The Definitive Guide to Living in the Capital , Cairo , Egypt

كتب: محمد تهامي

زي ما إحنا متعودين في كايرو 360  بنكلمكم عن الكتب الجديدة اللى ممكن تكون مفيدة للناس واللي تقدروا تتعلموا منها وتخلي حياتكم أحسن، علشان كده قررنا نتكلم عن كتاب الكاتبة شيماء الجمال، واللي بالتأكيد هيساعد ناس كتير على إعادة تنظيم حياتهم النفسية والبدنية للأفضل.

الكتاب بيعرض لتجربة شيماء الذاتية، واللى اتكلمت عنها بشجاعة نادرة، وكشفت لنا إزاي قدرت تنجح في أنها تعيد تنظيم حياتها بشكل أفضل، وتواجه صعوبات كتير مرت بها طوال حياتها. واللي بيميز شيماء ككاتبة، غير تجربتها الغنية، هو إنها بالفعل قرأت كتب كتير جدًا في عالم التنمية الذاتية.

غلاف الكتاب كان مبهج وفني جدًا، والألوان كانت معبرة بدرجة كبيرة عن فكرة الكتاب، لوحة فنية بتقول لنا إننا هنتعرف في الصفحات الداخلية على “حتة” من الكاتبة.

بتعرف شيماء نفسها في بداية الكتاب بإنها ست عادية ممكن تتكعبل فيها في أى مكان، وإنها مؤمنة إن حياة كل شخص فينا وأفكاره ممكن تتعمل كتب وأفلام سينما، وإن كل واحد فينا عنده من الأفكار والأحلام و الرؤى ما يكفي لأن يكون مصدر إلهام لناس كتير، بنعرف كمان من صفحات الكتاب إن شيماء بتكتب من وهي عندها 10 سنين، وبتعرف تخرج  أفكارها ومشاعرها للناس من غير أي قيود، وده جزء كبير من تحقيقها لسلامها النفسي.. الكتابة عندها مش فعل اختياري، فعل إجباري زي التنفس بالظبط.

“أنا أعتقد إنى هفضل لحد ما أموت أمشي ورا الصوت اللى جوايا مهما حصل”

تعتبر الكتابة الذاتية هى الملعب المفضل لشيماء وهي بتعرف تحقق  نجاحات فيه من أول كتابها الأول “تاء مربوطة” وبعده كتابها الثاني “أنا حامل” وصولًا لكتابها الأخير “حتة مني”، شيماء كمان عندها متابعين كتير على صفحتها الشخصية  على الفيسبوك بيهتموا بالتجارب اللى بتقدمها في حياتها بشكل شبه يومي، وهي بتتكلم دايمًا عن الحياة والعلاقات الصحية، وإزاي تقدر تعيش حياتك بشكل مستقل وتبقى راضي عن نفسك، وازاى توصل لمرحلة السلام النفسي اللي كتير مننا بيحلموا بالوصول لها.

“علمتنى الموسيقي كيف أكتب لك، كيف أشاركك أفكار الوحدة هذا المساء”

الكتاب بيتناول العلاقات الإنسانية بشكل بسيط وسهل وممتع في نفس الوقت، وبتتكلم فيه شيماء عن إزاي بيحصل الارتباط والحب وإيه الكيميا اللى بتتغير في الجسم مع كل مرحلة، والمشاكل النفسية اللى بيعاني منها الرجل الشرقي، وإزاي كانت بتواجهها مشاكل لما رجعت من المملكة السعودية لمصر وكانت حاسه إنها غريبة، وبعتبر نفسها كانت غريبة فى السعودية وغريبة كمان في مصر.

“أشكر الناس اللي سابوك تعافر كتير لوحدك”

الكاتبة بتحكي لنا في الكتاب عن تجارب كتير في حياتها، زي تجربة فقد الوزن، وإزاي قررت تخس وتعيش حياة صحية، وبالفعل نجحت تحول حلمها لحقيقة وواقع، والحقيقة الجزء ده تحديدًا من الكتاب بيعلمنا قاعدة مهمة، مش مهم توصل بسرعة لأي حاجة، المهم توصل إزاي للحاجة دي. يعني أسرار تحويل أي حلم لحقيقة.

في كتاب “حتة مني” شيماء قدرت تكون مختلفة وتكتب عن نفسها بصراحة شديدة، واستفدنا  منه على المستوى الإنسانى كتير جدًا، الكتابة يعتبر درس إزاى ممكن الواحد يعدي كل الأزمات ويتعلم منها ومتعلمش عليه.

“أغمض عينك و ابدأ من اليوم تخيل روحك المحلقة في جسدك الجديد الذي ستنحت خطوطه ثنياته كلها بنفسك،والذي تحاربه وتحفظ مداخله ومخارجه وطرقه السرية حتى تنتصر عليه في معركة أنت فيها جندي يحارب منفردًا”

في النهاية بننصحك تقتني الكتاب ده لإنه أكيد هيفيدك وهيغير نظرتك لحياتك و هيخلى حياتك أحسن و إحساسك بالحاجات مختلف.