The Definitive Guide to Living in the Capital , Cairo , Egypt

من أهم الطقوس  عيد الحب هي اننا نجيب للي بنحبه هدية أيًا كانت قيمتها، ومن أهم الفنون اللي بنحتجها في اليوم ده، هو فن اختيار الهدية دي، لإن الهدية معناها دايمًا أكبر من قيمتها، معناها انك بتفكر اللي بتحبه وبيحبك بالحب اللي بينكم، وبتجددوا سوا اللي بينكم، وبتفتحوا سوا صفحة جديدة.

وعلشان اختيار الهدية بيكون بداية لصفحة جديدة، يبقى مفيش أحلى من صفحة حب ورومانسية بتحكي عن مشاعر صافية وهادية وراقية، ولما قعدنا في كايرو 360 ندور على هدية بالمعنى ده، مالقيناش أحسن من “رواية رومانسية” ممكن تكون صفحتها ملهمة وبداية لصفحة جديدة من حياتنا.

وفي الموضوع ده حاولنا نجمعلكم أكتر 5 روايات عربية رومانسية تنفع تكون هدية في عيد الحب، وتنفع لصفحة جديدة من حياة كل اتنين شركاء في الحياة:

• فلتغفري – أثير عبدالله النشمي:

واحده من أجمل الروايات الرومانسية العربية، أبطالها “عزيز” و “جمانة” بيعيشوا وعيشونا معاهم في قصة حب فيها عشق وتضحية في نفس الوقت.

الرواية كان ليها جزء أول اسمه “احببتك أكثر مما ينبغي” لكن في “فلتغفري” وجهة نظر عزيز وتعبيره عن حبه لجمانه كانت مليانة بالتفاصيل والتناقض في الوقت نفسه وده هيخليك طول الوقت كقارئ محتار بين أنك تحب عزيز وتصعب عليك جمانة منه، ولا إنك تكرهُه وتطلب من جمانة إنها تبعد عنه.

• الأسود يليق بكِ – أحلام مستغانمي:

الأسود في الرواية دي بيرمز لحالة الحب فيها، للصراع الداير بين ست “هالة” مطربة جزائرية عايزه الحب كاحساس جميل وراقي، وبين راجل – رجل الأعمال اللبناني- “طلال هاشم” اللي عايز يقيم المشاعر دي بالفلوس والنفوذ.

الرواية كعادة كتابات “أحلام مستغانمي” فيها لمسات من تاريخ بلدها الأم “الجزائر”، لكن في نفس الوقت مش هتحس أبدًا وانت بتقرأ إن الأحداث التاريخية اللي بترويها مالهاش لازمة في الرواية أو حشو وخلاص، لا بالعكس، ده هتديك معلومات على الماشي كده عن تاريخ الجزائر وشعبها.

• الحب في المنفى – بهاء طاهر:

بطل الرواية دي ممكن أوي يكون انت، علشان كده عمنا “بهاء طاهر” ساب البطل من غير اسم، وباختصار شديد، الرواية بتحكي عن إن ازاي الحب والحرب ممكن يتقابلوا في شخص واحد، وازاي يقدروا يغيروا ويبدلوا من حياة الأشخاص، وإزاي إن حاجه منهم “الحب أو الحرب” ممكن ينفي الإنسان عن نفسه والحاجه التانيه .

• انكسار الروح – محمد المنسي قنديل:

الرواية بتتناول علاقة “الحب” بين الطرفين بشكل مختلف وبسرد مميز، في حزن وشجن في أحداثها، فـ “علي” بطل روايتنا، عاشق ولهان بيحاول يداري انكساره بالحب، لكن في الحقيقة الحب مش هيعمل حاجه غير إنه هيزود انكسار “علي” على إيد “فاطمة” اللي بتلعب بكل أنانية بمشاعر علي، وبتلعب بكل نداله على انكساره.

• قيد الفراشة – شيرين سامي:

الكاتبة شيرين سامي أبدعت في الرواية دي في وصف المشاعر الإنسانية بدقة وامتياز، وقدرت تجسدها وتخليك تعيش مع أبطال روايتها.

وصفت اللي بتحس بيه الست في كل موقف وعلى اختلاف الشخصيات، فشخصية “عالية” بطلة روايتنا كانت عايشه واقع صعب مرت به بنات كتير، بس “عالية” هتختار عالم الخيال علشان تنسى واقعها ده شوية.

بطل الرواية “حسن” يخليك تحبه ونفسك تقابله، أما نهاية الرواية فتنتمي لنوعية النهايات المفتوحة، وانت وخيالك.