-
تامر عبده أمين
-
واقعية
-
من الآن
-
عربي عربي
-
35 EGP
-
مكتبات القاهرة
Shaymaa El Gammal
في مقدمة كتابه الجديد بيقول الكاتب تامر عبده أمين جملة حلوة جدًا تعتبر هي مفتاح الكتاب ده: “كل واحد فينا بيمر يوميًا على الأقل بـ4 مواقف ينفع يتحكي عنهم.. الكل عنده إللي يحكيه.. بس مش الكل يقدر يخرّج اللي جواه.. اللي بيكون من الناس بيوصل بسهولة للناس”. هو ده بالظبط المنهج إللي اتبعه تامر علشان يكتب كتاب بالجمال ده. الكتاب عبارة عن مواقف إنسانية وقصص حقيقية سواء قصص عن مشاهير وأجانب أو مواقف من حياة الكاتب وكل مجموعة من القصص بتتكلم عن نقطة معينة، متعشق فيهم أغاني و Quotes ملائمة جدًا بالإضافة لوجهة نظر الكاتب الشخصية في نهاية كل فصل.
الحاجة إللي عجبتنا كمان إنه كل مصادر القصص مكتوبة بشكل مفصل في نهاية الكتاب. أولًا، على سبيل المصداقية وتحري الدقة. وثانيًا، علشان اللي حابب يقرأ أكتر قصص شبه المكتوبة بلغتها الأصلية يعرف يوصل لها. حتى المواقف اللي حصلت لفنانين زي مثلًا علاء ولي الدين أو محمد رمضان مكتوب هي اتحكت فين بالظبط.
الكاتب كمان بيقول في المقدمة: “الكتاب ده شوية فضفضة مكتوبين باللغة العامية وتم نشر بعض فصوله على فيسبوك. حصلت معظم قصصه في شهر نوفمبر باختلاف السنين والناس، وانتهت كتابته في آخر أيام نوفمبر”. وده طبعًا سبب تسمية الكتاب “آخر أيام نوفمبر”.
الكتاب بيتضمن كمان مجموعة من الرسومات الداخلية منهم رسومات للفنان روميو دافنشي واللي شكره الكاتب شكر خاص على لوحاته في الكتاب. الكتاب شدنا من أول غلافه اللي عمله كريم أدم ومن أول ما قلبنا فيه عشوائيًا قررنا نشتريه من معرض الكتاب على طول.
مواضيع كتير كتب عنها تامر بشكل صعب ما يلمسكش وأنت بتقرأ لأنها حاجات بتحصل معانا كلنا زي: الحب، الثقة، الأطفال، الصداقة، الرزق، الوعد، الجدعنة، الاعتذار، النصيب، الإخوات، الموت، الستر، جبر الخواطر..الحنية. مين فينا مش هتلمسه مواضيع زي دي خصوصًا وإنه القصص كلها إنسانية جدًا ومختارة بعناية.
من القصص المؤثرة قصة الفنان محمد رمضان اللي حكاها في برنامج “واحد من الناس” واللي بيحكي فيها عن بداياته وإزاي ماكنش عارف يتمم جوازه بسبب مشاكل مادية وإزاي جاله قلم هدية مرصع بالألماظ من معجب خليجي بعد عرض مسرحي وإزاي راح يبيعه لقاه بـ 150 ألف جنيه وقدر ساعتها يتمم موضوع جوازه وماكنش مصدق أنه ممكن الرزق يجي من ربنا بالسرعة دي.
لو بتحب الكتب السهلة في لغتها سواء كنت قارئ مبتدئ أو قديم، لو بتحب تقرأ قصص قصيرة، تدوين، مشاعر إنسانية فالكتاب ده مكتوب ليك أنت.
