يوسف زيدان ورشا عدلي ضمن قائمة “البوكر” لأفضل الروايات العربية عام 2020
آخر أيام الباشا البوكر 2020 الرواية العربية جائزة البوكر رشا العدلي فردقان يوسف زيدان
Omar Abd-elmaqsoud
بعد انتظار من عشاق القراءة والكتب، والمدونين والكتاب ودور النشر، أعلنت الجائزة العالمية للرواية العربية والمعروفة باسم “البوكر” النهارده الثلاثاء 17 ديسمبر عن الروايات المرشّحة للقائمة الطويلة في دورتها لسنة 2020، واللي بتبلغ قيمة جائزتها 50 ألف دولار.
القائمة المعلنة بتضم 16 رواية صدرت خلال الفترة بين يوليو 2018 ولحد يونيو 2019، وهي روايات اللي تم اختيارها من بين 128 رواية كانت مرشحة للجائزة.
الجميل في الخبر إن القائمة ضمت روايتين من مصر هما “آخر أيام الباشا” لـ “رشا عدلي” واللي بتتكلم فيها عن آخر أيام محمد علي باشا، ورواية “فردقان” لـ “يوسف زيدان” واللي أحداثها كانت بتدور في فترة سجن بن سينا في إيران.
القائمة الطويلة لجائزة البوكر بشكل عام ضمت روايات لثلاثة كاتبات و13 كاتب، منهم 9 كتّاب بيوصلوا لأول مرة للقائمة الطويلة للبوكر، ومعظمهم أعمارهم بتتراوح بين 34 و75 سنة.
المشاركين من 9 بلدان عربية، علشان كده معظم الروايات تناولت مواضيع تتعلق بعالمنا العربي، وبتسلط الضوء على تاريخ المنطقة العربية وتراثها الغني بالحكايات والأساطير والعبر.
