-
مساكن شيراتون - طريق المطار - منطقة طعام أواسيس د' هليويوليس
-
Basma Mostafa
ساحة
«أواسيس» الموجودة في مصر الجديدة في منطقة ألماظة تعتبر رسميًا أكبر ساحة طعام في
العالم وتم تسجيلها في موسوعة جينيس للأرقام القياسية. فيه حوالي 25 مطعم وكافيه
في الساحة دي لحد دلوقتي. رحنا «هولا كافيه – Hola Café» علشان نحضر حفل عيد ميلاد، ووقت ما رحنا كان فيه عيد ميلاد ثاني
في المكان وكان كل المدعوين أطفال عمرهم لا يزيد عن 6 سنوات وكانوا بـ يرقصوا مع
العرائس والمهرجين.
قعدنا
بعيد عن الدوشة طبعًا لكن اللي قاعدين جنبنا برضه كان سنهم صغير. وأخذنا بالنا أن «هولا
كافيه» مكان مفضل لناس كثير في تنظيم أعياد الميلاد. وقعدنا نغني أغاني عيد
الميلاد لحد ما ظهر مطرب قام بالغناء الحي وكان ظريف.
قعدنا
وقت طويل نتفرج على المنيو، وبعد تفكير عميق استقرينا على أصابع الموتزاريلا
المقلية لكن الجرسون اعتذر وقال أنها غير متوفرة، فطلبنا حلقات البصل بدلاً منها
(16 جنيه). معمولة بقطع الخس وصوص الكوكتيل اللي مكوناته بالنسبة لنا تعتبر مجهولة،
لكن حلقات البصل كانت لذيذة ومقرمشة.
فيه
شوربات طماطم (14 جنيه) وشوربة كريمة فراخ بالمشروم (17 جنيه) وفيه أطباق رئيسية
لحوم ودجاج وأسماك مع إضافات جانبية من اختيارك زي الخضار السوتيه والبطاطس المحمرة والمهروسة والأرز.
طلبنا
(هولا سالاد) اللي سعرها 30 جنيه؛ شريحة كبيرة من العيش المحمص محشوة بالفاصوليا
والخس والذرة الحلوة والدجاج المشوي والجبنة البارميزان والكابوتشا الحمراء، كانت
خفيفة على المعدة وسعراتها الحرارية قليلة وهي اختيار مثالي للناس اللي بـ تهتم
بوزنها وصحتها. بعد كده طلبنا ساندويتش اسمه Seville
أو
اشبيليه بالعربي وكان سعره (28 جنيه) وهو عبارة عن فراخ مشوية بالتوابل الأسبانية
اللي ادت الفراخ لون أصفر غريب وطعم مش حلو بالنسبة لنا.
جربنا
ساندويتش “هولا” وسعره 30 جنيه وكان فيه فراخ مشوية وسالامي وجبنة شيدر،
الجبنة كانت سميكة وفيها دهون كثير وسيبنا الساندويتش بعد أول قطمة! كل الساندويتشات
كان بـ يتقدم معاها كول سلو وبطاطس محمرة وطلعت وحشة قوي من غير تفاصيل كثير.
جربنا
طبق اسمه Pollo
Fajita (55 جنيه) وكانت
الفاهيتا مقدمة على طبق على شكل سمكة مع حلقات الفلفل الأخضر والبصل وكمية الفراخ
كانت قليلة وحسينا كأننا بـ نأكل طبق خضروات فقط. وبالنسبة للحلويات كان فيه
اختيارات كثير منها التشيز كيك (23 جنيه) وكيك الشوكولاتة (22 جنيه) وآيس كريم بـ
7 جنيه البولة لكن كان لازم نأكل تورتة عيد الميلاد بدل أي حاجة ثانية.
