The Definitive Guide to Living in the Capital , Cairo , Egypt

محبين القهوة كتير، وكل قهوة وليها كيالها، ولكن الأساس أننا بنحب القهوة وتفاصيلها من أول نوعية حباية البن حتى آخر رشفة، ومع القهوة بنحب يكون فيه حاجة حلوة معاها خاصة لو بنشربها بدون سكر أو اضافات، والنهاردة هننقلكم في تجربة متميزة مع كافيه Voska اللي فتح في منطقة المعادي أحدث فروعه وقررنا نخوض تجربة الحلويات والقهوة المتخصصة عنده، فياترى تجربتنا كانت إزاي، ده اللي هنقولكم عليه في السطور اللي جاية.

Vasko المعادي هو كافيه كلاسيكي بديكورات مميزة مريحة نفسيًا وبصريًا وبمساحة داخلية مميزة، وعندهم ايريا للمدخنين وواحدة تانية لغير المدخنين، مع كراسي وترابيزات مريحة وشيك، وكمان فيه ترابيزة عاملينها زي وورك سبيس للناس اللي حابة تقعد تشتغل وهي بتشرب قهوتها.

جربنا من عندهم قهوة V60  آيس وهوت وكان سعر الواحدة منهم 79 جنيه، وهما بيعملوا افتكاسات وبيخلوكم تختاروا نوع القهوة بنفسكم ولكن احنا قررنا نسيب المسئول يختار لنا بما أننا هنجرب، وخلانا نجرب الكولمبي وكان نعم الاختيار، القهوة مذاقها جميل ومرارتها قليلة والتقطير بتاعها مظبوط مديها شوية روقان خلونا مبهورين، وكمان لازم نشيد بفريق العمل اللي كان مميز وبيتعامل فريندلي.

كمان جربنا من عند vasko الحلو وبدأنا بهاني كومبو تارت وكان سعره 84 جنيه، والحقيقة هو طعمه زي الكحك البلدي يعني مكنش أفضل حاجة بالنسبة لينا، وكمان كانوا ضايفين عليه “سكر محروق”، وده خلى طعمه لازع بالنسبة لينا، أما تجربتنا للموفن بلوبيري كانت حلوة وعجبنا والريسبي بتاعه كان مظبوط وسعره كان 79 جنيه.

ولقينا عندهم تيرماسيو فقررنا أننا منفوتش الفرصة ونطلبه وكان سعره 125 جنيه، وطعم الكافيه فيه كان واضح ولكنه كان مسكر بزيادة بسبب أنهم كانوا حاطين فيه كريم كراميل واحنا محبناش ده لأننا بنحبه كلاسيك، ممكن يعجبكم لو بتحبوا الحلويات المسكرة بزيادة.

المكان يستحق التجربة كقعدة وكمشروبات وكخدمة وبننصح بيه جدًا.

تقدروا تعرفوا أكتر عنهم من خلال صفحة الفيسبوك من هنا.