The Definitive Guide to Living in the Capital , Cairo , Egypt

  الاسم مبتكر وعجبنا الدمج بين الكلمتين “كريب”
و”وافل” في كلمة واحدة ظريفة. المحل موجود بشارع 233 في المعادي بالقرب
من محل «ايـﭼـي ﭘاﭘـي» لمستلزمات الحيوانات الأليفة. هو محل صغير جدًا بـ يقدم
الوافل والكريب، والديكور الداخلي مش فيه أي حاجة مميزة يتكتب عنها، بالعكس شكل
المكان كله كأنه مش متشطب أو كأنه محتاج تجديد.

فيه كاونتر في نهاية المحل عليه عدد من البرطمانات فيها إضافات بـ تتحط على الوافلز، وشوفنا كمان شوكولاتة كيت كات
وسنيكرز وفيريرو روشيه وكيندر بوينو، الشكل العام كان فوضوي شوية. والثلاجة كان
فيها آيس كريم موفينبيك. ووقت زيارتنا كان فيه نوعين بس من الآيس كريم. ولما طلبنا
المنيو أشار واحد من العاملين على الكاونتر اللي قدامه ببساطة وقال لنا “هو ده
كل اللي موجود، عايزين إيه أكثر من كده؟”.

وبعد شوية جدال على موضوع المنيو، أخذنا
ورقة مكتوبة بخط اليد ديه المفروض أنها المنيو بتاعهم. وساعتها بس اكتشفنا أن فيه
عامل تاني في المحل كان مستخبي طول الوقت في مكان ما خلف الكاونتر. وبعد ما فكينا
رموز المنيو (تقريبًا حجر رشيد كان أسهل شوية) اختارنا وافل بشوكولاتة الفيريرو
روشيه Ferrero Rocher بـ 20 جنيه، وكريب بالنوتيلا بـ
13 جنيه وكريب بالعسل والمكسرات بـ 14 جنيه.

الوافل
الحقيقة فشل أنه يبهرنا، كان رطب جدًا وأسوأ ما فيه كان صوص الشوكولاتة البيضاء
عليه من فوق. طعمه ماكانش شوكولاتة خالص، وقوامه كان خفيف وشفاف. الفيريرو روشيه
كانت لذيذة لكن “الوافلاية” كلها على بعضها ماكانش ليها طعم. كريب
النوتيلا  كان حلو بس طبعًا كان زروَطة
وصعب في الأكل. كمية النوتيلا كانت وفيرة لكن عجين الكريب كان سميك شوية، ونفس
الموضوع في كريب العسل والمكسرات، وسمك العجين ده بـ يخليه أشبه بوجبة كاملة وهو
المفروض وجبة خفيفة أو تحلية بعد الأكل. بس بالنسبة لسعره يعتبر كويس ومش هـ نشتكي
كثير بعد كده.

العاملين في المحل متعاونين وظرفاء لكن واضح
أنهم لسة تائهين شوية. مشينا
من «كرافل» عندنا ما يشبه غيبوبة سكر من كثر السكر في المعجنات اللي أكلناها. فـ لو
حاسس أنك نفسك في حاجة مسكرة أو نقدر نقول “معسلة” ممكن تروح «كرافل»
وانت مطمئن، لكن لو بـ تفضل الجودة العالية في الحلويات يبقى يفضل أنك تجرب مكان
ثاني.