5 حلويات رمضانية في القاهرة لازم تجربها قبل فوات الأوان
Habiba Salama
يا سلام على رمضان، شهر التأمل، التواضع والتحكم في النفس وكل الحاجات الروحانية الجميلة، بس كمان مش ناسيين أنه أكثر شهر بـ نأكل فيه ما لذ وطاب من الحلويات، المصريين ممكن يتنازلوا عن أي حاجة إلا حلوياتنا الرمضانية التقليدية اللي أهلنا بـ يأكلوها لنا قبل حتى ما يطلع لنا أسنان.
الحلوانية المعروفين في مصر قرروا بما أننا في عصر حديث ومتطور أنهم يعملوا تعديلات عصرية غربية على الحلويات اللي كلنا عارفينها وبـ نحبها زي البسبوسة أو الكنافة، إحنا هنا جمعنا لكم أجمد أفكار الحلويات الجديدة على السريع.
كنافة مالتيزرز في كرامبز كب كيكس أند مور
كرامبز قدر يبهرنا بـ تقديمه كنافة مالتيزرز، الاختراع الرائع اللي كل قضمة منه جميلة زي شكلها بالضبط، ننصحك تشتري كيكة لنفسك وواحدة ثانية للناس الباقيين.
كنافة مانجو من نولا كب كيكس
نولا دائمًا موجودة في المناسبات المهمة، ودخلت في دائرة الابتكارات الرمضانية الغريبة بـ تقديمها لكنافة مانجو لا تقاوم، ميزتها أن فيها فاكهة الصيف اللي كلنا بـ نحبها وكمان فيها بطيخ، وبكده تقدر تستمع بجرعتك اليومية من الفاكهة مع كنافة رمضان.
كنافة بقلاوة ريد فيلفيت من ديوكس
ديوكس بـ يساهم في جنون الحلويات الرمضاني بابتكارهم الجديد كنافة بقلاوة ريد فيلفيت، الفكرة هنا هي الجمع بين ثلاثة أنواع من الحلويات المحبوبة في مصر، فلو دخلت في غيبوبة سكر بعد الشر يعني فأكيد مش هـ تكون أسوأ طريقة لوداع العالم الصعب اللي إحنا عايشين فيه.
مهلبية بالبقلاوة والأوريو من نانتيز
نانتيز قرر يدخل في لعبة الحلويات من بوابة المهلبية بالبقلاوة والأوريو، من الآخر هي حلويات جميلة، في كب، وعلشانك لوحدك، مافيش داعي تشترك مع حد ثاني في طبق الحلو الصغير ده، استمتع به لوحدك، المشكلة الوحيدة أنك هـ تحتاج أكثر من واحدة علشان تشبع.
بسبوسة نوتيلا من باتر هاف & كو
باتر هاف & كو عمل اللي عليه واخترع لنا بسبوسة نوتيلا روعة، من شكلها ممكن يصعب عليك تأكلها من كثر جمالها، وتعتبر في الحقيقة أبسط طبق حلو في القائمة الجميلة –مع اعتذارنا طبعًا لكل الناس الصائمة اللي شافوا الكلام ده– بس في الحالة دي تحديدًا هي مش أقل من الحاجات اللي فاتت أبدًا.
تابعنا علشان تعرف أجدد الابتكارات من الإبداعات في حلويات رمضان.. بالهنا والشفا!
