The Definitive Guide to Living in the Capital , Cairo , Egypt

واحدة من المطاعم اللي بتشد شريحة كبيرة في القاهرة هي المطاعم الإيطالية، نادر جدًا لما تلاقي حد ما بيحبش الباستا أو البيتزا أو حتى نفسه يروح يزور إيطاليا ذات نفسها، ومن المطاعم الإيطالية اللي بنحبها في الشيخ زايد ورحناها من كام سنة وكتبنا عنها مقال نقدي بعد وقت قليل من الافتتاح مطعم كانيرو – Cannero في توين تاورز.

يوم ما رحنا كان فيه ماتش مهم والدنيا كانت زحمة جدًا والترابيزات لازقة في بعضها خاصة في منطقة الـ Outdoor، على الرغم من كده الخدمة كانت سريعة والطلبات ما كانتش بتتأخر، هما بينشروا بوستات على صفحتهم على الفيسبوك عن الماتشات قبل ميعادها علشان اللي حابب يتفرج عليها في المطعم.

ولأنه بيقدم أكل إيطالي كان لازم نجرب الباستا، طلبنا سي فوود باستا (69 جنيه) فيها جمبري وكاليماري، ولك أنك تختار صوص أبيض أو أحمر فاختارنا الأبيض، هما كمان بيقدموا أطباق international فطلبنا من قسم الفراخ: تشيكن سويت أند ساور (95 جنيه) ودي عبارة عن قطع فراخ مقطعة مكعبات مع الفلفل والبصل وقطع الأناناس مع صوص الكاتشب وخل التفاح، ومعاهم 2 طلب جانبي اختارنا خضار سوتيه وMashed potato (الاختيارات الباقية بطاطس محمرة أو أرز أو باستا).

زي ما قلنا قبل كده الأكل ما أخذش وقت طويل، الباستا كانت جاية لنا سخنة مولعة، باستا بنّا بصوص أبيض ومعاها جمبري حجم صغير وكاليماري، الصوص كان قوامه معقول ومتوازن في الطعم، الجمبري والكاليماري كانوا مستويين كويس خاصة الكاليماري، الكمية كويسة بس الطبق كان ناقصه شوية Garnish أو حتى جبنة بارميجان مبشورة من فوق علشان يفتح النفس.

التشيكن سويت أند ساور بقى هو اللي طلع حكاية، الصوص كان مسكر وقوامه رائع والفراخ كانت تسويتها ممتازة، مش هتحب خالص أن الطبق ده يخلص، الخضار السوتيه كان فريش ومستوي كويس (مش Over-cooked) والبيوريه لطيف بس كان محتاج يبقى كريمي أكتر.

بعد ما خلصنا أكل دخلنا على الحلو، طلبنا تشيز كيك (30 جنيه) بس طلعت سادة، فلازم تطلب عليها صوص إضافي لو حابب، اختارنا صوص الراسبرى (9 جنيه) ومن المشروبات الفريش أخدنا ليمون منت (20 جنيه)، للأسف التشيز كيك كانت مخيبة للآمال، الصوص كان مسكر جدًا وكميته أكبر من الكيك نفسها، كنا حاسين أننا بناكل تشيز كيك بمربى الراسبرى، على عكس الليمون منت اللي عملت توازن وكسرت الـ overdose سكر اللي أكلناه، المشروب فريش وسكره مضبوط ومنعش.

اتبسطنا جدًا بقعدتنا في “كانيرو” في توين تاورز، المكان فيه كمان كاريوكي في الأيام العادية اعرفوا تفاصيله من تجربتنا في المقال النقدي القديم أو اتصل بهم 01000118668.