The Definitive Guide to Living in the Capital , Cairo , Egypt

في كتابه الجديد “كتاب المواصلات” قدر عمر طاهر يثبت أن الفكرة المختلفة، حتى لو كانت بسيطة جدًا، ممكن توصل للناس.. وتحقق نجاح كبير.

عبقرية الفكرة الأساسية للكتاب في بساطتها، ناس كتير بتبقى محتارة تقرأ إيه وهي في المواصلات، بتبقى عاوزة كتاب خفيف، بسيط، سريع، والحاجات دي نجح عمر طاهر في تقديمها في كتابه.

غلاف الكتاب كان مميز جدًا، شخص مرسوم لابس نضارة وبيبص للحياة من شباك أتوبيس، مع خلفية بيضا، مريحة للعين، والخطوط اللي تم كتابة اسم المؤلف والكتاب بيها كانت جميلة ومعبرة. كمان الأبيض مع الأزرق والأصفر عملوا شغل عالي وخلوا غلاف الكتاب أقرب للوحة فنية.

بيقول عمر عن كتابه “هذا الكتاب هدفه الأساسي أن يشاركك الطريق، في المترو، الميكروباص، الطائرة. حكايات شخصية لا يجمع بينها سوى شيئين: الأول أنها تقدم لك بعض الونس خلال الرحلة، وتقتل الوقت نيابة عنك دون أن تزعجك، والثاني هو الكاتب الذي يؤمن أن الحكايات تجعل الرحلة أجمل دائمًا”.

في الكتاب نجح عمر طاهر يمزج بين الضحك والهم، بين الخوف من بكرة والأمل، كتب عن أغاني وحكايات وتفاصيل من الماضي وربط بينها وبين الحاضر بطريقة بتدل على موهبته في الكتابة.

حكى لنا عن نفسه بطريقة تخليك تحس أنه بيكلمك عن نفسك أنت، كلمنا عن أسرته البسيطة وعن همومه وأحلامه اللي بتتشابه مع هموم ومشاكل وأحلام كتير من المصريين.

كتب عمر بطريقة إنسانية جدًا عن مشواره في التعليم والصحافة ونجح يبروز كل التفاصيل الصغيرة ويصنع منها لوحة جميلة ممكن تخليك تعيد تفكير في تفاصيل كتير في حياتك أنت شخصيًا.

أسلوب الكتابة عميق رغم رشاقته وخفته، والكتاب فعلًا تقدر تنهيه في قعدة واحدة وأنت رايح أي مشوار أو مسافر، هتلاقي نفسك مش قادر تسيبه غير لما تخلصه.

ببساطة الكتاب عبارة عن رحلة كاتب شاب بتاخدك لعالم واسع بطريقة أقرب للدردشة.

من الكتاب:

“يخاف الواحد أن يكبر لأسباب كثيرة فى مقدمتها شعوره أنه لم يفعل مايريده بالظبط ولكن تورط فى أشياء كثيرة تشبهه..ينتظر اللحظة التى ستكون فيها السعادة خرافية…ويود ان تأتيه مبكرًا بحيث يكون متاحاً له أن يفرح بها بجنون يليق بسن صغيرة”.

“التنفس دليل على حياة طبيعية عادية…لكن الحياة غير العادية متعلقة باللحظات التى لم تكن قادرًا فيها على التنفس”.

وأخيرًا..

الكتاب ده عامل زى كوباية شاي بالنعناع ساعة العصرية على قهوة بلدي مع حبايبك وأصحابك، أو في بلكونة بيتك. وعمر طاهر قادر جدًا أنه يسعدك ويكون صاحبك في رحلتك في الطريق.

تقدروا تسمعوا الأغاني اللي اتكلم عنها المؤلف في الكتاب من هنا.