5 روايات رومانسية هتخلي عيد الحب ذكرى ما تتنسيش!
أفضل الروايات العربية الأسود يليق بكِ الحب في الأدب العربي الحب في المنفى انكسار الروح روايات رومانسية عيد الحب فلتغفري قيد الفراشة هدايا الفلانتين هدايا رومانسية
Omar Abd-elmaqsoud
الصورة الرئيسية: Aung Soe Min
عيد الحب مش بس ورد ودباديب، الهدية الحقيقية هي المعنى اللي وراها، هي إنك تفتكر اللي بتحبه وتفتح معاه صفحة جديدة. ولو بتدور على هدية تبقى بداية لحب ورومانسية راقية، مافيش أحسن من رواية رومانسية تكون مصدر إلهام ودفء في اليوم ده.
في كايرو 360، جمعنالك 5 روايات رومانسية عربية ممكن تهديها للي بتحبه، وكل صفحة فيها بداية لحكاية جديدة.
فلتغفري – أثير عبدالله النشمي
رواية تحكي عن الحب والتضحية، عن عزيز وجمانة اللي بيعيشوا قصة حب مليانة مشاعر متناقضة. الرواية تكمل أحداث “أحببتك أكثر مما ينبغي”، لكن المرة دي من وجهة نظر عزيز، اللي هيخليك محتار بين إنك تتعاطف معاه أو تكرهه!
الأسود يليق بكِ – أحلام مستغانمي
حكاية حب بين هالة، المطربة الجزائرية اللي بتشوف الحب بإحساسه، وبين رجل الأعمال اللبناني طلال اللي شايف إن المشاعر ممكن تُشترى بالفلوس. الرواية مش بس رومانسية، لكنها كمان بتاخدك في رحلة مع تاريخ الجزائر وسط سطور مليانة شجن وجمال.
الحب في المنفى – بهاء طاهر
هتحس إنك جوه الرواية، لأن البطل ملهوش اسم، وكأنه ممكن يكون أي حد فينا! الرواية بتناقش إزاي الحب والحرب ممكن يجتمعوا جوا شخص واحد، وإزاي الحياة بتاخدنا لمصير ما كناش متخيلينه.
انكسار الروح – محمد المنسي قنديل
قصة حب مختلفة، فيها وجع وانكسار وشجن، بتحكي عن علي، العاشق اللي بيحاول يهرب من هزيمته بالحب، لكن الحب نفسه هيزوده ألم بسبب فاطمة، اللي بتلعب بمشاعره بكل أنانية.
قيد الفراشة – شيرين سامي
الرواية دي بتوصف المشاعر الإنسانية ببراعة، من خلال شخصية عالية، اللي بتعيش واقع صعب زي بنات كتير، لكنها بتقرر تهرب منه لخيال أجمل. أما حسن، البطل، فهتحبه وتتمنى تقابله في الحقيقة. النهاية مفتوحة، وسيب لخيالك فرصة يكملها!
