The Definitive Guide to Living in the Capital , Cairo , Egypt

بطبيعة عملنا كمحررين في كايرو 360 بيكون نفسنا لما نزور مكان ويكون فيه أخطاء أن القائمين عليه، يصلحوا الأخطاء دي، لأننا في الآخر مش بنلعب دور الساحرة الشريرة في فيلم سنو وايت، يعني كل هدفنا أن الناس تستفيد بالأماكن الكويسة، والأماكن اللي جودتها أقل تحن من مستواها.

أول ما دخلنا لا تيتيود – L’attitude  كان فيه ترابيزتين بس مليانين، بعد حوالي ثلث ساعة جاء لنا الجرسون، وللأسف اكتشفنا أننا قاعدين أمام المطبخ والباب اللي بيدخل للحمام، وده خلانا نشوف ونسمع مشادة كلامية بين الجرسونات وبعض.

المهم المنيو مليان كل الأصناف اللي تتخيلوها ما بين مكرونة وبيتزا وساندوتشات وحلويات ومشروبات ساخنة وباردة، بعد حيرة طويلة لأننا ماكناش جعانين قوي طلبنا بطاطس بالجبنة (17 جنيه) وساندوتش supreme chicken بـ 33 جنيه، وكوكتيل pink lady بـ 19 جنيه.

الأكل وصل بعد حوالي نصف ساعة، بس يا ترى وصل إزاي؟ بينك ليدي كان عبارة عن سفن آب مع صوص شيري وقطع ليمون وكان طعمه عادي، أما الساندوتش فكان كارثة، قبل كل شيء هو المفروض أنه مكون من قطع دجاج مشوية وبيكون وصوص مايونيز، قطع الدجاج كانت بايتة تقريبًا ومتسخنة دلوقتي وطبعًا حاجة زي كده ما تفوتش علينا عرفناها على طول، كانت محروقة من بره وناشفة جدًا من جوه، والبيكون كانت أطرافه محروقة برضه وتقريبًا اتحمر فنشف وبقى أشبه بالكاوتش، أما الطامة الكبرى كانت أن العيش أطرافه محروقة كمان، يعنى باظت من جميع الإتجاهات، أما البطاطس بالجبنة فكانت مزيتة وده شيء غير مقبول بالمرة.

حاولنا نصلح الطعم اللي أكلناه بعصير ليمون نعناع (22 جنيه) وقهوة إكسبرسوه (14 جنيه) لكن للأسف اتضايقنا برضه، الليمون كان ناقصه سكر، والنعناع مش مضروب كويس فبالتالي عايم على وش الليمون، يعنى حاجة ما تتشربش كده الحمد لله، لما قلنا للجرسون زود لنا السكر بس الطعم ما فرقش كتير. الإكسبرسو تعتبر كانت الحسنة الوحيدة في الموضوع لأنها كانت قهوة إيلي وطبعًا هي غنية عن التعريف.

المكان في الأغلب الناس اللي بتروحوا بيكونوا عايزين يقعدوا في مكان مع بعض ويشربوا شيشة بغض النظر هم بيأكلوا أو يشربوا إيه.