The Definitive Guide to Living in the Capital , Cairo , Egypt

“اللاجئون القادمون من الشرق الأوسط إلى أوربا الشمالية،
الضغوط والحلول” كتاب عنوانه طويل شوية وقصته غريبة جدًا، صاحبه مهاجر أفريقي
من السودان، عرف معني أن الإنسان بين يوم وليلة يتحول من إنسان عادي عايش في بلده إلى
لاجئ، ويعني إيه حد في ظروف صعبة، فـ فَضل يكتب القصة مش من خلال رواية ولا قصة
ولا سيرة ذاتية، لكن من خلال إرشادات ووصف مكتوب بحس إنساني رائع.

الكاتب عايش في
أمستردام بهولندا، حاول أنه ينشر كتابه عبر دار نشر عربية، وحاول يبحث على
الإنترنت عن ناشر، لكن البحث عن دار نشر على الإنترنت بـ يعرض ناس كثير إما لعمليات
نصب أو سرقة للأعمال الإبداعية، لذلك وبعد ما يأس من أنه يلاقي دار نشر تنشر
الكتاب وعلشان هو مؤمن أنه كتاب مهم المفروض الناس تقرأه، أتاحه مجانًا على
الإنترنت يقدروا يدخلوا عليه ويحملوه براحتهم، ممكن تعمل عنه بحث وتجيبه تحمله.

الكتاب مسلي، رغم أن
يمكن ما حدش فينا ممكن يفكر في يوم أنه بين ليلة وضحاها ممكن يتحول لا قدر الله
إلى لاجئ بين الدول، لكن حتى لو ما بقيتش لاجئ فمش غلط تعرف يعني إيه لاجئ، يعني إيه
شخص بـ يعيش على الحدود بين الدول لفترات ممكن تمتد لسنة واثنين وثلاثة علشان يتقبل
في الدولة اللي رايحها، يعني إيه يعيش في معسكر، الحالات النفسية اللي ممكن يتعرض
لها اللاجئ، والمشاكل الكثير، وإزاي ممكن يتغلب عليها، إزاي ممكن يتعايش مع الظروف
الجديدة.

مش مجهود الكاتب بس هو
اللي خرج الكتاب، لكن ساعده في كتابته مييف موينيهان وجون أندرسون، وحررت النص
العربي جميلة كمال، ومن خلال الكتاب تقدر تعرف الحقوق والواجبات الجديدة اللي تم
منحها للاجئين، ويعني إيه طلب لجوء، وإمتى بـ ينتهي الوضع كلاجئ، ومين هم الفئات
المستبعدة من الحماية الدولية، ويعني إيه اندماج وانصهار، حقوق اللاجئ وواجباته في
المعسكر، وإزاي ممكن اللاجئ يدير وقته داخل المعسكر خلال فترة نظر طلب اللجوء،
ويتعامل مع اللي حوله ويتحكم في التفاعل مع الناس.

أحلى حاجة أنه بعد كل
فصل فيه خلاصة تلخص لك الفصل كله، والأحلى أن صاحب الكتاب مش عاوز فلوس، لكن عاوز
ينشر معرفة ما ويساعد الناس. وفعلاً بكتابه هـ يساعد كل شخص يقرأه، لأنك لو ما كنتش
لاجئ محتاج تعرف التعليمات فهـ تعرف قيمة وجودك في بلدك كمواطن لك كامل الصلاحيات
والحقوق، وهـ تحس بالنعمة اللي أنت عايش فيها، وكمان هـ تستفيد على المستوى الشخصي
من بعض الفصول اللي بـ تتكلم عن تنظيم الوقت، وإدارة الحياة والتأمل والاسترخاء،
والقراءة والتعلم، والتعامل مع الآخرين والاقتصاد في المعيشة.