The Definitive Guide to Living in the Capital , Cairo , Egypt

رواية
بـ تدور أحداثها بين شخصيتين: الآنسة بيلين والسيدة العجوز روزيلا، وبرغم أن الرواية
فيها أحداث تخص شخصيات كثير لكن الحوار بـ يدور بين بيلين وروزيلا فقط.. بيلين
طالبة بـ تدرس الأدب الفرنسى وروزيلا سيدة عجوز بـ تعيش مع خادمتها ومصابة بمرض
النسيان لكنه بـ يحاصرها ببطء، وفى محاولة للحفاظ على أجمل ذكريات عاشتها فى
حياتها مع زوجها وأهله فى تركيا، علشان كده عملت إعلان في جريدة تطلب شخص يجيد
اللغة التركية وطبعًا فوجئت بيلين أن وظيفتها هى مجرد الجلوس والكلام مع السيدة
روزيلا باللغة التركية فى أى موضوعات فى الحياة علشان تحافظ على لغتها وبالتالى
ذكرياتها فى تركيا.

بـ تحكى
روزيلا عن زوجها وقصة تعارفهم وصعوبات زواجهم لأنه يهودى تركى “شرقى”
وهى يهودية ألمانية “غربية” والمعاناة اللى عانوها فى ألمانيا بسبب هتلر
وانتقالها لتركيا لأهل زوجها ورجوعه لها بعد 5 سنوات يعنى بعد انتهاء الحرب العالمية
الثانية.

بيلين
بـ تحكى هى كمان عن حياتها وعن والدها الثرى اللى بعتها للدراسة فى مدينة أوربية علشان
يتخلص منها ومن مشاكلها اللى بـ تسببها له مع كل واحدة بـ يتزوجها والمشاكل دى
دائمًا بـ تنتهى بالانفصال، لكنها حتى فى سفرها بـ تظل ناقمة على والدها اللى بعث
وراءها واحد يراقبها ويبعث له تقارير عنها وده اللى دفع البنت أنها تدور على وظيفة
علشان تحاول على قدر استطاعتها أنها تستقل عنه ماديًا زى ما استقلت بسفرها
ودراستها، لكن الشاب المكلف بمراقبتها بـ يقع فى حبها وبـ يبطل يراقبها فى الوقت
اللى هى فاقدة فيه الثقة فى الحب والزواج وكل المشاعر النبيلة اللى قائمة عليها
علاقات البشر، وبـ تفضل أنت كقارئ بـ تدور على باقى التفاصيل فى حكاية روزيلا اللى
بـ تحكى عن الماضى وبيلين اللى بـ تفكر فى المستقبل والابتعاد عن والدها وده بـ يخليها
تستغل حب كل شاب بـ يقترب منها لأنها ما بـ تؤمنش بالحب من ناحية ولأنها بـ تعتقد
أن هو اللى عاوز يستغلها من ناحية ثانية، وبرغم كده بـ نلاقى من خلال الحكى أن
أحلام الناس ومشاعرهم ودعواتهم متشابهة جدًا برغم اختلاف الديانات
ودى الفكرة الأساسية للعمل.

الرواية
بـ تمر بخفة وسلاسة على بعض الأحداث التاريخية وتأثيرها على الحياة الاجتماعية وزى
ما بـ يقول المترجم أنها مش مقيدة بمكان أو ثقافة معينة، والرواية بـ تثبت من
ناحية ثانية أن الفن التركى مش بس فى المسلسلات اللى اكتسحت الشاشات لكن كمان
الأدب التركى بدأ يُترجم ويبقى عليه إقبال خاصة الأعمال المجردة اللى بـ تتكلم عن
الإنسان أيًا كانت ثقافته أو مرجعيته أو البلد اللى موجود فيها.