محاكمة مبارك بشهادة السيدة نفيسة
محاكمة مبارك بشهادة السيدة نفيسة: شكاوي الغلابة في صندوق النذور
-
ضحى عاصي
-
واقعية
-
من الآن
-
عربي عربي
-
10 جم
-
مكتبات وسط البلد
Ahmed Abd El Gawad
كتاب جديد من نوعه بـ يتكلم عن عالم المصريين وثقوا فيه،
لكنه مش أى عالم ده عالم مخفى غير منظور، بـ يحاور ويتكلم مع ناس ثانية، ناس من
أولياء الله الصالحين أو من آل بيت النبى –صلى الله عليه وسلم– ومش بـ يكلموهم بس
دول كمان بـ يشتكوا لهم وبـ يثقوا فى حكمهم، وتعالوا نتعرف على الكتاب.
الكاتبة ضحى عاصى بـ تقول فى مقدمة الكتاب أنه نواة
لمشروع رسالة ماجيستير عن دراسة اجتماعية، هدفها أنها ترصد التغيير اللى ظهر على المجتمع
المصرى وده من خلال الرسائل اللى بـ يحطها الناس فى أضرحة أولياء الله الصالحين
وتحديدًا السيدة نفيسة.
أول حاجة بـ تعرفها فى الكتاب هو فكرة المحكمة الباطنية،
وهى شكل من أشكال الأساطير الشعبية اللى بـ يعتقد فيها الناس وبـ يقولوا أنها بـ تحكم
بالعدل فى كل شئون الحياة، واشتهر الإمام الشافعى أنه قاضى الشريعة واشتهرت السيدة
زينب أنها رئيسة الديوان وبـ يكون معاها فى المحكمة دى الحسن والحسين والناس بـ تبعث
لهم رسائلهم وشكواهم وبـ يحكموا فى القضايا مرة كل سنة فى ديوان اسمه “ديوان
التصريف”.
بعد كده بـ تعرفنا الكاتبة ضحى عاصى على السيدة نفيسة
ونسبها اللى بـ يصل إلى على بن أبى طالب وفاطمة الزهراء ابنة الرسول –صلى الله
عليه وسلم– وبـ تكلمنا على كراماتها ونشأتها واشتهارها بالعلم، وكمان ألقابها اللى
منها “نفيسة الدارين” وكأنها نفيسة فى الدنيا والآخرة، ونفيسة العلم وده
لاشتهارها بالعلم، نفيسة الطاهرة وده لطهارتها وتعبدها، “ونفيسة المصريين”
لأن أهل مصر بـ يحبوها.
وبعدين بـ تعرفنا الكاتبة على فكرة الكرامة وأنها أمر
خارق للعادة ربنا بـ يعطيها لناس معينة لكنهم مش أنبياء، دول عباد الله.
أكثر جزء شيق فى الكتاب جزء فتح صندوق النذور واللى بـ يتم
كل أسبوعين وبـ تحكى أن الصندوق فيه حاجات كثير منها فلوس وذهب وورقة نتيجة بتاريخ
الأحد 1 يونيه 2008 ومش مكتوب عليها حاجة ثانية، وورقة مكتوب عليها “حسبنا
الله ونعم الوكيل” وورقة مكتوب عليها رقم جلوس ومكتوب فيها دعاء باسم
الطالبة، وكمان فيه خطاب للنائب العام، وخطاب مرسل لوزارة الصحة وورقة مكتوب عليها
“يا رب خذ لى حقى منهم”.
وحاجات ثانية كثير بـ تبدأ الكاتبة فى تحليلهم بشكل
سريع، وبـ تحاول فى نهاية الكتاب أنها تعمل قراءة سريعة فى مضمون الرسائل والشكاوى
اللى اختلفت عن زمان عن شكاوى الفلاحين والغلابة، الشكاوى أصبحت من المتعلمين
ومنهم اللى بـ يشتغلوا فى مناصب عالية ومهمة، وده بـ يظهر لنا قد إيه الناس كانت
مظلومة فى عهد مبارك، لكن اللى يؤخذ على الكاتبة هو تركيزها على عرض الحاجات
الموجودة فى صندوق النذور ووصفها، لكن الدراسة ما أعطتش الموضوع حقه.
أكتب تقييم
مقترح
معالم وسياحة
متحف الصيد: مغامرة في قلب القاهرة هتاخدك لعالم الأدغال
تاريخ مصر حيوانات محنطة +7
أفلام
