The Definitive Guide to Living in the Capital , Cairo , Egypt

رنا شرف

من المعروف أن وسط البلد مكان حيوى وجميل وجامع بين الأصالة بتاعت زمان وحداثة دلوقتي، وبعض الكافيهات فاهمة الأمر ده كويس وبتحاول تعمل توازن بين القديم والحديث.

وإحنا بنتمشى مؤخرًا في وسط القاهرة، وبنتفرج على مبانيها الجميلة اللي بتحكي حكايات عن الماضي الجميل، لفت نظرنا مكان حديث في وسط البلد، وهو كاريبو كوفي – Caribou Coffee، واللي حسيناه مكان مناسب جدًا لاستراحة أثناء التمشية في وسط البلد.

أول ما بتدخل كاريبو بتحس إنك سافرت خارج مصر، الديكورات بتنقلك لعالم تاني. المكان دورين ومتاح مكان خاص للمدخنين، والإضاءة في المكان جميلة ومناسبة لقعدة مريحة نفسيًا، كمان الكراسي والترابيزات مريحة جدًا، وبصفة عامة الكافيه غالب عليه الطابع الشبابي.

قهوة وساندوتش تيراميسو !

اخترنا قعدة مريحة، وحسينا بدفء المكان، وده فتح نفسنا وخلانا نطلب في البداية ساندوتش تركي بالجبنة، وده سعره 75 جنيه، كان عظمة حقيقية! حلو وسخن والجبنة فيه حلوة والتركي كميته مناسبة.

طلبنا كمان كيك تيراميسو على الطريقة الإيطالية، ودي سعرها 63 جنيه، ماكنتش أقوى حاجة وكنا متوقعين تكون أحلى من كده، لكن كانت معقولة.

ولأن ختامها مسك، قررنا نطلب موكا، ودي سعرها 65 جنيه، المشروب كان طعمه جميل وأحلى مزاج.

المكان حلو وتحس إنه بيحتويك، ومناسب جدًا لساعة راحة لو كنت في وسط البلد، تأكل حاجة حلوة أو سندوتش، أو تشرب مشروبك المفضل.

عنوان Caribou Coffee: في 16 شارع عدلي، وسط البلد.