The Definitive Guide to Living in the Capital , Cairo , Egypt

مصدر الصورة من هنا

حب القراءة في الوجدان والدم، وشراء الكتب متعة تتحس متتوصفش، ومع غلاء الأسعار اليومين دول، كتير مننا بيتجه لسور الأزبكية، المكان الأول لبيع الكتب الرخيصة في مصر كلها، وعلشان كده هننقلكم 9 نصائح مهمة من الصحفي المتخصص في الشئون الثقافية “سامح فايز”، علشان لما تنزلوا سور الأزبكية متلبسوش في الحيط.

1- ماتطلبوش كتاب بالإسم من البائع، علشان هيعرف انكم محتاجينه ودي أول لبسة في الحيط.

2- لو شدكم عنوان كتاب وعاوزين تشتروه، متبينوش إنكم مهتمين بيه، وأسألوا عن أسعار الكتب اللي في نفس الصف ومتعرفهوش إنكم قاصدين كتاب بعينه.

3- لو صاحب المكتبة قالكم كل كتاب بسعر، متشتروش منه و”لف وارجع تاني”، علشان أنتم كده وقعتم في عباية حوت هيبيعك هدومك.

4- أسلوب العرض في سور الأزبكية إنه بيبقى فيه كتب للعرض وكتب داخل المكتبة، دايمًا العبوا على العرض لأنهم بس بيجيبوا رجلكم بعناوين تشد، ولو دخلتوا جوه المكتبة هتخرجوا “بلابيص”.

5- اعملوا نفسكم شحاتين وولاد بلد، وأوعوا تعملوا ولاد ناس وبابي ومامي قدام بائع، هيستغل الفرصة والكتاب اللي بجنيه هتاخدوه بالدولار.

6- ماتشتروش من أول مكتبة تقابلكم، وخليكم عارفين ان التاجر واحد، وبيوزع لكل المكتبات، يعني الكتاب أبو 10 جنيه، ممكن تلاقيه في مكان تاني بجنيه.

7- لو عاوزين تشتروا رواية اشتروها من مكتبة متخصصة في الكتب الدينية، الروايات عندهم من باب العلم الذي لا ينفع، وعاوزين يخلصوا منها علشان البركة تحل على المكان.

8- لكن لو لسه سامعين محاضرة لعمرو خالد وعاوزين تتوبوا! يبقى تشتروا الكتب الدينية من عند مكتبة  متخصصة في القصص والروايات، لانهم في الغالب هيدوك الكتاب الديني ومعاه رواية هدية.

9- لو لقيتوا مكتبة أسعارها حنينة أوعوا تسيبوها، خدوها فحت وردم، لكن  خلوا بالكم وكل شوية اسألوا على الأسعار، علشان تجار الأزبكية عندهم زهايمر، ممكن يقولوا في الأول جنيه وبعد شوية يعمل عبيط ويعلي السعر ويلبسك.