The Definitive Guide to Living in the Capital , Cairo , Egypt

في عالم تحكمه الجبنة السايحة والنوتيلا، بنحتاج من فترة للتانية نجرب أكلة بسيطة كلاسيكية وتكون مكوناتها كلها عالية الجودة. من هنا نحب نشكر المخبز الصغير “كوبنهاجن-Copenhagen”  الموجود في الزمالك واللي فعلًا قدر يمتعنا بساندويتشات كلاسيكية معمولة بمزاج وشوية حلويات ملهاش حل.

كوبنهاجن مخبز صغير فاتح على شارع 26 يوليو فيه ترابيزتين وسبعة كراسي عاليين لو حبيت قعدة هادية مع نفسك، بس هو في العموم معتمد أكتر على التيك أوت. المخبز عبارة عن طاولة على شكل حرف L معروض عليها منتجاتهم في الأول، مع صبورة مكتوب عليها عروض اليوم.

روحنا نتفرج على المنتجات المعروضة في الفريزر واللي تشمل ساندويتشات وسلاطات وبارفيه، وبصراحة كلهم شكلهم طازة ويفتح النفس. الفكرة إن الاختيار بينهم كان صعب، لكن في النهاية طلبنا ساندويتش روست بيف (45 جنيه) وساندويتش روست تركي بالجبنة (40 جنيه).

طبعًا أول حاجة بتقابلك في الساندويتشات هي العيش، والعيش في كوبنهاجن كان عيش فرنساوي بنّي طري. ساندويتش الروست بيف عبارة عن كمية محترمة من اللحمة المتقطعة شرائح رفيعة مع خس وشوية مايونيز ومسطردة عملوا شغل عالي مع المخلل وشرائح الجبنة الشيدر. الجرسون قال لنا إن الساندويتش ده من ابتكار المكان، وبصراحة كل المكونات كانت طازة وجودتها عالية، بس العيش الرائع سرق الأضواء بجماله – يمكن التعليق الوحيد إن الساندويتش تحسه ناقص نكهة قوية.

أما ساندويتش التركي بالجبنة فتقريبًا مفيش اختلاف كبير، بس المفاجئة إن العيش هنا كان أحلى كمان وسرق الأضواء مرة تانية. المفاجئة هنا إن التركي المدخن مكانش ناشف زي ما بنشوف في أماكن تانية كتير. من الأخر نقدر نقول إنه ساندويتش بسيط صحيح بس طعمه روعة وجودة مكوناته مالهاش مثيل.

نروح للحلويات ونجرب بلوبيري كيك (20 جنيه) وشوكليت فادج (25 جنيه) وكرواسون باللوز (18 جنيه). البلوبيري كيك كانت عبارة عن شريحة كيك مربعة خفيفة عليها كمبوت بلوبيري. تحية كبيرة لكوبنهاجن اللي قدروا يعملوا كيكة سكرها مضبوط وشكلها يفتح النفس وكمان تحس إنك بتأكل طبق بيتي.

بعدها كان الدور على الشوكليت فادج، وهي كيكة شوكولاتة اسطوانية فيها طبقات فادج في النص، وطعمها قريب من الكيك بوبس بس في نفس الوقت لها قوام الكيكة الخفيف. كيكة الفادج كمان كانت متغطية كلها بطبقة شوكولاتة سميكة مطاطية زودت من طعم الشوكولاتة القوي. من الحاجات الجميلة في الكيكة قطعة الكوكي تحتها اللي عملت طعم لذيذ وقرمشة جميلة.

آخر حاجة كرواسون اللوز، وبصراحة طلع مفاجئة وكان أحلى حاجة جربناها يومها. الكرواسون كان بالزبدة وهش ولونه ذهبي يفتح النفس، أما كريمة الفانيليا اللي عاملة زي الكسترد فكانت لذيذة واللوز المقرمش عمل شغل عالي. صحيح الكرواسون كان عليه سكر بودرة كتير شوية، بس إحنا مستعدين نفطر بيه كل يوم الصبح ونفضل مبسوطين.

صعب تلاقي ساندويتشات وحلويات بالشكل ده اليومين دول، ولو حصل فغالبًا بيكونوا معملوين بمكونات جودتها قليلة. عجبنا في كوبنهاجن البساطة والرجوع للزمن الجميل، بس عنصر التميز عندهم فعلًا هو جودة مكونات الأكل، أصلك مهما كنت مبتكر في الأكل أيًا كان نوعه واستخدمت مكونات جودتها أي كلام، يبقى معملناش حاجة.