-
روايات
-
من الآن
-
عربي عربي
-
40 EGP
-
مكتبات وسط البلد
Ahmed Abd El Gawad
"أكره نفسي لكنني أحبني أنا، وأكره كل من يسقي بذور الكبر بداخلي أو يوقظ مكامن الشر الخاملة، وأحب من يرعى أشجاري الموجودة سلفًا ولا يغطيها بالظل".
بلغة منمقة هادية وشخصيات معقدة ومركبة، ونفسيات كثير، وتفاصيل من الأحاديث مع النفس، وحاجات كثير داخلة جوه بعضها.. قررنا نبدأ بجزء من الرواية واللى مكتوب على ظهر الغلاف وكلها حاجات ضد بعض بـ توضح لنا الشخصية اللى معانا في الرواية وده واضح من الجزء المكتوب، وواضح كمان طوال ما بـ تقرأ الرواية، جرب بس تدخل معانا في رحلة رواية "عشق".
"عشق" رواية مفاجأة يعني أول ما هـ يقع نظرك عليها هـ ييجي في دماغك عشق الحبيب لحبيبته وده الإحساس اللى فضل مسيطر علينا لغاية ما قرأنا جزء كبير من الرواية واكتشفنا أن بطلنا بـ يعشق ذاته وبس وتعالوا بنا نشوف…
نادر منصور شاب في منتصف العقد الثالث من العمر كاتب روائي ورواياته مرشحة لجائزة القائمة الطويلة للبوكر.. ويا سلام على وصف الشخصية هو وسيم ورياضي… ونقدر نقول من الآخر أنه شايف نفسه على الآخر لما بـ يمشي في الشارع بـ يقول: "يا أرض اتهدي ما فيكي قدي"، مهتم جدًا بمظهره الخارجي مع كل ده ربنا رزقه بموهبة قراءة لغة الجسد ويقدر يقرأ تعبيرات الوجه.
عارفين المثل الشعبي اللى بـ يقول: "قيراط حظ ولا فدان شطارة".. هو ده بالضبط اللى حصل مع نادر اللى تم استضافته في برنامج مقالب وهو اكتشف المقلب لكنه عاش الدور واشتهر من ساعتها بشجاعته لغاية ما بقى مدير دار نشر كبيرة.
السؤال اللى بـ يطرح نفسه دلوقت إيه اللى بـ يميز عشق عن غيرها من الروايات؟ خد عنك.. أسلوب الكتابة والحكي من الراوي العليم كأنه حكى عن نفسه أو واحد بـ يفضفض، واللغة السهلة والمنمقة في نفس الوقت، وحالة العشق المختلفة من عشقه لنفسه، لعشقه للبنوتة اللى بـ تحب غيره، ومحاولاته للتقرب منها، بـ تخليك وأنت بـ تقرأ في حالة غريبة، مش عارفين هل هـ يستمر لحبه لشخصه وذاته، ولا حبه للبنت اللى حبها ومش عارف يقرب لها، علشان هي بـ تحب شخص ثاني، دواير داخلة جوه بعض وكلها بـ تودي لبعض وبـ تصب في النهاية عند البطل اللى بـ يحكي لنا عن نفسه ومآساته واللى بـ نعرف من خلال سرد المؤلف أنه أخذ منه وقت طويل علشان يقدر يكتب بالشكل ده.
