The Definitive Guide to Living in the Capital , Cairo , Egypt

المخبوزات أو المعجنات من الحاجات اللي كتير مما بيحبها، خصوصًا لما تكون مصنوعة بحب وبخامات مميزة. إحنا في كايرو 360 اكتشفنا مكان في المعادي اسمه Ratios، بيقدم منتجات مصنوعة بمكونات جودتها عالية، وفي السطور الجاية هنقول لكم على كل التفاصيل اللي محتاجين تعرفوها عن المكان.

Ratios هو مكان متخصص في المخبوزات، لما هتشوفه لأول مرة هتحس أنه مكان عادي، ولكن الحقيقة هو فيه تفاصيل كتير مميزة، والقائمين على المكان مش مجرد موظفين، لأ، فيه جو أسري لطيف ومساعدة من الكل للجميع، وممكن تقعدوا على ترابيزة في الأوبن إيريا اللي هتنقلكم لعالم تاني وهتلاقوا بجد ناس بتشارككم الابتسامة والمحبة وكمان اقتراحات لمنتجات او مشروبات، وهما عندهم أصناف كتير جدًا، بس نصيحتنا في كايرو 360 اختاروا صنف واحد بس علشان المنتجات حجمها كبير، على الأقل بالنسبة لأكلتنا.

من أهم المميزات اللي في Ratios أنهم بيستخدموا أجود المكونات في المنتجات بتاعتهم، وتاني حاجة بيكون المطبخ أو “المعمل” مكشوف قدامكم وشايفين المنتجات وهي بتتعمل، وكمان بيوفروا مايكروويف علشان لو حابين تسخنوا المخبوزات بنفسكم، وكمان فريق العمل عندهم لطاف جدًا ودايمًا مبتسمين.

المكان بيفتح من 7:30 صباحًا حتى 2 ظهرًا، كل يوم ما عدا الأحد إجازة، وممكن تحجزوا قبلها بيوم المنتجات اللي محتاجينها أو تعملوا زينا وتروحوا بدري بالكتير 9:30 صباحًا علشان الويت ليست يكون قليل وهتلاقوا منتجات مختلفة ترضيكم.

جربنا من عندهم أصناف كتير أولها كان ساندوتش فيجتيريان وكان سعره 125 جنيه، وهو عبارة عن سندوتش خضروات وباذنجان بالجبنة الموتزاريلا وكان جوسي خالص ومقرمش قرمشة حلوة من بره وطري من جوا، وكان حجمه كبير مقدرناش عليه، ولو كنا حطيناه في الميكروويف كان هيبقى طري وحلو أكتر، بس إحنا حبينا التجربة وهو ساقع ومقرمش وانبسطنا منه.

كمان طلبنا سبانيش ديش وكان سعرها 60 جنيه، ودي بقى كانت عالم تاني من المخبوزات، طرية وطعمها حكاية وعليها سبانخ وبيض ومشروم، وحاجة آخر لذاذة، ونعتقد أن اللي عملها صنعها بكل حب علشان يسيب بصمة جوانا.

وكمان جربنا من عندهم فوكاتشيا وكان سعرها 50 جنيه، وهي عبارة عن عجينة بزيت الزيتون والبارميزان والطماطم وفيها إكليل الجبل، والطعم كان حكاية من الحكايات، وحقيقي تقدروا تعتبروها وجبة كاملة، ده غير اننا طلبنا كوكيز شيكولاته بـ35 جنيه، وصدق اللي قال “قد النملة ويعمل عملة” لأن رغم أنها صغيرة جدًا إلا أنها عظيمة! وهتكون أجمل مع مج الأمريكان كوفي اللي كان بـ 45 جنيه وممتاز في الطعم، أو اللاتيه اللي جربناه وسعره كان 55 جنيه وكان كريمي.

كمان قررنا نجرب من عندهم كيكة البرتقال بدقيق اللوز المتغطية بالشيكولاتة علشان نعرف منتجاتهم الصحية أخبارها ايه، وكان سعرها 200 جنيه، وهي مش غالية بالنسبة لمكوناتها وحجمها وطعمها المميز، وخلينا نختصر وصفها بجملة “أكاد من وصف الكيك أذوبُ”.

ماتنسوش أن المكان بيرحب بالحيوانات الأليفة في الأوبن إيريا، وهم عندهم خدمة التوصيل لأماكن محددة وتقدروا تتواصلوا معاهم علشان تعرفوا الأماكن من خلال الويب سايت من هنا.

أو من خلال صفحة الفيسبوك من هنا.