The Definitive Guide to Living in the Capital , Cairo , Egypt

كلنا عندنا مشاكل نفسية، ماتقلش في ضررها عن أي مشكلة عضوية، لكن ثقافة الطبيب النفسي مش مقبولة في مجتمعنا لغاية النهارده، وحتى اللي بيحاول مننا يفهم نفسه أو نفوس الناس حواليه كثقافة وفكر، بيتفاجئ بكتب صعبة ومعقدة مليانة نظريات ومصطلحات تناسب المتخصصين بس.

لكن مؤخرًا كل ده اتغير مع محاولات تبسيط علم النفس من أساتذته والعاملين فيه، عن طريق كتب سلسة وسهلة هتفهمك أغرب الحقائق عن النفس البشرية، خباياها وأسراراها، ومنها اللي باللغة العامية الراقية المناسبة لروح العصر من غير إسفاف، كأنك ع الشيزلونج والدكتور قدامك فعلًا.

كايرو 360 بتقدم لك أروع التجارب دي سواء بالعامية أو الفصحى السلسة.

1- علاقات خطرة.. أخطر مما تتصور!

“العلاقات بين البشر هي أعقد حاجة في الدنيا.. مش بس أعقد.. لا هي كمان أخطر”

ده كلام مؤلف الكتاب على الغلاف الخلفي، د.محمد طه اللي تخصصه أصلًا في الطب النفسي كأستشاري وأستاذ جامعي، بيقول في المقدمة إن هدفه يوصل النظريات والثقافة النفسية بأسهل شكل ممكن وبالعامية، من خلال دراسته وتأملاته في الحالات اللي مرت عليه.

وفي كتابه بيناقش العلاقات بين الانسان وكل شيء حواليه من وجهة نظر علم النفس، من أول علاقة الانسان بجسمه، للناس اللي حواليه، ومشاكل العلاقات بين البشر المختلفين بطبيعتهم، مع استعراض 30 علاقة مختلفة أكيد هتلاقي نفسك في واحدة منهم.

الكتاب مليان أمثلة من أفلام ومسلسلات معروفة، على أساس تفهم النظرية العلمية بمشهد شهير وواضح، حتى المصطلحات النفسية كان بيتم تفسيرها على طول لدرجة انك هتخلص الكتاب وأنت عارف يعني إيه النكوص والكتاتونيا وخلافه.

2- المخ ذكر أم أنثى؟ الفرق الأصلي بين الراجل والست

كتب كتير اتكلمت عن الفرق بين الجنسين من حيث الفهم والتعامل، وإزاي إن الزوج لازم يفهم إن دماغ مراته مختلفة عنه، الكتب دي كلها تقريبًا كانت تحت بند (التنمية البشرية)، والقائم على التجارب والخبرات ووجهات النظر أكتر من العلم المتقاس المحسوس، أشهر الكتب دي طبعًا (الرجال من المريخ والنساء من الزهرة).

لكن كتاب (المخ ذكر أم أنثى) بيتكلم من منطق علم النفس وشوية من الأحياء، تركيبة مخ الراجل والست ع الطبيعة، إزاي بيفكروا وكل جزء فيهم شغال في إيه، ليه عادات الرجالة مختلفة عن الستات، وليه الأتنين بينجحوا في حاجات وحاجات تانية النجاح فيها لجنس واحد بس منهم.

الكتاب هيفهمك كتير عن الجنس الآخر، والمرة دي كله مدعم بالعلم المعروف لأن مؤلفين الكتاب د.عمرو شريف ود.نبيل كامل متخصصين ومفسرين كل شيء للقارئ العادي بالفصحى لكنها ممتعة وشيقة جدًا.

3- التجربة الفكرية لروح أمه! كتاب نفسي جدًا!

 عناوين الكتب مؤخرًا بقت مميزة جدًا، في إنها تجذبك وتشد عينك ليها، فيه اللي بينجح في ده بشكل لطيف أو بشكل يضايق وتحسه مبتذل أو مُهين (مافيش داعي لأمثلة)! وسواء عجبك عنوان كتاب (التجربة الفكرية لروح أمه) أو لأ، أقدر أقولك أن المحتوى أكيد هيعجبك لو مهتم بعلم النفس، وفكرة العنوان ببساطة أن كل واحد مننا ممكن يكون حبيب وروح والدته لكن لازم يواجه المشاكل النفسية بكل ما فيها! 

المؤلف المرة دي دكتور جراح ومتبحر في علم النفس جدًا، هتعرف في كتابه ظواهر نفسية كتير بشكل مبسط جدًا في صفحتين أو تلاتة بالكتير، تجارب عجيبة جدًا في علم النفس، إزاي واحدة تموت قدام  38 واحد من غير ما حد يساعدها؟! وليه الألمان صدقوا هتلر بكل جنانه؟ وليه بعض البنات مستنية فارس أحلامها زي سندريلا وخلاص؟!

الكتاب كله بالعامية، ونقدر نقول أنه فعلًا هيفهمك كتير عن نفسك والناس بشكل سلس وشيق بروح العصر.

4- هي والأنا.. دماغ فرويد وشلته

المرة دي الكتاب في شكل رواية ممتعة تبع سلسلة اسمها (فانتازيا)، الكاتب د. أحمد خالد توفيق من أهم الكتاب الشباب، وبطلة السلسلة (عبير) كل عدد بتعيش مغامرة شكل، في العدد ده بالذات بتعيش مع علم النفس وبالتحديد فرع التحليل النفسي، يعني تفهم دماغك بتشتغل إزاي والمشاكل النفسية أصلها إيه، واللي درس علم نفس في ثانوي هيفتكر فطاحل العلم ده زي (فرويد)، لكن في القصة هيفهم العلماء دول أكتر.

(عبير) البطلة في القصة بيجيلها كوابيس، وبتروح للطبيب النفسي، الخيال بيشتغل وتلاقي عيادة فرويد نفسه! وبعدها بشوية بتلاقي عيادة الدكاترة المشهورين غيره زي (يانج) و(أدلر)، كل دكتور هيشرح لها نظرياته وفكره، ومنهم هتعرف يعني إيه (اللاوعي) و(العقل الباطن) و(مركب النقص)، هتعرف إن جواك 3 شخصيات بيتخانقوا دايمًا مين اللي يكسب!

5- أشهر 50 خرافة في علم النفس.. مش كل من فات قديمة تاه!

فيه مقولة بتقول (العلم دائمًا يبدأ بالخرافة)، ودايمًا ثوابت علمية كتير في كل فرع اكتشفنا إنها غلط، وفي كل العلوم هنلاقي الكشف الحديث بينفي كتير من القديم، زي أن الخفاش طلع بيشوف مش أعمى مثلاً! والمرة دي الكتاب مترجم، لكنه مشهور جدًا في أوساط المهتمين بعلم النفس مؤخرًا.

أول الخرافات فكرة أن الدماغ بيستخدم 10% من مخه واللي قام عليها فيلم لوسي، حكاية الحاسة السادسة اللي سمعنا عنها من صغرنا، خط إيدك بيكشف عن شخصيتك! وغيرها من الخرافات النفسية، الكتاب وجبة لذيذة هتغير مفاهيمك في موروثات كتير طلعت غلط عن نفسك.