كونيتا.. آيس كريم تاكو بطعم القرمشة في المعادي
آيس كريم تاكو القاهرة خروجات كونيتا المعادي محلات آيس كريم في القاهرة منيو كونيتا المعادي
Cairo 360
رنا شرف
مافيش حد بيقدر يقاوم الآيس كريم، سواء في الصيف، أو حتى في الشتاء. وعشاق الآيس كريم كتير في القاهرة، خصوصًا في الأيام دي، اللي هي حرها غريب رغم إننا المفروض خرجنا من فصل الصيف! ومن الأماكن الحلوة اللي جربناها مؤخرًا، (كونيتا – Conitta) وده مكان بيقدم آيس كريم في المعادي. خلونا نتذوقه مع بعض في السطور الجاية.
المكان موجود في 4 شارع 261، وأول ما هتدخل من البوابة هتلاحظ إن اللون الأصفر هو الطاغي على ديكوراته. المكان ديكوراته بسيطة ومبهجة، وقعدة الكراسي مريحة، والإضاءة مع ألوان الحوائط هتحسسك بسخونة الصيف.
نيجي بقي للآيس كريم، اللي فعلًا كان تجربة مبهجة بالنسبة لنا.
الآيس كريم في “كونيتا” بيتقدم في تاكو، والتاكو هو نوع بسكويت معمول بطريقة خاصة، ونقدر نقول إنه وافل مقرمش بيكون محشي بمجموعة متنوعة من بولات الآيس كريم اللي بتكون من اختيارك، وبتتقدم مع الصوصات اللي بتحبها.
والتاكوز عندهم أنواع مختلفة، منها تاكو شوكولاتة، وتاكو شوكولاتة بيضاء، وتاكو توت أزرق، وتاكو فستق، وتاكو لوتس.
جربنا آيس كريم تاكو بصوص الفستق وزبدة الفول السوداني، وده سعره 66 جنيه.
كمان جربنا آيس كريم فانيلا وبسكويت محشى شوكولاته وكان رائع، وتقدر تقول إنه زي وجبة متكاملة هتشبعك بجد، وده سعره 80 جنيه.
الحقيقة إن تجربتنا في المكان كانت مميزة، وهنحب نكررها تاني.
