The Definitive Guide to Living in the Capital , Cairo , Egypt

شارع 9 معروف بأنه من أفضل الأماكن اللي تفطر فيها الصبح أو تخرج فيها بالليل، مش بس علشان معظم الأماكن فيها ديكورات مميزة، لكن كمان طبيعة الشارع بالأشجار اللي فيه بـ تخلي له جو خاص جدًا، والنهارده جربنا نروح نفطر في واحد من الكافيهات القديمة هناك واللي ما كتنباش عنه من 2013، وهو هاريس كافيه – Harris cafe.

المنيو كبير جدًا مش بس فطار، فيه كمان كل أطباق الغداء العادية والمقبلات والحلويات، بس وقت زيارتنا كان الصبح، ولما شوفنا منيو الفطار كانت فيه اختيارات متعددة ما بين الفطار الإنتركونيننتال (كرواسون ومافن وقهوة وزبدة ومربى) وما بين أنواع البيض المختلفة سواء بالمشروم أو الجبنة أو السلامون المدخن والكلوب ساندويتش.

طلبناCheese Omelette  بـ 33 جنيه وClub Sandwich بـ 40 جنيه، وعصير برتقال (24 جنيه) وعصير ليمون نعناع (22 جنيه)، للأسف الطلبات تأخرت علينا حوالي ساعة إلا ربع برغم أن مافيش أي حاجة في اللي طلبناها صعبة أو تأخد وقت للدرجة، وصل طبق الأومليت سخن وشهي وبـ يُقدم معاه بطاطس وسلاطة وبرغم أن كمية الجبنة خلت الأومليت حادق شوية بس التوست تحت الأومليت كانت حركة ذكية وشهية لأنه أخذ من طعم البيض وقلل من إحساس الملح اللي فيه، لكن للأسف اللي ضايقنا أن اتقدم في الطبق قطعة واحدة بس بطاطس ويدجز، صباع واحد يعني علشان نكون دقيقين، ودي حاجة مش مقبولة طبعًا.

أما الـ Club sandwich فقُدم لنا 2 توست مقسومين 2 يعني أربعة Club Sandwich صغيرين ومعاها بطاطس عادية وكاتشب، بس للأسف كان فيه 2 منهم التوست محروق، مش مقرمش لأ محروق حرفيًا، ممكن أكثر حاجة عجبتنا كانت العصائر علشان فريش.

قلنا نختم تجربتنا بـ Chocolate Fondue بـ 36 جنيه، كانت دافية من بره وسخنة من جوه، وطعمها كان معقول لولا بس أن كمية الآيس كريم كانت صغيرة جدًا مقارنة بحجم الشوكولاتة والكيك، بشكل عام هاريس كافيه محتاج يضبط شوية حاجات بسيطة علشان يرجع سمعة فطاره المعروفة واللي عجبتنا قبل كده.