The Definitive Guide to Living in the Capital , Cairo , Egypt

المخبوزات بشكل عام مش أي حد يقدر يعملها صح، وهي معضلة بسبب حاجات كتير لازم تكون مظبوطة علشان تكون معمولة صح! زي ظبط المقادير، وسنس عملها، وكمان النفس، لأن مش أي طباخ شاطر يبقى “خباز”، ووسط المعادلات دي كلها والدوشة، لقينا مكان مختلف في المعادي اسمه كارمل كاليفورنيا بيقدم مخبوزات وحلويات فرنسية بجودة عالية بسطتنا، تعالوا نتعرف على المكان أكثر.

المكان موجود في دور تاني، وبمجرد دخول العمارة هتنبسطوا من الخضرة اللي حواليكم ونظافة المكان اللي هيديكم طاقة إيجابية، وأول ما توصلوا فوق هتلقوا فيه إن وآوت دور، بننصحكم تقعدوا في الآوت دور على فيو الأشجار هتنبسطوا قوي، والمكان مناسب للمجموعات بنظام الحجز وكمان فريق العمل متعاون وودود خالص وهتنبسطوا بسرعة استجابتهم وقدرتهم على مساعدتكم.

ديكورات المكان هتحسسكم أنكم داخلين بيت مصري أصيل مش مجرد كافيه، والألوان اللي في كل مكان هتكون مصدر سعادة، ونصيحة اسألوا عن تفاصيل كل حاجة هتطلبوها علشان تبقوا عارفين إيه اللي ممكن تطلبوه ويبقى عندكم خلفية كاملة عن المكونات.

بدأنا طلبنا بساندوتش تركي بيستو، وكان سعره 153 جنيه، وهو عبارة عن عيش مقرمش من بره وفيه شوية نشفان من جوا، ومحشي تركي مدخن مع خضروات وطعمه كان حلو، ولكن طعم الصوص كان خفيف ويعتبر مستطعمناهوش.

وكمان طلبنا بلوبيري كيك وسعرها 74.5 جنيه، وكانت عبارة عن كيكة بلوبيري ليمون، وعليها كريمة جبنة، وسكرها كان مظبوط وطعمها مميز وعجبتنا جدًا، وهي كانت من ترشيح واحد من فريق العمل.

ومن ضمن طلباتنا كان شو كراميل، وكان بسعر 70.5 جنيه، وهو عبارة عن عجينة شو وكريمة كراميل وعليهم كراميل مكرمل، ورغم أنه طعمه حلو وعجبنا ولكن هو غير مناسب لو مش بتحبوا السكر لأن المكرمل بتاع الكراميل مسكر جدًا، فلو عندكم أي مشكلة مع السكر مش بننصح بيه.

وأخيرًا طلبنا فرنش لاتيه وسعره 91 جنيه، وكان مميز وعجبنا وحتى ماكناش محتاجين نسكره لأنه كان مظبوط في كل حاجة، وكان نفسنا نطلب واحد تاني من حلاوته، وأكيد هيكون مشروبنا المفضل عندهم دايمًا.

تجربتنا كانت مميزة وانبسطنا منها وهنعتمد المكان ده من أهم الأماكن اللي نبدأ بيها يومنا ونفطر فيه في المعادي والفترة الجاية هنجرب مخبوزات أكتر علشان نقولكم رأينا فيها.

تقدروا تعرفوا أكتر عنهم من خلال صفحة الفيسبوك من هنا.