنه موزع أفضل منه ملحن، كل ألحانه مفيهاش أي محاولة لتقديم جديد، وعلى عكس توزيعاته -اللي حتى لو مش حلوة أوي- لكن واضح فيها مجهوده.

بداية أغنية "مالنا" جيدة ومهدت لجو الأغنية، في بداية الغنا إيساف كان كويس، لكنه سيء جدًا في الأماكن العالية وخرج عن التون أكثر من مرة. الشاعر "محمد البوغه" جسد حالة مختلفة عن جو الأغاني بشكل عام، كأنه بعد الفراق واقف يتأمل حاله وحالهم. لحن محمد خلف عادي وتوزيع أحمد عبد السلام بعيد عن الأغنية.

أغنية "الحقيقة" حلقة من حلقات مسلسل الهجر والفراق. الشاعر أحمد المالكي حاول يقدم جديد فغيّر نهايات الكلام، وهنسمع حاجات زي "مشكلة" و "مقفلة" كنوع من كسر الملل.
لحن محمد الوزيري اعتمد على الجُمل الطويلة، وطلع للطبقات العالية كأنه بيزعق أو بيصرخ عشان يعبر عن الحالة السيئة بعد الفراق والهجر، ويمكن اللحن نجح إنه يعبر عن حالة الكلام، لكن المناطق العالية كشفت تواضع صوت إيساف رغم كل مجهودات مهندس الصوت.

المقدمة الموسيقية لأغنية "ياريتها سهلة" عادية جدًا، الموزع عمرو عبد الفتاح استخدم الجيتارات بشكل عادي جدًا عشان يملى الفراغات اللي في الأغنية. وعند "قالولي الوقت" طلع اللحن نغمتين بس ورغم كده كشف إيساف في خروجه عن التون، والملحن "مدين" حاول يقدم لحن متماسك وجملة الفاصل بالأكورديون تُحسب له.

دخول جيد للناي في أغنية "بايعني" ولحن أحمد عبد السلام جيد جدًا، نجح في التعبير عن الدراما وحالة الشماتة، ولكنه أصرّ يروح ناحية المناطق العالية، ودي مش نقطة قوة لإيساف نهائيًا.
وبذكاء اختفت الوتريات كلها وحل الناي مكانها، عشان يعبر عن الحزن وفعلًا عازف الناي –للأسف منعرفش إسمه- لازم نوجه له تحية على تأديته للجملة الرائعة بتكنيك وإحساس عالي، لكن للأسف الموال اللي في الآخر ضيّع جمال باقي الأغنية.

أغنية "ناسي نفسي" تعتبر من أفضل أغاني الألبوم، الموزع أحمد عبد السلام راح ناحية موسيقى الـ Latin Pop ولحن "مدين" قريب جدًا من أغنية "ولا ليلة" لعمرو دياب وخاصة في البداية.

للأسف مفهمناش قصد الشاعر هاني صارو في أغنية "حب جديد"! يعني إيه الجديد في الحب ده طيب؟ وكالعادة الموزع أحمد عبد السلام اقتبس نفس النمط الغربي لأغاني البوب من غير أي إضافة أو تغيير.

في أغنية "عِند فيكِ" الشاعر طارق فيصل لعب على فكرة الحبيبة اللي مفهمتش حبه ليها، واتمنى ليها أسوء مصير ممكن، وطبعًا –زي ما إحنا عارفين- دي فكرة جديدة مسمعنهاش قبل كده! وخاصة اللعب على قافية زي الناس والإحساس والناس.

اختيار أغنية "منك لله" بكلمات خليجي اختيار غير موفق، إيساف غير متقن للهجة ومخارج الحروف مش مظبوطة خالص، حِمل الأغنية كله كان على الكمنجات وآلة الأُبوا وجمل الحوار بينهم مكتوبة كويس جدًا.