The Definitive Guide to Living in the Capital , Cairo , Egypt

“قد تكون مغامراتنا ونزواتنا العاطفية أحيانا ليست سوى سبيل لتكوين ضمانات ضد الفراق، فلا نذوب احتراقَا إن فاتنا حبيب.. لأننا نملأ أدراجنا بالبدائل التسكينية تتمثل في تشكيلة ندخرها من” الأحباء المحتملين!! وبعض الدنجوانية ليست سوى علامة على خوف الوحدة.. وبعض التعددية قد تنبع من كوننا نشعر بأننا لا نستحق الحب.. فنسعى لتجميع الأدلة على نقيض هذا الشعور البغيض بانعدام القيمة”.

السطور اللي فاتت جزء من رواية اقتحام اللي صدرت مؤخرًا عن دار نهضة مصر للكاتب د. عماد رشاد عثمان وإللي تعتبر من الجمل المحورية في الرواية لكشف نفسية الراجل الدونجوان أو متعدد العلاقات.

بتدور أحداث الرواية حول حسن طبيب الأسنان الشاب متعدد العلاقات إللي بيقرر يزور طبيب نفسي بهدف التعافي.. الرواية أغلب أحداثها وحوارهتا بتدور بين حسن والدكتور، ومن خلال الرواية بنقدر نكتشف حاجات كتير ومهمة عن علاقة الرجل بالمرأة، وطبيعة شخصية الدنجوان، وليه الشخصية دي موجودة في حياتنا، وكمان بنتعرف على أشهر الحيل إللي بيستخدمها الراجل الدونجوان للإيقاع بضحاياه من الستات. علشان كده بنعتبر الرواية دي عمل أدبي مرشّح وبشدة للسيدات في المقام الأول.

في رأينا الرواية دي تميزت لثلاث أسباب: السبب الأول إن الكاتب اختار يكتب في تخصصه وفي مادة هو عنده منها ما يكفي إنه يدي لك جرعات من الإفادة وإنت بتقرأ يعني لو كاتب عادي كتب الرواية دي أكيد مكانتش هتكون بنفس القوة في النقطة دي. السبب التاني إن الكاتب راعى طبيعة الرواية وراعى إنها عمله الأول فماعملش غلطة بيعملها كتير من الكتاب في رواياتهم الأولى، وهي إنه يقحم لك شخصيات كتير وأزمنة كتير في الرواية.. كُتاب كتير بيقعوا في الغلطة دي في أعمالهم الأولى وما بيكونوش لسة وصلوا لدرجة عالية من الحرفية في الكتابة الروائية ووقتها القارئ بيتوه.. على العكس في رواية اقتحام هنلاقي شخصيات الرواية قليلة وبتدور في ركن الماضي والحاضر والمستقبل بشكل سلس لا يرهق الكاتب ولا يرهق القارئ.

السبب التالت لتميز الرواية دي هو بساطة أسلوب كتابتها. على الرغم من إن كاتبها -بسبب دراسته بكلية دار العلوم- يقدر يصعب الأسلوب زي ما هو عاوز إلا إنه واضح إنه قرر يسهّل على القارئ اللغة وإن كان الكاتب استطاع ببراعة ومراوغة إنه يدس لك بعض الجمل والتشبيهات إللي بيستعرض فيها عضلاته اللغوية.. القارئ المحنك هيتبسط منها لكن القارئ المبتدئ مش هيكون متضرر ولا ضايع معاه.

الرواية فيها جُمل حلوة.. تنفع تكون عبارات مأثورة لكل وقت.. ما قدرناش نمنع نفسنا وإحنا بنقرأ من إننا نمسك القلم ونعلّم بيه على جمل كتيرة حلوة.

“الفراق تماما كالتعافي من الإدمان.. له أعراض انسحاب مؤلمة بما يكفي لتضطرب وظائفنا الحيوية.. والحياتية”.  هنختم مقالنا النقدي بالجملة دي وإحنا مبسوطين إنه فيه عمل روائي أول لطبيب شاب قدر يكون متكامل الأركان، مفيد وممتع في نفس الوقت.