The Definitive Guide to Living in the Capital , Cairo , Egypt

في الفترة الأخيرة قرينا كتب كتير عن العلاقات الإنسانية، وإزاي نفهم نفسنا ونفهم العلاقات اللي بندخل فيها بشكل أفضل. واحد من الكتب دي، “البسكوتة والدحلاب” لشيماء الجمال. اللي بيميزه إنه مش مجرد كتاب بيضم نصايح وملاحظات الكاتب، لكنه دليل كامل لواحدة من العلاقات الصعبة والمعقدة اللي بتحصل لناس كتير. من غير ما يفكر حد إنه يكتب عنها أو يشرحها. شيماء بقى كتبت عن العلاقة المعقدة بين البسكوتة والدحلاب.

علشان نفهم أكتر. لازم نفهم أن “البسكوتة” المقصود بيها البنت، اللي بتدخل علاقة مؤذية لها. ومش بتقدر تخرج منها، علشان الموضوع شبه بيتحول لإدمان. أما “الدحلاب” فالمقصود به الطرف الثاني في العلاقة. وهو الرجل اللي بيدمن وجود البنت جنبه، يحاول طول الوقت يسيطر عليها ويؤذيها.

غلاف الكتاب يعتبر واحد من أحلى الأغلفة اللي شوفناها في معرض الكتاب 2019. المميز في الغلاف إن تم تصويره بشكل حقيقي، يعني مش مرسوم أو مصمم بالكمبيوتر. وبنشوفه فيه بنت على شكل عروسة ماريونيت، وبيتحكم فيها الدحلاب بخيوط. اللافت إن العروسة دي هي نفسها شيماء مؤلفة الكتاب. واستعملت شعر مستعار، ومكياج أستغرق حوالي 4 ساعات كاملة.

الكتاب منقسم لـ 3 أقسام أساسية: البسكوتة – الدحلاب – التعافي. كل قسم باين من عنوانه. والتقسيم ده بيسهل القراءة جدًا، وبيخلي الكتاب أمتع في القراءة.

الكتاب بيقدم جرعة مكثفة من المعلومات، بأسلوب سهل على القاريء. الكتابة فيه سلسة واللغة عامية. يعني مافيش كلام تقيل ومعقد. وفي نفس الوقت مش كلام سطحى أو تافه.

كان واضح الاهتمام بتفاصيل الإخراج الداخلي للكتاب. علشان يقدم أفضل وإسلوب عرض للقاريء. كمان الكتاب بيتفاعل مع القراء من خلال شوية أسئلة، خصص مناطق لإجاباتها في الصفحات. علشان يقدر القارئ يختبر نفسه في المواقف المختلفة.