The Definitive Guide to Living in the Capital , Cairo , Egypt

وزى ما رانيا قدرت تخترق التفاصيل الدقيقة، قدرت كمان ترصد اختراق الأشياء للإنسان وده طبعًا مغاير للمعتاد لأن فى العادى الإنسان هو اللى بـ يرتبط بالأشياء اللى بـ تمثل له ذكرى معينة أو منفعة، لكن رانيا أضاءت زوايا مظلمة فى الاتجاه ده من الكتابة ورسمت المشاهد اللى بـ تعبر عن العلاقة الندية أو الحميمية أحيانًا بين الإنسان والأشياء، وقصة “ثنائى” من أكثر نصوص المجموعة اللى بـ تعبر عن العلاقة دى فبـ تقول رانيا وهى بـ توصف العلاقة بين عامل النظافة ومقشته: “جذب يدها، أسندها إلى ظهره وأطبق بيده الأخرى على كوب الشاى. هى أبدًا لا تمانع سيرها معه يوميًا ممشطين الطريق ذهابًا وإيابًا وكأنهما يخشيان عليها من روادها”.  وهـ نلاحظ فى كل نصوص المجموعة بساطة اللغة وده بـ يتناسب مع الفئات المجتمعية اللى بـ تعبر عنها، وفى نفس الوقت اللغة بعيدة عن الركاكة.
ونفس الحال بالنسبة للتصوير فلا وجود للصور المعقدة أو الخيال المتشابك. وفى “دوار البر” الأبطال مش الأشخاص والمكان واللغة والأحداث بس، ده فيه بطل مهم جدًا وهو المشاهد السينمائية اللى رسمتها رانيا فى القصص بحرفية عالية وفى رأينا أن المشاهد دى هى اللى بـ تفتح مساحة من التفاعل بين القصص والقارىء لأنها بـ تكسر حدة الملل فى القراءة وبـ تخلينا ندخل داخل النص بخيالنا.
وده بـ يتضح فى معظم نصوص المجموعة، فمثلاً رانيا بـ تقول فى نص “مناديل الورد”: “بخبرة محترف يعرف كيف يتحكم بملامح وجهه الملطخة بغبار الطرق، يجلس بجانب المطعم الشهير منزويًا فى أحدى الزوايا الملاصقة لمكب النفايات، راسمًا على وجهه نظرة أسى وهو ينظر للطعام من وراء زجاج المطعم باشتهاء وللمارة بتسول ورجاء”.
امتلاك رانيا للكثير من أدوات التأثير فى المتلقى بـ يخلى المجموعة إشارة مرور للمشاعر وهى اللى بـ تسمح بمرور انفعالات معينة وتوقف أخرى. يعنى ممكن نقول أن “دوار البر” كماشة اللى بـ يفتح أول نص مش هـ يسيبها إلا فى آخر نص. ولا شك أنها هـ تسيب آثارها. وساعتها بـ يكون تحقق الهدف من الكتابة.
فى النهاية المجموعة تحمل كثير من النبل فى التعبير عن فئات مهمشة داخل المجتمع وحاولت القاصة طوال القصص الـ 15 أنها تخترق مشاعرهم بهدف الكشف عن الجوانب المظلمة فى حياتهم بالنسبة لنا ومن الممتع والنبيل أنها حافظت على الصورة العامة للفئات دى حتى أنها ما قالتش على لسان الأبطال أى ألفاظ سطحية أو مسيئة وده زاد من الإمتاع فى القصص.