The Definitive Guide to Living in the Capital , Cairo , Egypt

لأن زيارتنا الأخيرة لفرع “كافيه سوبريم” فى مول العرب من فترة كانت استثنائية وكنا مبسوطين فيها جدًا من جودة الأكل، والمكان وحاجات كثير ذكرناها، وبالتالى كنا في قمة السعادة لما شفنا فرع ثاني له فى الكوربة وإحنا ماشيين بالصدفة، أول حاجة عملناها بدون تفكير. ركننا العربية ونزلنا قعدنا فيه.

في “كافيه سوبريم – Café Supreme” أول حاجة هـ تشدك المنطقة الخارجية الواسعة والمليانة شمسيات وناس بـ تشرب شيشة أو قهوة أو بـ تستمتع بأكلة خفيفة مع أصدقائها، غالب عليه اللون البني المحروق لكنه على عكس الانطباع الأول اللى ممكن يوصلكم شيك جدًا باللوجو المميز له بحجم كبير.

فيه منطقة خارجية مفتوحة دي فيها تدخين، ومنطقة بالداخل فيه منها للمدخنين وغيرها لغير المدخنين، الأماكن مفتوحة على بعض من خلال فتحات فى الحوائط أو فواصل زجاج، ده غير أن فيه نواحي من المكان واجهتها زجاج، ثلاجة العرض موجودة جوه على الشمال.

ولأننا لنا سابق خبرة مع المنيو أخذنا المرة دي أصناف ما جربناهاش فى الفرع الأول، طلبنا سوبريم بيتزا (39 جنيه)، وسموكد تركي ساندويتش “بانيني” (43 جنيه) ونزل معاها شوربة مشروم (أو سلاطة على حسب اختيارك)، وكاليفورنيا سلاد (36 جنيه) فيها خس وجرجير وخرشوف وعيش محمص مكعبات وبرضه مكعبات جبنة بيضاء، وزجاجة المياه الصغيرة بـ 6.75 جنيه.

مافيش كلام على المكونات كلها، طازجة وخفيفة والمزج بينها له طعم ثاني هنا، السلاطة كانت عالمية ومختلفة، الشوربة كمان كانت جيدة وفيها قطع مشروم صغيرة، السموكد تركي كان حلو ومكوناته كثيرة وبرضه طازجة، إلى جانب المنيو العادية فيه منيو للسوشي فيها اختيارات أكيد هـ تشدك أنك تجربها لأنها مش موجودة فى أماكن أخرى.. بس إحنا لنا زيارة ثانية علشان نجربها.

فى المشروبات جربنا هوت شوكليت (Dark) (23 جنيه) وفيه بالشوكولاتة البيضاء كمان، وأسبريسو كراميل سوبريمو (حجم M بـ 28 جنيه)، الهوت شوكولات كان لطيف بس فيه اللى ذقناه أفضل منه، والأسبريسو كان لطيف برضه بس كان فيه حاجة غريبة أن قطع أسبريسو مش مطحونة فيه كنا حاسينها فى فمنا! للأسف وقتنا كان ضيق وكان لازم نمشي فى الوقت اللى أصحابنا كانوا بـ يشدونا من أمام ثلاجة عرض الحلويات المغرية بأنواع كثيرة قوي لازم هـ نعدي فى يوم نجربها من تشيز كيك وغيرها.

“سوبريم” لهم موقع على الإنترنت (لكن لسه مش شغال)، و صفحة على الفيسبوك مليانة معلومات وصور ممكن تدخل عليه تعرف معلومات أكثر، المكان بـ يضيف خدمة فقط، وللأسف مافيهوش إنترنت Wi-Fi، لكن القعدة هناك مافيش كلام عليها.. بجد جوها مختلف هـ تحس فيه أنك فى المصيف.. والتغيير مطلوب دائمًا.