The Definitive Guide to Living in the Capital , Cairo , Egypt

وإحنا بنتمشى الصبح بدري في مصر الجديدة، وبالتحديد في محيط النزهة، كنا بنشوف مكان نشرب فيه قهوة، خاصة أن الوقت كان يوم إجازة والدنيا بدري. لقينا في وشنا كافيه اسمه Croque Madame، وبمجرد ما لمحنا مدخله وتصتماته الخارجية، قلنا هو ده اللي بندور عليه! وبالفعل كانت أجمل صدفة، واختيارنا خلانا مبسوطين.

خلال السطور الجاية هنقول لكم على تفاصيل الإفطار في كافيه Croque Madame مصر الجديدة.

مدخل المكان كأنكم داخلين قصر من بتوع زمان، أو كأنكم بتعدوا على بوابة زمنية بتنقلكم من حقبة لحقبة، وبالفعل بمجرد ما هتدخلوا جوه هتحسوا حالة بهجة وإيجابية عظيمة مختلفة عن حالة الصخب في المنطقة. هتلاقوا كمان كنب وكراسي كلاسيكية فخمة، وخدمة ممتازة، وعلى الرغم من أن الصبح موجود عامل واحد إلا أنكم مش هتحسوا بأي تقصير.

خلونا نقول لكم على تجربتنا مع الإفطار.

مجرد ما دخلنا المكان نسينا أننا عاوزين قهوة وطلبنا كابتشينو وسعره 50 جنيه، وجانا في مج جميل ومرسوم والكابتشينو طعمه مظبوط، واتمزجنا منه، ومن طريقة تقديمه.

المشروب بينزل معاه معلقة ملكية من بتوع زمان.

كمان جربنا من عندهم الفونتانا بصوص الشيكولاتة، وسعرها كان 48 جنيه، ودي ممكن نوصفها بكوبليه “وأنا أحب أقول الشعر في الحلوين”، من جمال وطعامة الكيك وصوص الشيكولاتة وجودتهم.

تجربتنا كانت سريعة وبسيطة، لكن بنوعدكم أننا هنجرب المكان بشكل أوسع في وقت تاني.

وماتنسوش إن المكان الصبح هادي جدًا ورايق، وكمان ماعندهمش مصاريف خدمة مستخبية.

علشان تعرفوا أكتر عنهم زوروا صفحتهم على فيسبوك من هنا.