The Definitive Guide to Living in the Capital , Cairo , Egypt

من المحلات القليلة اللي صورها على صفحة الفيسبوك تخليك عاوز تروح بنفسك وتتفرج وتتذوق على الحقيقية. قررنا بعد ما شفنا الصور المبهجة أننا نعمل زيارة لـ “كاروسيل – Carousel” ونقول لكم رأينا.

المحل موجود في شارع الحرية، لو أنت سايق في شارع الثورة هـ تدخل يمين في امتداد الشارع بتاع سيتي ستارز وكأنك رايح على تيفولي دوم، هـ تسيب تيفولي على يمينك وتأخذ ثاني u -turn شمال هـ تلاقي كاروسيل على شمالك.. المحل مبهج جدًا، بدءًا من كلمة كاروسيل المكتوبة باللمبات الصغيرة بستايل الملاهي الكلاسيكية القديمة مرورًا بالألوان المبهجة الـ Aqua والبمبي والأصفر الباستيل، ولحد الكيكات المعروضة في الفاترينة الزجاج.

طبعا أول ما تدخل هـ تلاقي صورة الحصان اللعبة اللي بـ يبقى منتشر في مدينة الملاهي واللي اسمهCarousel  باللغة الإنجليزية. أصحاب المحل حاولوا ينقلوا لنا روح الملاهي بالألوان المبهجة والمزيكا المفرفشة والزينات والزهور الملونة، وفعلاً الروح المرحة دي هـ توصلك أول ما تدخل المحل.

 المحل بـ يعمل تورتات بالطلب بالتصميم اللي العميل عاوزه سواء كاروسيل اللي تعمل لك تصميم أو أن العميل هو اللي يبقى مجهز التصميم وممكن كمان تختار من مجموعة تصميمات جاهزة عندهم وسعر كل تورتة بـ يختلف على حسب حجمها وتصميمها والخامات المستخدمة فيها.

المحل بـ يبيع كمان كب كيك بنكهات متنوعة زي الأوريو، والشوكولاتة، والفانيليا، والريد فيلفت Red velvet وغيرها، وسعر الكب كيك الواحدة 15 جنيه. عجبنا قوي الصندوق الكارتون بتاع كاروسيل وإللي بـ يتحط فيه 6 كب كيك، الصندوق شكله مبهج وينفع قوي كهدية لو أنت رايح تزور واحد صاحبك وعاوز تأخذ معاك حاجة خفيفة وبسيطة ومبهجة وفي نفس الوقت شكلها لطيف.

فيه كمان حاجات ثانية زي الكوكيز (10 جنيه للواحدة) والبراونيز (10 جنيه للواحدة) وكرات الشوكولاتة دي من أحسن الحاجات عندهم في المحل. في الواجهة لوحة سوداء لطيفة دائمًا بـ يُكتب عليها الأصناف المتوفرة وأي عروض أو رسائل للعملاء.

المحل كمان مش بس بـ يعمل الحلويات، لأ كمان بـ يعمل Theme  لها لو العميل طلب كده، يعني ممكن تطلب مثلاً Cup cakes ومعاها وحدات لتزيينها وزينة للحائط وللترابيزة والمحل هـ يبعث لك تصميمات تختار ما بينها وبكده تقدر تعمل ركن حلو في الحفلة بتاعتك. فيه كمان إمكانية أنك تأجر مستلزمات للحفلات من عندهم يعني لو مثلاً طلبتCup cakes  وكنت عاوزهم محطوطين في ستاند شيك تقدر تدفع إيجار الستاند ده وترجعه بعد حفلتك ما تخلص.

لو نفسك كمان تذوق حاجة قرأت الوصفة بتاعتها على الإنترنت ممكن تبعث لهم الوصفة وهما بـ يجربوها مع الشيف ولو طلعت حلوة ممكن تأكلها وكمان بـ تتعرض بعد كده في المحل.

 في وسط كل الحلويات اللذيذة دي كان هـ يبقى لطيف لو فيه ركن منخفض السعرات الحرارية للناس اللي نفسها تذوق حلويات كاروسيل من غير ما تتخن.

من أحلى الحاجات اللي ذوقناها الـ Mini chocolate balls وكيكة الأوريو والفانيليا، كيكات الشوكولاتة طعهما حلو لكن بعضها محتاج يكون الكريمة بتاعته أخف شوية ودسمها أقل خصوصًا أن الشوكولاتة نفسها بـ تكون ثقيلة.

في المجمل المحل لطيف وعنده خدمة توصيل مالهاش Minimum في هليوبوليس لكن مع ذلك المكان يستحق زيارة لأنه مكان مبهج ولطيف والحلويات والمخبوزات لذيذة.